17.2C Vancouver 17.2C VancouverMar 18, 2026 6:52 PM - Connect Newsroom - Jasmine Singh
ਬੀ.ਸੀ. ਹਾਈਵੇਅ ਪੈਟਰੋਲ ਨੇ ਐਬਟਸਫੋਰਡ ਦੇ ਇੱਕ 16 ਸਾਲਾ ਕਲਾਸ 7 ਲਰਨਰ ਡਰਾਈਵਰ ਦਾ ਲਾਇਸੈਂਸ 12 ਮਹੀਨਿਆਂ ਲਈ ਸਸਪੈਂਡ ਕੀਤਾ ਹੈ। ਪੁਲਿਸ ਮੁਤਾਬਕ, 21 ਜੁਲਾਈ 2025 ਨੂੰ ਪੌਪਕਮ ਨੇੜੇ ਟਰਾਂਸ ਕੈਨੇਡਾ ਹਾਈਵੇਅ 'ਤੇ ਇਸ ਨੌਜਵਾਨ ਵਲੋਂ ਆਪਣੇ ਮਤਰੇਈ ਮਾਂ ਦੀ ਬੀ.ਐਮ.ਡਬਲਿਊ ਕਾਰ 100 ਦੀ ਲਿਮਟ ਵਾਲੇ ਜ਼ੋਨ ਵਿਚ 180 ਕਿਲੋਮੀਟਰ ਪ੍ਰਤੀ ਘੰਟ ਦੀ ਰਫ਼ਤਾਰ ਨਾਲ ਦੌੜਾਈ ਗਈ ਸੀ। ਜਦੋਂ ਪੁਲਿਸ ਨੇ ਰੋਕਣ ਦਾ ਇਸ਼ਾਰਾ ਕੀਤਾ ਤਾਂ ਉਸ ਨੇ ਗੱਡੀ ਰੋਕਣ ਦੀ ਬਜਾਏ ਭਜਾ ਲਈ ਅਤੇ ਹਾਈਵੇਅ ਤੋਂ ਬਾਹਰ ਨਿਕਲਦੇ ਸਮੇਂ ਗੱਡੀ ਇੱਕ ਡੰਪ ਟਰੱਕ ਵਿਚ ਮਾਰ ਦਿੱਤੀ, ਜਿਸ ਤੋਂ ਬਾਅਦ ਉਸ ਵਿਚ ਸਵਾਰ ਸਾਰੇ ਟੀਨੇਜ ਨੇ ਮੌਕੇ ਤੋਂ ਭੱਜਣ ਦੀ ਕੋਸ਼ਿਸ਼ ਵੀ ਕੀਤੀ।
ਬੀ. ਸੀ. ਹਾਈਵੇ ਪੈਟਰੋਲ ਨੇ ਇਸ ਦੀ ਸੈਲਫੋਨ ਵੀਡੀਓ ਜਾਰੀ ਕੀਤੀ ਹੈ, ਜੋ ਗੱਡੀ ਦੇ ਅੰਦਰੋਂ ਬਣਾਈ ਗਈ ਸੀ। ਪੁਲਿਸ ਦਾ ਕਹਿਣਾ ਹੈ ਕਿ ਬੀ.ਐਮ.ਡਬਲਿਊ ਨੂੰ 7 ਦਿਨਾਂ ਲਈ ਇੰਪਾਊਂਡ ਕਰ ਲਿਆ ਗਿਆ ਸੀ ਅਤੇ ਗੱਡੀ ਦੇ ਜੁਰਮਾਨੇ ਤੇ ਮੁਰੰਮਤ ਦਾ ਸਾਰਾ ਖਰਚਾ ਉਸ ਦੀ ਮਤਰੇਈ ਮਾਂ ਨੂੰ ਝੱਲਣਾ ਪਿਆ ਹੈ। ਇਸ ਤੋਂ ਇਲਾਵਾ ਨੌਜਵਾਨ ਨੂੰ ਬਹੁਤ ਜ਼ਿਆਦਾ ਤੇਜ਼ ਰਫ਼ਤਾਰ ਅਤੇ ਲਾਪਰਵਾਹੀ ਨਾਲ ਡਰਾਈਵਿੰਗ ਕਰਨ ਸਮੇਤ ਕਈ ਚਾਰਜਿਜ਼ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
