8.88C Vancouver 8.88C VancouverJul 14, 2021 10:36 AM -
ਦਿੱਲੀ ਦੇ ਆਲ ਇੰਡੀਆ ਇੰਸਟੀਚਿਊਟ ਆਫ਼ ਮੈਡੀਕਲ ਸਾਇੰਸਸ (ਏਮਸ) ਵੱਲੋਂ, ਕੋਵਿਡ-19 ਦੀ ਤੀਜੀ ਸੰਭਾਵਿਤ ਲਹਿਰ ਦੀ ਤਿਆਰੀ ਦੀਆਂ ਕੋਸ਼ਿਸ਼ਾਂ ਦੇ ਤਹਿਤ ਹਸਪਤਾਲ ਦੇ ਬਾਲ ਵਿਭਾਗ ਵਿੱਚ ਤਿੰਨ ਦਿਨਾਂ ਦਾ ਸਿਖਲਾਈ ਪ੍ਰੋਗਰਾਮ ਚੱਲ ਰਿਹਾ ਹੈ।
ਸੂਤਰਾਂ ਮੁਤਾਬਕ, ਇਹ ਰੋਟੇਸ਼ਨਲ ਸਿਖਲਾਈ ਪ੍ਰੋਗਰਾਮ 12 ਜੁਲਾਈ ਨੂੰ ਸ਼ੁਰੂ ਹੋਇਆ ਸੀ ਅਤੇ ਤਿੰਨ ਦਿਨਾਂ ਵਿੱਚ ਤਿੰਨ ਦਸਤਿਆਂ ਵਿੱਚ ਇਹ ਪੂਰਾ ਕੀਤਾ ਗਿਆ।
ਉਨ੍ਹਾਂ ਆਖਿਆ ਕਿ ਸਿਖਲਾਈ ਹਸਪਤਾਲ ਦੇ ਕੋਵਿਡ-19 ਵਿਭਾਗ ਦੇ ਸਾਰੇ ਵਾਰਡਾਂ ਦੀਆਂ ਨਰਸਾਂ ਨੂੰ ਦਿੱਤੀ ਜਾਵੇਗੀ।
ਇਹ ਪ੍ਰੋਗਰਾਮ ਏਮਸ ਦਿੱਲੀ ਕਾਲਜ ਆਫ਼ ਨਰਸਿੰਗ ਦੇ ਸਹਿਯੋਗ ਕੀਤਾ ਗਿਆ ਹੈ। ਇਸ ਸਾਲ ਦੀ ਸ਼ੁਰੂਆਤ ਵਿੱਚ, ਕੋਵਿਡ-19 ਦੀ ਦੂਜੀ ਭਿਆਨਕ ਲਹਿਰ ਦੌਰਾਨ, ਮੁਲਕ ਨੇ ਬੱਚਿਆਂ ਨੂੰ ਇਸ ਨਾਲ ਪ੍ਰਭਾਵਿਤ ਹੁੰਦਿਆਂ ਵੇਖਿਆ ਹੈ, ਜਿਨ੍ਹਾਂ ਵਿੱਚੋਂ ਕਈ ਗੰਭੀਰ ਰੂਪ ਨਾਲ ਪ੍ਰਭਾਵਿਤ ਹੋਏ ਸਨ।
ਹਸਪਤਾਲ ਦੇ ਬਾਲ ਵਿਭਾਗ ਵਿੱਚ ਵੀ ਬੱਚਿਆਂ ਵਿੱਚ ਕੋਵਿਡ-19 ਦੇ ਲੱਛਣ ਵੇਖੇ ਗਏ ਸਨ, ਖ਼ਾਸਕਰ ਐੱਮਆਈਐੱਸਸੀ (ਮਲਟੀਸਿਸਟਮ ਇਨਫਲੇਮੇਟਰੀ ਸਿੰਡਰੋਮ ਇਨ ਚਿਲਡਰਨ) ਵਿੱਚ, ਜਿਸ ਲਈ ਹਸਪਤਾਲਾਂ ਨੂੰ ਖ਼ਾਸ ਧਿਆਨ ਦੇਣ ਦੀ ਲੋੜ ਪਈ ਸੀ।
ਕੁਝ ਹਫ਼ਤੇ ਪਹਿਲਾਂ, ਡਬਲਿਊਐੱਚਓ ਅਤੇ ਏਮਸ ਵੱਲੋਂ ਕੀਤੇ ਗਏ ਸਾਂਝੇ ਸਰਵੇਖਣ ਵਿੱਚ ਇਹ ਵੇਖਿਆ ਗਿਆ ਕਿ 18 ਸਾਲਾਂ ਦੇ ਉਮਰ ਵਰਗ ਤੋਂ ਹੇਠਾਂ ਦੇ ਲੋਕਾਂ ਵਿਚ 55.7 ਫ਼ੀਸਦ ਅਤੇ 18 ਤੋਂ ਵੱਧ ਉਮਰ ਵਰਗ ਦੇ ਲੋਕਾਂ ਵਿੱਚ 63.5 ਫ਼ੀਸਦ ਸੈਰੋ-ਪ੍ਰੀਵੈਲੈਂਸ ਪਾਇਆ ਗਿਆ ਹੈ।
ਲੌਂਸੈੱਟ ਇੰਡੀਆ ਟਾਸਕ ਫੋਰਸ ਨੇ ਵੀ ਪਹਿਲਾਂ ਕੋਵਿਡ-19 ਦੀ ਤੀਜੀ ਸੰਭਾਵਿਤ ਲਹਿਰ ਦੇ ਬੱਚਿਆਂ 'ਤੇ ਪੈਣ ਵਾਲੇ ਪ੍ਰਭਾਵ ਤੋਂ ਪਹਿਲਾਂ, ਬਾਲ ਰੋਗ ਵਿਗਿਆਨੀਆਂ ਲਈ ਯੋਜਨਾ, ਪ੍ਰੋਟੋਕੋਲ ਅਤੇ ਨੀਤੀ ਹਦਾਇਤਾਂ ਦੀ ਇੱਕ ਸਲਾਹ ਜਾਰੀ ਕੀਤੀ ਸੀ।
ਬਾਲ ਰੋਗ ਵਿਗਿਆਨੀਆਂ ਦੀ ਇੰਡੀਅਨ ਅਕੈਡਮੀ ਦੇ ਗੰਭੀਰ ਦੇਖਭਾਲ ਚੈਪਟਰ ਵੱਲੋਂ ਵੀ 6,000 ਬਾਲ ਰੋਗ ਵਿਗਿਆਨੀਆਂ ਨੂੰ ਬੀਤੇ ਛੇ ਮਹੀਨਿਆਂ ਤੋਂ ਬਾਲਗ਼ਾਂ ਨੂੰ ਸਾਂਭਣ ਦੀ ਸਿਖਲਾਈ 'ਤੇ ਕੰਮ ਕੀਤਾ ਜਾ ਰਿਹਾ ਹੈ।
ਇਸਦੇ ਨਾਲ ਹੀ, ਬੀ-ਸ਼੍ਰੇਣੀ ਦੇ ਕਸਬਿਆਂ, ਸੀ-ਸ਼੍ਰੇਣੀ ਦੇ ਕਸਬਿਆਂ ਅਤੇ ਨਿੱਕੇ ਪਿੰਡਾਂ ਦੇ ਬਾਲ ਰੋਗ ਚਿਕਿਤਸਕਾਂ ਨੂੰ ਵੀ ਸਿਖਲਾਈ ਦਿੱਤੀ ਜਾ ਰਹੀ ਹੈ।
ਸਿਹਤ ਮਹਿਕਮੇ ਮੁਤਾਬਕ, ਬੀਤੇ 24 ਘੰਟਿਆਂ ਦੌਰਾਨ, ਭਾਰਤ ਵਿੱਚ ਕੋਵਿਡ-19 ਦੇ 38,792 ਨਵੇਂ ਮਾਮਲੇ, 41,000 ਸਿਹਤਯਾਬੀ ਦੇ ਮਾਮਲੇ ਅਤੇ 624 ਮੌਤਾਂ ਦੇ ਮਾਮਲੇ ਦਰਜ ਕੀਤੇ ਗਏ ਹਨ।
