25.14C Vancouver 25.14C VancouverJun 30, 2025 3:40 PM - The Canadian Press
ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਕੰਜ਼ਰਵੇਟਿਵ ਲੀਡਰ ਪੀਅਰ ਪੌਲੀਐਵ ਨਾਲ ਸਬੰਧਤ ਜ਼ਿਮਨੀ ਚੋਣ ਨੂੰ ਹਰੀ ਝੰਡੀ ਦੇ ਦਿੱਤੀ ਹੈ। ਉਨ੍ਹਾਂ ਅੱਜ ਐਲਾਨ ਕੀਤਾ ਕਿ ਐਲਬਰਟਾ ਦੀ ਬੈਟਲ ਰਿਵਰ ਕਰੋਫੁੱਟ ਰਾਈਡਿੰਗ ਲਈ ਜ਼ਿਮਨੀ ਚੋਣ 18 ਅਗਸਤ ਨੂੰ ਹੋਵੇਗੀ। ਇਸ ਨਾਲ ਪੌਲੀਐਵ ਦੀ ਹਾਊਸ ਆਫ਼ ਕਾਮਨਜ਼ ਵਿਚ ਸੰਭਾਵੀ ਵਾਪਸੀ ਲਈ ਰਾਹ ਪੱਧਰਾ ਹੋ ਗਿਆ ਹੈ।
ਲਗਭਗ ਦੋ ਹਫ਼ਤੇ ਪਹਿਲਾਂ ਹੀ ਕੰਜ਼ਰਵੇਟਿਵ ਐਮਪੀ ਡੈਮੀਅਨ ਕੁਰੇਕ ਨੇ ਇਸ ਸੀਟ ਤੋਂ ਉਨ੍ਹਾਂ ਲਈ ਅਸਤੀਫਾ ਦਿੱਤਾ ਸੀ। ਡੈਮੀਅਨ 2019 ਤੋਂ ਇਸ ਸੀਟ ਦੀ ਨੁਮਾਇੰਦਗੀ ਕਰ ਰਹੇ ਸਨ। 28 ਅਪ੍ਰੈਲ ਨੂੰ ਹੋਈਆਂ ਫੈਡਰਲ ਚੋਣਾਂ ਵਿਚ ਉਨ੍ਹਾਂ ਇਹ ਸੀਟ ਲਿਬਰਲ ਉਮੀਦਵਾਰ ਤੋਂ 46,000 ਵੋਟਾਂ ਦੇ ਫਰਕ ਨਾਲ ਜਿੱਤੀ ਸੀ।
ਪੌਲੀਐਵ- ਔਟਵਾ ਖੇਤਰ ਦੀ ਆਪਣੀ ਰਾਈਡਿੰਗ ਹਾਰ ਗਏ ਸਨ ਅਤੇ ਪ੍ਰਧਾਨ ਮੰਤਰੀ ਕਾਰਨੀ ਨੇ ਪੱਤਰਕਾਰਾਂ ਨੂੰ ਕਿਹਾ ਸੀ ਕਿ ਉਹ ਪੌਲੀਐਵ ਦੇ ਦੁਬਾਰਾ ਐਮ.ਪੀ. ਬਣਨ ਦੇ ਮੌਕੇ ਵਿਚ ਦੇਰੀ ਨਹੀਂ ਕਰਨਗੇ ਅਤੇ ਜ਼ਿਮਨੀ ਚੋਣ ਦੀ ਬੇਨਤੀ ਆਉਂਦੇ ਸਾਰ ਹੀ ਇਸ ਨੂੰ ਮਨਜ਼ੂਰੀ ਦੇ ਦੇਣਗੇ। ਗੌਰਤਲਬ ਹੈ ਕਿ ਜਨਵਰੀ ਵਿਚ ਪੌਲੀਐਵ ਪਾਰਟੀ ਅੰਦਰ ਆਪਣੀ ਲੀਡਰਸ਼ਿਪ ਰਿਵਿਊ ਦਾ ਵੀ ਸਾਹਮਣਾ ਕਰਨ ਵਾਲੇ ਹਨ।
