ਐਲਬਰਟਾ ਦੇ ਸਿੱਖਿਆ ਮੰਤਰੀ ਸਕੂਲ ਲਾਇਬਰੇਰੀ ਕਿਤਾਬਾਂ ਲਈ ਨਵੇਂ ਨਿਯਮਾਂ ਬਾਰੇ ਦੇਣਗੇ ਅਪਡੇਟ

ਐਲਬਰਟਾ ਦੇ ਸਿੱਖਿਆ ਮੰਤਰੀ ਡੀਮੇਟ੍ਰੀਓਸ ਨਿਕੋਲਾਈਡਸ ਸਕੂਲ ਲਾਇਬਰੇਰੀ ਕਿਤਾਬਾਂ ਲਈ ਨਿਰਧਾਰਤ ਕੀਤੇ ਨਵੇਂ ਸੂਬਾਈ ਮਿਆਰ ਬਾਰੇ ਅਪਡੇਟ ਦੇਣਗੇ।

ਜਿਕਰਯੋਗ ਹੈ ਕਿ ਡੀਮੇਟ੍ਰੀਓਸ ਨਿਕੋਲਾਈਡਸ ਨੇ ਮਈ ਮਹੀਨੇ ਵਿੱਚ ਐਲਾਨ ਕੀਤਾ ਸੀ ਕਿ ਕਿਤਾਬਾਂ ਲਈ ਨਵੇਂ ਮਿਆਰ ਨਿਰਧਾਰਤ ਕੀਤੇ ਜਾਣਗੇ। ਉਹਨਾਂ ਇਹ ਵੀ ਦੱਸਿਆ ਸੀ ਕਿ ਉਹਨਾਂ ਦੇ ਮੰਤਰਾਲੇ ਨੂੰ ਇਹ ਵਿਚਾਰ ਐਡਮਿੰਟਨ ਅਤੇ ਕੈਲਗਰੀ ਦੇ ਸਕੂਲ ਲਾਇਬ੍ਰੇਰੀਆਂ ਵਿੱਚ ਆਏ ਚਾਰ ਗ੍ਰਾਫਿਕਸ ਨਾਵਲਾਂ ਬਾਰੇ ਜਾਨਣ ਤੋਂ ਬਾਅਦ ਆਇਆ।

ਇਹਨਾਂ ਕਿਤਾਬਾਂ ਵਿੱਚ ਅਣਉੱਚਿਤ ਸਮੱਗਰੀ ਜਿਵੇਂ ਕਿ ਜਿਨਸੀ ਗ੍ਰਾਫਿਕ ਦੇ ਨਾਲ-ਨਾਲ ਨਸ਼ੇ ਅਤੇ ਸ਼ਰਾਬ ਦੀ ਵਰਤੋਂ ਦਾ ਚਿਤਰਣ ਸ਼ਾਮਲ ਸੀ। ਡੀਮੇਟ੍ਰੀਓਸ ਨਿਕੋਲਾਈਡਸ ਵੱਲੋਂ ਕੀਤੇ ਗਏ ਐਲਾਨ ਤੋਂ ਬਾਅਦ ਇਸ ਸੰਬੰਧੀ ਇੱਕ ਸਰਕਾਰੀ ਸਰਵੇ ਵੀ ਕੀਤਾ ਗਿਆ, ਜਿਸ ਵਿੱਚ ਬਹੁ ਗਿਣਤੀ ਲੋਕਾਂ ਨੇ ਕਿਤਾਬਾਂ ਲਈ ਨਵੇਂ ਮਿਆਰ ਨਿਰਧਾਰਤ ਕਰਨ ਦਾ ਸਮਰਥਨ ਨਹੀਂ ਕੀਤਾ। ਕੁਝ ਆਲੋਚਕਾਂ ਨੇ ਇਸ ਮਸਲੇ ਵਿੱਚ ਸਰਕਾਰ ਨੂੰ ਵਿਦਿਆਰਥੀਆਂ ਦੀ ਭਲਾਈ ਪ੍ਰਤੀ ਘੱਟ ਅਤੇ ਸੱਭਿਆਚਾਰ-ਯੁੱਧ ਦੀ ਰਾਜਨੀਤੀ ਪ੍ਰਤੀ ਵਧੇਰੇ ਚਿੰਤਤ ਦੱਸਿਆ ਹੈ।