19.01C Vancouver 19.01C VancouverMay 15, 2020 11:41 PM -
ਏਅਰ ਕੈਨੇਡਾ ਦੇ ਫਲਾਈਟ ਅਟੈਂਡੈਂਟਜ਼ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਦਾ ਕਹਿਣਾ ਹੈ ਕਿ ਏਅਰਲਾਈਨ ਵੱਲੋਂ ਆਪਣੇ ਕਰਮਚਾਰੀਆਂ ਨੂੰ ਘੱਟ ਘੰਟੇ ਕੰਮ ਕਰਨ, ਜਾਂ ਕੰਮ ਤੇ ਨਾ ਆਉਣ ਸੰਬੰਧੀ ਕਹਿਣ ਦੀ ਤਿਆਰੀ ਹੋ ਚੁੱਕੀ ਹੈ।
ਕਨੇਡੀਅਨ ਯੂਨੀਅਨ ਆਫ ਪਬਲਿਕ ਐਂਪਲਾਈਜ਼ (Canadian Union of Public Employees) ਵੱਲੋਂ ਮੈਂਬਰਾਂ ਨੂੰ ਪਹੁੰਚਾਏ ਗਏ ਇੱਕ ਇੰਟਰਨਲ ਬੁਲੇਟਿਨ 'ਚ ਜਾਣਕਾਰੀ ਦਿੱਤੀ ਗਈ ਹੈ ਕਿ ਏਅਰ ਕੈਨੇਡਾ ਆਪਣੇ ਵਰਕਰਾਂ ਨੂੰ ਘੰਟਿਆਂ 'ਚ ਤਬਦੀਲੀ, 2 ਸਾਲ ਤੱਕ ਦੀ ਛੁੱਟੀ, ਜਾਂ ਅਸਤੀਫੇ ਲਈ ਆਖਿਆ ਜਾ ਸਕਦਾ ਹੈ।
ਜਾਣਕਾਰੀ ਅਨੁਸਾਰ ਇਹ ਬੁਲੇਟਿਨ ਵੀਰਵਾਰ ਰਾਤ ਭੇਜਿਆ ਗਿਆ ਸੀ, ਅਤੇ CUPE ਵੱਲੋਂ ਏਅਰ ਕੈਨੇਡਾ ਨਾਲ ਗੱਲਬਾਤ ਕੀਤੀ ਜਾ ਰਹੀ ਹੈ ਕਿ ਫੈਡਰਲ ਵੇਜ ਸਬਸਿਡੀ ਪ੍ਰੋਗਰਾਮ ਦੀ ਮਦਦ ਲਈ ਜਾਵੇ।
ਏਅਰਲਾਈਨ ਵੱਲੋਂ ਇਸ ਪ੍ਰੋਗਰਾਮ ਨੂੰ 6 ਜੂਨ ਤੋਂ ਅੱਗੇ ਵਰਤੇ ਜਾਣ ਸੰਬੰਧੀ ਫੈਸਲਾ ਨਹੀਂ ਲਿਆ ਗਿਆ ਹੈ।
ਏਅਰ ਕੈਨੇਡਾ ਦਾ ਕਹਿਣਾ ਹੈ ਕਿ ਉਹ ਆਪਣਾ ਆਕਾਰ ਕਾਫੀ ਛੋਟਾ ਕਰਨ ਜਾ ਰਹੇ ਹਨ ਅਤੇ ਇਸ ਦੇ ਚਲਦਿਆਂ ਕੰਮ ਕਰਨ ਵਾਲਿਆਂ ਦੀ ਗਿਣਤੀ 'ਚ ਵੀ ਕਟੌਤੀ ਹੋਵੇਗੀ।
ਖਬਰਾਂ ਅਨੁਸਾਰ ਏਅਰ ਕੈਨੇਡਾ ਨੇ ਇਸ ਸੰਬੰਧੀ ਜਾਣਕਾਰੀ ਨਹੀਂ ਦਿੱਤੀ ਹੈ ਕਿ ਫੈਡਰਲ ਸਰਕਾਰ ਵੱਲੋਂ ਵਧਾਏ ਗਏ ਵੇਜ ਸਬਸਿਡੀ ਪ੍ਰੋਗਰਾਮ ਦਾ ਹੁਣ ਆਸਰਾ ਲਿਆ ਜਾਵੇਗਾ ਜਾਂ ਕੀਤਾ ਜਾ ਰਹੇ ਲੇਆਫ ਪੱਕੇ ਸਮਝੇ ਜਾਣ।
ਏਅਰ ਕੈਨੇਡਾ ਨੇ 5 ਹਫ਼ਤੇ ਪਹਿਲਾਂ ਐਲਾਨ ਕੀਤਾ ਸੀ ਕਿ 16,500 ਲੇਆਫ ਕੀਤੇ ਕਰਮਚਾਰੀਆਂ ਨੂੰ ਵਾਪਿਸ ਲਿਆਂਦਾ ਜਾਵੇਗਾ, ਜਿਸ ਦੇ ਵਿੱਚ 6,800 ਫਲਾਈਟ ਅਟੈਂਡੈਂਟ ਵੀ ਦੱਸੇ ਗਏ ਸਨ।
ਸਬਸਿਡੀ ਪ੍ਰੋਗਰਾਮ ਆਸਰੇ ਕਰਮਚਾਰੀਆਂ ਦੀਆਂ 75% ਤਨਖ਼ਾਹਾਂ ਕਵਰ ਕੀਤੀਆਂ ਜਾ ਰਹੀਆਂ ਹਨ, ਜਿਸ ਦੇ ਆਸਰੇ ਕਿਸੇ ਕਰਮਚਾਰੀ ਦੇ ਇੱਕ ਹਫ਼ਤੇ ਦੀ $847 ਤੱਕ ਦੀ ਤਨਖ਼ਾਹ ਦਿੱਤੀ ਜਾ ਰਹੀ ਹੈ।
ਕੋਵੀਡ-19 ਕਾਰਨ ਬਣੇ ਹਾਲਾਤਾਂ ਵਿਚਾਲੇ ਹਵਾਈ ਆਵਾਜਾਈ 'ਤੇ ਕਾਫੀ ਅਸਰ ਪਿਆ ਹੈ, ਅਤੇ ਏਅਰ ਕੈਨੇਡਾ ਦੇ 200 ਤੋਂ ਵਧੇਰੇ ਹਵਾਈ ਜਹਾਜ਼ ਉਡਾਣ ਨਹੀਂ ਭਰ ਰਹੇ ਹਨ।
