ਕੈਨੇਡਾ ਅਤੇ ਅਮਰੀਕਾ ਤੋਂ ਬਾਅਦ ਹੁਣ ਪਾਕਿਸਤਾਨ ਨੇ ਵੀ ਲਗਾਏ ਭਾਰਤ ’ਤੇ ਟਾਰਗੇਟ ਕਿਲਿੰਗ ਦੇ ਦੋਸ਼

ਕੈਨੇਡਾ ਅਤੇ ਅਮਰੀਕਾ ਤੋਂ ਬਾਅਦ ਹੁਣ ਪਾਕਿਸਤਾਨ ਨੇ ਵੀ ਆਪਣੀ ਧਰਤੀ ’ਤੇ ਟਾਰਗੇਟ ਕਿਲਿੰਗ ਲਈ ਭਾਰਤ ’ਤੇ ਦੋਸ਼ ਲਗਾਏ ਹਨ।

ਪਾਕਿਸਤਾਨ ਦੇ ਵਿਦੇਸ਼ੀ ਸਕੱਤਰ ਮੁਹੰਮਦ ਸਾਇਰਸ ਸੱਜਾਦ ਕਾਜ਼ੀ ਨੇ ਵੀਰਵਾਰ ਨੂੰ ਪ੍ਰੈਸ ਕਾਨਫਰੰਸ ਕੀਤੀ ਅਤੇ ਦਾਅਵਾ ਕੀਤਾ ਕਿ ਸਾਡੀ ਜ਼ਮੀਨ ’ਤੇ ਦੋ ਪਾਕਿਸਤਾਨੀ ਨਾਗਰਿਕਾਂ ਦੇ ਕਤਲ ਅਤੇ ਭਾਰਤੀ ਏਜੰਟ ਵਿਚਕਾਰ ਸਬੰਧਾਂ ਦੇ ਪੁਖਤਾ ਸਬੂਤ ਹਨ। ਉਨ੍ਹਾਂ 2023 ਵਿਚ ਦੋ ਪਾਕਿਸਤਾਨੀਆਂ ਦੀ ਮੌਤ ਦਾ ਹਵਾਲਾ ਦਿੱਤਾ, ਜਿਨ੍ਹਾਂ ਦੀ ਪਛਾਣ ਸ਼ਾਹਿਦ ਲਤੀਫ ਅਤੇ ਮੁਹੰਮਦ ਰਿਆਜ਼ ਵਜੋਂ ਹੋਈ ਸੀ।

ਲਤੀਫ 2016 ਵਿਚ ਪੰਜਾਬ ਦੇ ਪਠਾਨਕੋਟ ਏਅਰ ਫੋਰਸ ਸਟੇਸ਼ਨ ’ਤੇ ਹਮਲੇ ਦਾ ਮਾਸਟਰਮਾਈਂਡ ਸੀ। ਉਥੇ ਹੀ, ਮੁਹੰਮਦ ਰਿਆਜ਼ ’ਤੇ ਕਸ਼ਮੀਰ ਵਿਚ ਪੰਜ ਭਾਰਤੀ ਫੌਜੀ ਜਵਾਨਾਂ ਦੀ ਹੱਤਿਆ ਦੀ ਸਾਜ਼ਿਸ਼ ਘੜਨ ਦੇ ਇਲਜ਼ਾਮ ਸਨ।

ਪ੍ਰੈੱਸ ਨੂੰ ਸੰਬੋਧਨ ਕਰਦਿਆਂ ਪਾਕਿਸਤਾਨ ਦੇ ਵਿਦੇਸ਼ੀ ਸਕੱਤਰ ਨੇ ਕਿਹਾ ਕਿ ਸ਼ਾਹਿਦ ਲਤੀਫ ਦੀ ਹੱਤਿਆ ਸਿਆਲਕੋਟ ਵਿਚ 11 ਅਕਤੂਬਰ 2023 ਅਤੇ ਮੁਹੰਮਦ ਰਿਆਜ਼ ਦੀ ਹੱਤਿਆ ਰਾਵਲਕੋਟ ਵਿਚ 8 ਸਤੰਬਰ 2023 ਨੂੰ ਹੋਈ ਸੀ। ਉਨ੍ਹਾਂ ਕਿਹਾ ਕਿ ਭਾਰਤੀ ਏਜੰਟ ਦੇ ਇਸ਼ਾਰੇ ’ਤੇ ਲੋਕਲ ਪੇਡ ਕਿੱਲਰ ਨੇ ਇਨ੍ਹਾਂ ਹੱਤਿਆਵਾਂ ਨੂੰ ਅੰਜ਼ਾਮ ਦਿੱਤਾ।