ਐਲਬਰਟਾ ਸਰਕਾਰ ਹੜਤਾਲ ਕਰ ਰਹੇ ਅਧਿਆਪਕਾਂ ਨੂੰ ਕੰਮ 'ਤੇ ਵਾਪਸ ਬੁਲਾਉਣ ਲਈ ਕਾਨੂੰਨ ਲਿਆਉਣ ਦੀ ਤਿਆਰੀ ਵਿੱਚ

ਐਲਬਰਟਾ ਦੀਆਂ ਯੂਨੀਅਨ ਨੇ ਸੂਬਾ ਸਰਕਾਰ ਨੂੰ ਬੈਕ-ਟੂ-ਵਰਕ ਕਾਨੂੰਨ ਵਿਚ notwithstanding clause ਦੀ ਵਰਤੋਂ ਨਾ ਕਰਨ ਦੀ ਅਪੀਲ ਕੀਤੀ ਹੈ। ਯੂਨੀਅਨ ਲੀਡਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਜੇ ਸਰਕਾਰ ਇਸ ਧਾਰਾ ਦੀ ਵਰਤੋਂ ਕਰਦੀ ਹੈ,ਜੋ ਕਿ ਕੈਨੇਡਾ ਦੇ ਚਾਰਟਰ ਔਫ ਰਾਈਟਸ ਐਂਡ ਫਰੀਡਮ ਦੇ ਕੁਝ ਹਿੱਸਿਆਂ ਨੂੰ ਓਵਰਰਾਈਡ ਕਰ ਸਕਦੀ ਹੈ,ਤਾਂ ਇਸ ਨਾਲ ਵੱਡਾ ਲੇਬਰ ਰਿਸਪੌਂਸ ਹੋ ਸਕਦਾ ਹੈ।

ਪ੍ਰੀਮੀਅਰ ਡੈਨੀਅਲ ਸਮਿਥ ਦੀ ਸਰਕਾਰ ਅੱਜ ਇਹ ਕਾਨੂੰਨ ਪੇਸ਼ ਕਰਨ ਵਾਲੀ ਹੈ ਤਾਂ ਜੋ 51,000 ਤੋਂ ਵੱਧ ਟੀਚਰਜ਼ ਦੀ ਹੜਤਾਲ ਖਤਮ ਕੀਤੀ ਜਾ ਸਕੇ। ਟੀਚਰਜ਼ ਦੀ ਹੜਤਾਲ 6 ਅਕਤੂਬਰ,2025 ਨੂੰ ਸ਼ੁਰੂ ਹੋਈ ਸੀ। ਇਸ ਨਾਲ ਸੂਬੇ ਦੇ ਲਗਭਗ 750,000 ਵਿਦਿਆਰਥੀ ਪ੍ਰਭਾਵਿਤ ਹੋਏ ਹਨ।

ਸਮਿਥ ਦਾ ਕਹਿਣਾ ਸੀ ਇਹ ਕਾਨੂੰਨ ਟੈਕਸਪੇਅਰਜ਼, ਮਾਪਿਆਂ ਅਤੇ ਵਿਦਿਆਰਥੀਆਂ ਦੇ ਹੱਕਾਂ ਨੂੰ ਬੈਲੇਂਸ ਕਰਨ ਅਤੇ ਬੱਚਿਆਂ ਨੂੰ ਕਲਾਸਰੂਮ ਵਿੱਚ ਵਾਪਸ ਲਿਆਉਣ ਲਈ ਜ਼ਰੂਰੀ ਹੈ। ਐਲਬਰਟਾ ਟੀਚਰਜ਼ ਐਸੋਸੀਏਸ਼ਨ ਦੇ ਪ੍ਰਧਾਨ ਜੇਸਨ ਸ਼ਿਲਿੰਗ ਨੇ ਕਿਹਾ ਕਿ ਇਸ notwithstanding clause ਦੀ ਵਰਤੋਂ ਕਰਨ ਨਾਲ ਦੂਜੀਆਂ ਯੂਨੀਅਨ 'ਤੇ ਵੀ ਅਸਰ ਪਵੇਗਾ ਅਤੇ ਸਾਰੇ ਐਲਬਰਟਾ ਵਾਸੀਆਂ ਨੂੰ ਇਸ ਬਾਰੇ ਚਿੰਤਤ ਹੋਣਾ ਚਾਹੀਦਾ ਹੈ।