ਐਲਬਰਟਾ ਦੇ ਡਾਕਟਰਾਂ ਅਤੇ ਵਿਰੋਧੀ ਧਿਰ ਨੇ ਕੋਵਿਡ ਲਈ ਪੇਸ਼ ਰਿਪੋਰਟ ਦੀ ਕੀਤੀ ਨਿੰਦਾ

ਐਲਬਰਟਾ ਦੇ ਡਾਕਟਰਾਂ ਅਤੇ ਵਿਰੋਧੀ ਧਿਰ ਐੱਨ.ਡੀ. ਪੀ. ਨੇ ਪ੍ਰੀਮੀਅਰ ਡੈਨੀਅਲ ਸਮਿਥ ਵਲੋਂ ਤਿਆਰ ਕੀਤੇ ਪੈਨਲ ਦੀ ਰਿਪੋਰਟ ਨੂੰ ਲੈ ਕੇ ਚਿੰਤਾ ਜਤਾਈ ਹੈ, ਜਿਸ ਨੇ ਕੋਵਿਡ-19 ਦੇ ਟੀਕਿਆਂ ਨੂੰ ਗੈਰ-ਜ਼ਰੂਰੀ ਦੱਸਿਆ ਹੈ।

ਐਲਬਰਟਾ ਮੈਡੀਕਲ ਐਸੋਸੀਏਸ਼ਨ ਦੀ ਹੈੱਡ ਡਾ. ਸ਼ੈਲੀ ਡੱਗਨ ਨੇ ਕਿਹਾ ਕਿ ਰਿਪੋਰਟ ਇਹ ਦੱਸ ਰਹੀ ਹੈ ਕਿ ਲੋਕਾਂ ਦੀ ਸਿਹਤ ਨੂੰ ਬਚਾਉਣ ਲਈ ਜੋ ਵੀ ਪ੍ਰਬੰਧ ਕੀਤੇ ਗਏ ਸਨ, ਗੈਰ-ਜ਼ਰੂਰੀ ਸਨ। ਇਸ ਤਰ੍ਹਾਂ ਲੋਕਾਂ ਦਾ ਮੈਡੀਕਲ ਇਲ਼ਾਜ ਤੋਂ ਭਰੋਸਾ ਉੱਠ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸਪੱਸ਼ਟ ਰੂਪ ਵਿਚ ਇਹ ਰਿਪੋਰਟ ਸਾਇੰਸ ਵਿਰੋਧੀ ਅਤੇ ਸਬੂਤਾਂ ਦੀ ਵਿਰੋਧੀ ਹੈ। ਇਸ ਰਿਪੋਰਟ ਨਾਲ ਲੋਕਾਂ ਨੂੰ ਗਲਤ ਜਾਣਕਾਰੀ ਦਿੱਤੀ ਜਾ ਰਹੀ ਹੈ। ਇਸ ਤਰ੍ਹਾਂ ਇੰਟਰਨੈਸ਼ਨਲ ਵਿਗਿਆਨਕ ਸਾਂਝ ਨੂੰ ਗਲਤ ਠਹਿਰਾਇਆ ਗਿਆ ਹੈ।

ਉਨ੍ਹਾਂ ਕਿਹਾ ਕਿ $2-million ਦੇ ਖਰਚ ਨਾਲ ਜੋ ਇਹ ਰਿਪੋਰਟ ਤਿਆਰ ਕੀਤੀ ਗਈ ਹੈ, ਇਸ ਫੰਡ ਨਾਲ ਤਾਂ ਕਈ ਹਸਪਤਾਲਾਂ ਨੂੰ ਬੈੱਡ ਅਤੇ ਹੋਰ ਮੈਡੀਕਲ ਸਮਾਨ ਮੁਹੱਈਆ ਕਰਵਾਇਆ ਜਾ ਸਕਦਾ ਸੀ। ਦੱਸ ਦੇਈਏ ਕਿ ਪ੍ਰੀਮੀਅਰ ਸਮਿਥ ਨੇ 2022 ਵਿਚ ਲੀਡਰਸ਼ਿਪ ਵੋਟ ਜਿੱਤਣ ਮਗਰੋਂ ਵਾਅਦਾ ਕੀਤਾ ਸੀ ਕਿ ਉਹ ਕੋਰੋਨਾ ਦੌਰਾਨ ਵਰਤੇ ਗਏ ਵੈਕਸੀਨ ਨੂੰ ਜ਼ਰੂਰੀ ਕਰਨ ਵਰਗੇ ਸਖਤ ਨਿਯਮਾਂ ਦੀ ਜਾਂਚ ਕਰਵਾਉਣਗੇ। ਇਸੇ ਲਈ ਇਹ ਜਾਂਚ ਕਰਵਾਈ ਗਈ ਹੈ ਅਤੇ ਸਰਕਾਰ ਨੂੰ ਵਿਰੋਧੀ ਧਿਰ ਅਤੇ ਡਾਕਟਰਾਂ ਨੇ ਘੇਰਿਆ ਹੈ। 269 ਪੰਨਿਆਂ ਦੀ ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਸਰਕਾਰ ਬੱਚਿਆਂ ਅਤੇ ਟੀਨਏਜਰਜ਼ ਨੂੰ ਇਹ ਟੀਕੇ ਲਗਵਾਉਣ ਲਈ ਮਜਬੂਰ ਨਾ ਕਰੇ ਕਿਉਂਕਿ ਇਹ ਸਿਹਤ ਲਈ ਖਤਰਨਾਕ ਹਨ।