ਐਲਬਰਟਾ ਦੇ ਇਕ ਹੋਰ ਮੰਤਰੀ ਨੇ ਕੈਬਨਿਟ ਤੋਂ ਦਿੱਤਾ ਅਸਤੀਫਾ

ਐਲਬਰਟਾ ਦੇ ਨਗਰਪਾਲਿਕਾ ਮਾਮਲੇ ਦੇ ਮੰਤਰੀ ਰਿਕ ਮੈਕਾਈਵਰ ਨੇ ਕੈਬਨਿਟ ਤੋਂ ਅਸਤੀਫਾ ਦੇ ਦਿੱਤਾ ਹੈ। ਮੰਨਿਆ ਜਾ ਰਿਹਾ ਹੈ ਕਿ ਉਹ ਹਾਊਸ ਸਪੀਕਰ ਦੀ ਖਾਲੀ ਹੋਈ ਸੀਟ ਹਾਸਿਲ ਕਰਨ ਦੀ ਕੋਸ਼ਿਸ਼ ਵਿਚ ਹਨ। ਸੂਬੇ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਅੱਜ ਉਨ੍ਹਾਂ ਦੇ ਅਸਤੀਫੇ ਦੀ ਘੋਸ਼ਣਾ ਕੀਤੀ। ਮੈਕਾਈਵਰ ਦੇ ਕੰਮ ਨੂੰ ਹੁਣ ਸੈਰ ਸਪਾਟਾ ਮੰਤਰੀ ਜੋਸਫ਼ ਸ਼ੋਅ ਦੇਖਣਗੇ। ਸਮਿਥ ਨੇ ਜਾਣਕਾਰੀ ਦਿੱਤੀ ਕਿ ਸ਼ੋਅ ਹੁਣ ਸੂਬੇ ਦੀਆਂ ਨਗਰ ਪਾਲਿਕਾਵਾਂ ਨੂੰ ਦੇਖਣਗੇ ਅਤੇ ਜੰਗਲੀ ਅੱਗ ਦੇ ਸੀਜ਼ਨ ਨਾਲ ਨਜਿੱਠਣ ਲਈ ਕੰਮ ਕਰਨਗੇ।

ਮੈਕਾਈਵਰ ਦੋ ਪ੍ਰੀਮੀਅਰਜ਼ ਨਾਲ ਨਗਰਪਾਲਿਕਾ ਦੇ ਮਾਮਲੇ ਮੰਤਰੀ ਵਜੋਂ ਕੰਮ ਕਰ ਚੁੱਕੇ ਹਨ। ਇਸ ਤੋਂ ਪਹਿਲਾਂ ਉਹ ਟ੍ਰਾਂਸਪੋਰਟੇਸ਼ਨ ਮੰਤਰੀ, ਇਨਫਰਾਸਟਕਚਰ ਮੰਤਰੀ ਅਤੇ ਨੌਕਰੀ ਮੰਤਰੀ ਵਜੋਂ ਸੇਵਾਵਾਂ ਨਿਭਾਅ ਚੁੱਕੇ ਹਨ।

ਉਹ ਪਹਿਲਾਂ 2012 ਵਿਚ ਵਿਧਾਨਸਭਾ ਮੈਂਬਰ ਚੁਣੇ ਗਏ ਸਨ ਅਤੇ ਕਰੀਬ ਇਕ ਦਹਾਕੇ ਤੱਕ ਕੈਲਗਰੀ ਤੋਂ ਕੌਂਸਲਰ ਰਹੇ ਹਨ। ਗੌਰਤਲਬ ਹੈ ਕਿ ਹਾਊਸ ਦੇ ਸਪੀਕਰ ਨੇਥਨ ਕੂਪਰ ਵਲੋਂ ਪਿਛਲੇ ਹਫਤੇ ਅਸਤੀਫਾ ਦੇਣ ਕਾਰਨ ਉਨ੍ਹਾਂ ਦਾ ਅਹੁਦਾ ਖਾਲੀ ਹੈ, ਜਿਸ ਲਈ ਅੱਜ ਵੋਟਿੰਗ ਹੋਣੀ ਹੈ।