ਏਅਰ ਕੈਨੇਡਾ ਨੇ ਫਲਾਈਟ ਅਟੈਂਡੈਂਟਾਂ ਦੀ ਹੋਣ ਵਾਲੀ ਹੜਤਾਲ ਦੇ ਮੱਦੇਨਜ਼ਰ ਉਡਾਣਾਂ ਨੂੰ ਸਸਪੈਂਡ ਕਰਨ ਦਾ ਕੀਤਾ ਐਲਾਨ

ਏਅਰ ਕੈਨੇਡਾ ਨੇ ਫਲਾਈਟ ਅਟੈਂਡੈਂਟਾਂ ਦੀ ਹੋਣ ਵਾਲੀ ਹੜਤਾਲ ਦੇ ਮੱਦੇਨਜ਼ਰ ਉਡਾਣਾਂ ਨੂੰ ਹੌਲੀ-ਹੌਲੀ ਸਸਪੈਂਡ ਕਰਨ ਦਾ ਐਲਾਨ ਕੀਤਾ ਹੈ। ਲਗਭਗ 10,000 ਫਲਾਈਟ ਅਟੈਂਡੈਂਟਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਨੇ ਸ਼ਨੀਵਾਰ ਨੂੰ ਹੜਤਾਲ ਕਰਨ ਲਈ ਏਅਰ ਕੈਨੇਡਾ ਨੂੰ ਨੋਟਿਸ ਦਿੱਤਾ ਹੈ,ਜਿਸ ਦੇ ਜਵਾਬ ਵਿਚ ਏਅਰਲਾਈਨ ਨੇ ਵੀ ਲੁਕ ਆਊਟ ਨੋਟਿਸ ਜਾਰੀ ਕੀਤਾ ਹੈ।

ਏਅਰਲਾਈਨ ਦਾ ਕਹਿਣਾ ਹੈ ਕਿ ਉਡਾਣਾਂ ਨੂੰ ਰੱਦ ਕਰਨ ਦਾ ਸਿਲਸਿਲਾ ਵੀਰਵਾਰ ਤੋਂ ਸ਼ੁਰੂ ਹੋਵੇਗਾ ਅਤੇ ਵੀਕੈਂਡ ਤੱਕ ਏਅਰ ਕੈਨੇਡਾ ਤੇ ਏਅਰ ਕੈਨੇਡਾ ਰੂਜ਼ ਦੀਆਂ ਉਡਾਣਾਂ ਨੂੰ ਪੂਰੀ ਤਰ੍ਹਾਂ ਰੋਕ ਦਿੱਤਾ ਜਾਵੇਗਾ। ਏਅਰ ਕੈਨੇਡਾ ਨੇ ਕਿਹਾ ਕਿ ਇਸ ਰੁਕਾਵਟ ਨਾਲ ਪ੍ਰਤੀ ਦਿਨ ਲਗਭਗ 130,000 ਯਾਤਰੀ ਪ੍ਰਭਾਵਿਤ ਹੋਣਗੇ। ਉਥੇ ਹੀ, ਮੰਨਿਆ ਜਾ ਰਿਹਾ ਹੈ ਕਿ ਜੇ ਲੰਮੇ ਸਮੇਂ ਤੱਕ ਇਹ ਸਥਿਤੀ ਜਾਰੀ ਰਹਿੰਦੀ ਹੈ ਤਾਂ ਏਅਰ ਕੈਨੇਡਾ ਦੇ ਵਿਰੋਧੀ ਕੈਰੀਅਰਜ਼ 'ਤੇ ਟਿਕਟਾਂ ਦੀਆਂ ਕੀਮਤਾਂ ਵੱਧ ਸਕਦੀਆਂ ਹਨ।

ਰਿਪੋਰਟਸ ਮੁਤਾਬਕ, ਏਅਰ ਕੈਨੇਡਾ ਨੇ 4 ਸਾਲਾਂ ਵਿਚ ਮੁਆਵਜ਼ੇ ਵਿਚ ਕੁੱਲ 38 ਫੀਸਦੀ ਵਾਧੇ ਦੀ ਪੇਸ਼ਕਸ਼ ਕੀਤੀ ਸੀ, ਯੂਨੀਅਨ ਨੇ ਇਸ ਨੂੰ ਮਹਿੰਗਾਈ ਤੇ ਘੱਟੋ-ਘੱਟ ਮਜ਼ਦੂਰੀ ਤੋਂ ਘੱਟ ਦੱਸਦੇ ਠੁਕਰਾ ਦਿੱਤਾ, ਨਾਲ ਹੀ ਏਅਰਲਾਈਨ ਦੇ ਆਰਬਿਟਰੇਸ਼ਨ ਪ੍ਰਸਤਾਵ ਨੂੰ ਵੀ ਰੱਦ ਕਰ ਦਿੱਤਾ।