ਐਲਬਰਟਾ ਸਰਕਾਰ ਨੇ ਲੌਂਗ ਟਰਮ ਕੇਅਰ ਵਿਭਾਗ ਨੂੰ ਸੀਨੀਅਰਜ਼ ਮੰਤਰਾਲੇ 'ਚ ਬਦਲਿਆ

ਅਲਬਰਟਾ ਸਰਕਾਰ ਨੇ ਐਲਾਨ ਕੀਤਾ ਹੈ ਕਿ ਲੰਬੇ ਸਮੇਂ ਦੀ ਦੇਖਭਾਲ ਅਤੇ ਸਹਾਇਕ ਰਹਾਇਸ਼ ਪ੍ਰੋਗਰਾਮਾਂ ਨੂੰ ਹੁਣ ਸੂਬੇ ਦੇ ਸਿਹਤ ਮੰਤਰਾਲੇ ਤੋਂ ਹਟਾ ਕੇ ਸੀਨੀਅਰ ਅਤੇ ਸਮਾਜਿਕ ਸੇਵਾਵਾਂ ਮੰਤਰਾਲੇ ਦੇ ਹਵਾਲੇ ਕੀਤਾ ਜਾਵੇਗਾ।

ਇਸ ਬਦਲਾਅ ਨਾਲ ਮੰਤਰੀ ਜੇਸਨ ਨਿਕਸਨ ਹੁਣ ਕੰਟੀਨਿਊਇੰਗ ਕੇਅਰ ਪ੍ਰੋਗਰਾਮਾਂ ਦੀ ਜ਼ਿੰਮੇਵਾਰੀ ਸੰਭਾਲਣਗੇ। ਇਹ ਕਦਮ ਅਲਬਰਟਾ ਹੈਲਥ ਸਰਵਿਸਜ਼ (AHS) ਦੇ ਚਾਰ ਨਵੀਆਂ ਏਜੰਸੀਜ਼ ਵਿਚ ਵੰਡੇ ਜਾਣ ਦੇ ਵੱਡੇ ਸੁਧਾਰ ਦਾ ਹਿੱਸਾ ਹੈ। ਉਨ੍ਹਾਂ ਵਿਚੋਂ ਇਕ ਏਜੰਸੀ ਸੀਨੀਅਰਾਂ ਅਤੇ ਲੰਬੇ ਸਮੇਂ ਦੀ ਦੇਖਭਾਲ ਲਈ ਸਮਰਪਿਤ ਹੋਵੇਗੀ।

ਮੰਤਰੀ ਜੇਸਨ ਨਿਕਸਨ ਨੇ ਕਿਹਾ ਕਿ ਨਵੀਂ ਏਜੰਸੀ ਦਾ ਨਾਂ, ਮਕਸਦ ਅਤੇ ਸ਼ੁਰੂਆਤ ਦੀ ਤਰੀਕ ਅਜੇ ਤੱਕ ਤੈਅ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ, “ਇਹ ਬਦਲਾਅ ਅਲਬਰਟਾ ਦੇ ਸੀਨੀਅਰਾਂ ਨੂੰ ਉਹ ਧਿਆਨ ਤੇ ਸੇਵਾਵਾਂ ਪ੍ਰਦਾਨ ਕਰੇਗਾ, ਜਿਨ੍ਹਾਂ ਦੇ ਉਹ ਹੱਕਦਾਰ ਹਨ।”

ਇਸ ਹਫ਼ਤੇ ਸਿਹਤ ਮੰਤਰੀ ਐਡਰੀਆਨਾ ਲਾਗ੍ਰੈਂਜ ਨੇ ਪ੍ਰਾਈਮਰੀ ਕੇਅਰ ਅਲਬਰਟਾ ਦੀ ਸਥਾਪਨਾ ਦਾ ਐਲਾਨ ਕੀਤਾ ਸੀ, ਜੋ ਹੁਣ ਪਰਿਵਾਰਕ ਡਾਕਟਰਾਂ ਅਤੇ ਨਰਸ ਪ੍ਰੈਕਟੀਸ਼ਨਰਾਂ ਦੀ ਦੇਖਭਾਲ ਕਰੇਗੀ। ਇਸ ਤੋਂ ਪਹਿਲਾਂ ਰੀਕਵਰੀ ਅਲਬਰਟਾ ਏਜੰਸੀ ਨੇ ਮਾਨਸਿਕ ਸਿਹਤ ਅਤੇ ਨਸ਼ਾ ਮੁਕਤੀ ਪ੍ਰੋਗਰਾਮਾਂ ਦੀ ਜ਼ਿੰਮੇਵਾਰੀ ਸੰਭਾਲੀ ਸੀ।

ਇਹ ਸੁਧਾਰ ਪਿਛਲੇ ਕਈ ਦਹਾਕਿਆਂ ਵਿਚ ਅਲਬਰਟਾ ਦੀ ਸਿਹਤ ਪ੍ਰਣਾਲੀ ਵਿਚ ਸਭ ਤੋਂ ਵੱਡਾ ਪ੍ਰਸ਼ਾਸਕੀ ਬਦਲਾਅ ਮੰਨਿਆ ਜਾ ਰਿਹਾ ਹੈ। ਸਰਕਾਰ ਦਾ ਦਾਅਵਾ ਹੈ ਕਿ ਇਸ ਨਾਲ ਰੋਗੀਆਂ ਨੂੰ ਤੇਜ਼ ਸੇਵਾਵਾਂ ਅਤੇ ਘੱਟ ਦਫ਼ਤਰੀ ਜਟਿਲਤਾਵਾਂ ਦਾ ਲਾਭ ਮਿਲੇਗਾ। ਹਾਲਾਂਕਿ ਸਿਹਤ ਵਿਸ਼ਲੇਸ਼ਕਾਂ ਅਤੇ ਸੀਨੀਅਰ ਸੰਸਥਾਵਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਇਸ ਬਦਲਾਅ ਨੂੰ ਸਾਵਧਾਨੀ ਨਾਲ ਲਾਗੂ ਕਰਨ ਦੀ ਲੋੜ ਹੈ, ਤਾਂ ਜੋ ਐਡਮੰਟਨ, ਕੈਲਗਰੀ ਅਤੇ ਰੈੱਡ ਡੀਅਰ ਵਰਗੇ ਸ਼ਹਿਰਾਂ ਵਿਚ ਸੀਨੀਅਰਾਂ ਦੀ ਦੇਖਭਾਲ ਵਿਚ ਰੁਕਾਵਟ ਨਾ ਪਏ।