ਵੀਜ਼ੇ ਦੀ ਤਾਂਘ ਵਿੱਚ ਨਵੀਂ ਦਿੱਲੀ ਵਿਚਲੇ ਆਸਟ੍ਰੇਲੀਆਈ ਸਫ਼ਾਰਤਖ਼ਾਨੇ ਦੇ ਬਾਹਰ ਇਕੱਠੇ ਹੋਏ ਅਫ਼ਗ਼ਾਨੀ ਨਾਗਰਿਕ

ਤਾਲੀਬਾਨ ਵੱਲੋਂ ਅਫ਼ਗ਼ਾਨਿਸਤਾਨ 'ਤੇ ਕੀਤੇ ਕਬਜ਼ੇ ਦੇ ਤਹਿਤ ਅੱਜ ਕੌਮੀ ਰਾਜਧਾਨੀ ਵਿੱਚ ਇਮੀਗ੍ਰੇਸ਼ਨ ਵੀਜ਼ਾ ਲੈਣ ਲਈ, ਵੱਡੀ ਗਿਣਤੀ ਵਿੱਚ ਅਫ਼ਗ਼ਾਨੀ ਨਾਗਰਿਕ, ਆਸਟ੍ਰੇਲੀਅਨ ਸਫ਼ਾਰਤਖ਼ਾਨੇ ਦੇ ਬਾਹਰ ਇਕੱਠੇ ਹੋਏ।

ਦੱਸਣਯੋਗ ਹੈ ਕਿ ਆਸਟ੍ਰੇਲੀਆ ਨੇ ਆਖਿਆ ਹੈ ਕਿ ਇੱਕ ਸਾਲ ਲਈ 3,000 ਲੋਕਾਂ ਲਈ ਮਨੁੱਖਤਾਵਾਦੀ ਵੀਜ਼ਾ ਪ੍ਰੋਗਰਾਮ ਦੀ ਪੇਸ਼ਕਸ਼ ਹੋਵੇਗੀ, ਖ਼ਾਸਕਰ ਉਨ੍ਹਾਂ ਲਈ, ਜੋ ਅਫ਼ਗ਼ਾਨਿਸਤਾਨ ਛੱਡ ਕੇ ਜਾ ਰਹੇ ਹਨ।

ਹਾਲਾਂਕਿ ਮੁਲਕ ਦੇ ਪ੍ਰਧਾਨ ਮੰਤਰੀ ਸਕੌਟ ਮੌਰੀਸਨ ਨੇ ਇੱਕ ਪ੍ਰੈਸ ਕੌਨਫਰੈਂਸ ਵਿੱਚ ਇਹ ਗੱਲ ਸਾਫ਼ ਕਰਦਿਆਂ ਆਖਿਆ,"ਮੈਂ ਵੇਖਿਆ ਹੈ ਕਿ ਕੁਝ ਲੋਕ 20,000 ਦੀ ਗੱਲ ਕਰ ਰਹੇ ਹਨ ਪਰ ਕੀ ਮੈਂ ਤੁਹਾਨੂੰ ਦੱਸ ਸਕਦਾ ਹਾਂ ਕਿ ਉਸ ਲਈ ਕੋਈ ਸਪਸ਼ਟ ਯੋਜਨਾਵਾਂ ਨਹੀਂ ਹਨ। ਆਸਟ੍ਰੇਲੀਆ ਉਨ੍ਹਾਂ ਦੇ ਖੇਤਰ ਵਿੱਚ ਨਹੀਂ ਜਾ ਰਿਹਾ।"

"ਅਸੀਂ ਸੁਣਿਆ ਕਿ ਆਸਟ੍ਰੇਲੀਅਨ ਸਫਾਰਤਖ਼ਾਨਾ 3000 ਅਫ਼ਗ਼ਾਨੀ ਨਾਗਰਿਕਾਂ ਨੂੰ ਵੀਜ਼ਾ ਦੇ ਰਿਹਾ ਹੈ। ਜਦੋਂ ਅਸੀਂ ਇੱਥੇ ਪੁੱਜੇ, ਤਾਂ ਉਨ੍ਹਾਂ ਨੇ ਸਾਨੂੰ ਫਾਰਮ ਦਿੱਤੇ, ਜਿਨ੍ਹਾਂ ਉੱਤੇ ਲਿਖਿਆ ਸੀ ਕਿ ਸਾਨੂੰ ਪਹਿਲਾਂ ਯੂਐੱਨਐਚਸੀਆਰ (ਯੂਨਾਈਟਿਡ ਨੇਸ਼ਨਜ਼ ਹਾਈ ਕਮਿਸ਼ਨਰ ਫਾਰ ਰਿਫ਼ਿਊਜੀਸ) ਨੂੰ ਈ-ਮੇਲ ਭੇਜਣੀ ਪਵੇਗੀ, ਜੋ ਸਾਨੂੰ ਸਫ਼ਾਰਤਖ਼ਾਨੇ ਤੋਂ ਵੀਜ਼ਾ ਲੈਣ ਲਈ ਰੈਫਰ ਕਰੇਗੀ। ਪਰ ਯੂਐਨਐਚਸੀਆਰ ਦੇ ਦਫ਼ਤਰ ਤੋਂ ਕੋਈ ਜਵਾਬ ਨਹੀਂ ਮਿਲ ਰਿਹਾ,"ਸਫ਼ਾਰਤਖ਼ਾਨੇ ਪੁੱਜੇ ਇੱਕ ਅਫ਼ਗ਼ਾਨ ਨਾਗਰਿਕ ਨੇ ਆਖਿਆ।

ਇੱਕ ਅਫ਼ਗ਼ਾਨੀ ਨਾਗਰਿਕ ਰਬੀ ਜਲਾਲਜ਼ਈ, ਜੋ ਇਕ ਬੀਤੇ ਦੋ ਸਾਲਾਂ ਤੋਂ ਭਾਰਤ ਵਿੱਚ ਰਹਿ ਰਿਹਾ ਹੈ ਨੇ ਆਖਿਆ:"ਜਦੋਂ ਤਾਲੀਬਾਨ ਨੇ ਸਾਡੇ ਮੁਲਕ 'ਤੇ ਕਬਜ਼ਾ ਕਰ ਲਿਆ ਹੈ, ਤਾਂ ਅਸੀਂ ਉੱਥੇ ਵਾਪਸ ਨਹੀਂ ਜਾ ਸਕਦੇ। ਲੋਕ ਭਾਰਤ ਵਿੱਚ ਸ਼ਰਨਾਰਥੀ ਬਣ ਕੇ ਭਾਰਤ ਆਉਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਪਰ ਅਸੀਂ ਸਾਨੂੰ ਇੱਥੇ ਬਹੁਤ ਮੁਸ਼ਕਲਾਂ ਆ ਰਹੀਆਂ ਹਨ। ਯੂਐਨਐਚਸੀਆਰ ਦਾ ਦਫ਼ਤਰ ਸਾਡੀ ਕਿਸੇ ਵੀ ਤਰੀਕੇ ਮਦਦ ਨਹੀਂ ਕਰ ਰਿਹਾ। ਮੇਰੇ ਪਰਿਵਾਰ ਨੇ ਵੀਜ਼ੇ ਲਈ ਅਰਜ਼ੀ ਦਿੱਤੀ ਸੀ ਅਤੇ ਹੁਣ ਇਸ ਗੱਲ ਨੂੰ ਵੀ ਦੋ ਸਾਲ ਹੋ ਚੁੱਕੇ ਹਨ ਪਰ ਸਾਨੂੰ ਅਜੇ ਤੱਕ ਇੰਟਰਵੀਊ ਲਈ ਵੀ ਸੱਦਾ ਨਹੀਂ ਆਇਆ।"

ਜਲਾਲਜ਼ਈ ਨੇ ਅੱਗੇ ਆਖਿਆ ਕਿ ਆਸਟ੍ਰੇਲੀਆਈ ਵੀਜ਼ਾ ਲੈਣ ਲਈ ਸ਼ਰਤਾਂ ਪੂਰੀਆਂ ਕਰਨੀਆਂ ਨਾ-ਮੁਮਕਿਨ ਸਨ ਕਿਉਂਕਿ ਇਸ ਲਈ ਯੂਐਨਐਚਸੀਆਰ ਵੱਲੋਂ ਸਿਫਾਰਿਸ਼ ਦੀ ਲੋੜ ਹੈ।
"ਉਹ ਤਾਂ ਸਾਨੂੰ ਇੰਟਰਵੀਊ ਲਈ ਵੀ ਨਹੀਂ ਬੁਲਾ ਰਹੇ, ਤਾਂ ਉਹ ਸਾਡੀ ਸਿਫਾਰਿਸ਼ ਕਿਵੇਂ ਕਰਨਗੇ? ਅਸੀਂ ਇੱਥੇ ਮਦਦ ਲੈਣ ਲਈ ਆਏ ਹਾਂ ਪਰ ਉਹਨਾਂ ਨੇ ਸਾਨੂੰ ਇੱਥੇ ਬਾਹਰ ਖੜੇ ਨਾ ਹੋਣ ਲਈ ਆਖਿਆ ਅਤੇ ਪੁਲਿਸ ਵੀ ਸੱਦੀ,"ਉਸਨੇ ਆਖਿਆ।

ਇੱਕ ਹੋਰ ਅਫ਼ਗ਼ਾਨ ਨਾਗਰਿਕ, ਸਈਅਦ ਅਬਦੁੱਲਾ, ਜੋ ਭਾਰਤ ਵਿੱਚ ਬੀਤੇ ਅੱਠ ਸਾਲਾਂ ਤੋਂ ਰਹਿ ਰਿਹਾ ਹੈ, ਨੇ ਆਖਿਆ ਕਿ ਉਸਨੂੰ ਇਨ੍ਹਾਂ ਅੱਠ ਸਾਲਾਂ ਵਿੱਚ ਅਜੇ ਤੱਕ ਯੂਐਨਐਚਸੀਆਰ ਤੋਂ ਕੋਈ ਮਦਦ ਨਹੀਂ ਮਿਲੀ।

"ਸਾਨੂੰ ਸੁਰੱਖਿਆ ਨਾਲ ਜੁੜੇ ਮਸਲੇ ਦਰਪੇਸ਼ ਆ ਰਹੇ ਹਨ। ਕਿਉਂਕਿ ਮੈਂ ਯੂਰਪੀ ਯੂਨੀਅਨ (ਈਯੂ) ਅਤੇ ਯੂਨਾਈਟਿਡ ਸਟੇਟਸ (ਯੂਐੱਸ) ਵੱਲੋਂ ਫੰਡਡ ਇੱਕ ਐਨਜੀਓ ਨਾਲ ਕੰਮ ਕੀਤਾ ਹੈ, ਮੈਨੂੰ ਤਾਲੀਬਾਨ ਵੱਲੋਂ ਜਾਨੋਂ ਮਾਰਨ ਦੀਆਂ ਧਮਕੀਆਂ ਮਿਲੀਆਂ। ਇਸ ਲਈ ਮੈਂ ਇੱਥੇ ਪੁੱਜਾ, ਕਿਉਂਕਿ ਸ਼ਰਾਰਥੀਆਂ ਨੂੰ ਵੀਜ਼ਾ ਦੇਣ ਦਾ ਵਾਅਦਾ ਕੀਤਾ ਗਿਆ ਸੀ ਪਰ ਸਾਨੂੰ ਕੋਈ ਸਾਫ਼ ਜਵਾਬ ਨਹੀਂ ਮਿਲ ਰਿਹਾ,"ਅਬਦੁੱਲਾ ਨੇ ਆਖਿਆ।

ਇਸੇ ਦਰਮਿਆਨ ਇੱਕ ਹੋਰ ਸ਼ਰਨਾਰਥੀ ਨੇ ਭਾਰਤੀ ਪ੍ਰਾਹੁਣਚਾਰੀ ਦੀ ਸ਼ਲਾਘਾ ਕੀਤੀ ਪਰ ਯੂਐਨਐਚਸੀਆਰ ਨੂੰ ਮਦਦ ਦੀ ਅਪੀਲ ਵੀ ਕੀਤੀ।

"ਭਾਰਤ ਨੇ ਸਾਡਾ ਹਮੇਸ਼ਾ ਖੁੱਲੀਆਂ ਬਾਂਹਵਾਂ ਨਾਲ ਸਵਾਗਤ ਕੀਤਾ ਹੈ। ਮੇਰੇ ਇੱਥੇ ਮਿੱਤਰ ਹਨ, ਜੋ ਮੇਰੀ ਮਦਦ ਲਈ ਤਿਆਰ ਹਨ। ਪਰ ਮੈਂ ਯੂਐਨਐਚਸੀਆਰ ਨੂੰ ਬੇਨਤੀ ਕਰਦਾ ਹਾਂ ਕਿ ਉਹ ਇਨ੍ਹਾਂ ਹਾਲਾਤ ਵਿੱਚ ਸਾਡੀ ਮਦਦ ਕਰੇ,"ਉਸਨੇ ਆਖਿਆ।

ਜ਼ਿਕਰਯੋਗ ਹੈ ਕਿ ਐਤਵਾਰ ਨੂੰ ਜਦੋਂ ਅਫ਼ਗ਼ਾਨੀ ਸਦਰ ਅਸ਼ਰਫ਼ ਗ਼ਨੀ ਮੁਲਕ ਛੱਡ ਕੇ ਭੱਜੇ ਹਨ ਅਤੇ ਤਾਲੀਬਾਨ ਨੇ ਕਬਜ਼ਾ ਕਰ ਲਿਆ ਹੈ, ਭਾਰਤ ਸਣੇ ਦੁਨੀਆ ਦੇ ਕਈ ਮੁਲਕਾਂ ਵਿੱਚ ਫਸੇ ਅਫ਼ਗ਼ਾਨੀ ਨਾਗਰਿਕਾਂ ਦਾ ਭਵਿੱਖ ਅਨਿਸ਼ਚਿਤ ਹੋ ਗਿਆ ਹੈ।

ਇਸੇ ਦਰਮਿਆਨ ਭਾਰਤ ਵੱਲੋਂ ਵੀ ਭਾਰਤ ਵਿੱਚ ਦਾਖਲ ਹੋਣ ਲਈ, ਵੀਜ਼ਾ ਦੇਣ ਦੀ ਕਾਰਵਾਈ ਤੇਜ਼ੀ ਨਾਲ ਕੀਤੇ ਜਾਣ ਦੇ ਇਰਾਦੇ ਨਾਲ ਆਪਣੇ ਵੀਜ਼ਾ ਪ੍ਰਬੰਧਾਂ ਦੀ ਸਮੀਖਿਆ ਕਰਕੇ, ਬਿਜਲਈ ਵੀਜ਼ਾ ਦੀ ਇੱਕ ਕਿਸਮ ਦੀ ਸ਼ੁਰੂਆਤ ਕੀਤੀ ਹੈ, ਜਿਸਨੂੰ 'ਈ-ਐਮਰਜੈਂਸੀ ਐਕਸ-ਮਿਸਲੇਨੀਅਸ ਵੀਜ਼ਾ ਆਖਿਆ ਗਿਆ ਹੈ।