ਐਲਬਰਟਾ ਦੇ ਵਿਅਕਤੀ ਨੇ ਟਰੰਪ ਨੂੰ ਕੈਨੇਡਾ ਤੋਂ ਬਾਹਰ ਰੱਖਣ ਲਈ ਸੰਸਦੀ ਪਟੀਸ਼ਨ ਕੀਤੀ ਦਰਜ

ਐਲਬਰਟਾ ਦੇ ਇਕ ਵਿਅਕਤੀ ਨੇ ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਲਡ ਟਰੰਪ ਨੂੰ ਕੈਨੇਡਾ ਤੋਂ ਦੂਰ ਰੱਖਣ ਲਈ ਪਟੀਸ਼ਨ ਦਰਜ ਕੀਤੀ ਹੈ। ਇਸ ’ਤੇ 28,000 ਲੋਕਾਂ ਨੇ ਦਸਤਖ਼ਤ ਕੀਤੇ ਹਨ ਤਾਂ ਕਿ ਔਟਵਾ ਟਰੰਪ ਨੂੰ ਬਾਹਰ ਰੱਖੇ ਕਿਉਂਕਿ ਇਸ ਨੇ ਕੈਨੇਡਾ ਦੀ ਪ੍ਰਭੂਸੱਤਾ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ ਹੈ।

ਐਲਬਰਟਾ ਦੇ ਰਹਿਣ ਵਾਲੇ ਜੈਰਾਰਡ ਐਲਡਰਿਜ ਨੇ ਇਲੈਕਟਰੋਨਿਕ ਪਟੀਸ਼ਨ ਦਾਇਰ ਕੀਤੀ ਅਤੇ ਕਿਹਾ ਕਿ ਉਹ ਕੈਨੇਡੀਅਨ ਹੋਣ ਦਾ ਮਾਣ ਕਰਦਾ ਹੈ ਅਤੇ ਬਦਲਾਅ ਲਿਆਉਣਾ ਚਾਹੁੰਦਾ ਹੈ।

ਗੌਰਤਲਬ ਹੈ ਕਿ ਟਰੰਪ ਨੇ ਕੈਨੇਡੀਅਨ ਉਤਪਾਦਾਂ ’ਤੇ ਟੈਰਿਫ ਲਾਉਣ ਦੀ ਧਮਕੀ ਦਿੱਤੀ ਹੈ ਅਤੇ ਉਹ ਕੈਨੇਡਾ ਨੂੰ ਅਮਰੀਕਾ ਦਾ ਸੂਬਾ ਬਣਾਉਣ ਦਾ ਬਿਆਨ ਵੀ ਦੇ ਚੁੱਕੇ ਹਨ।

ਟਰੰਪ ਜੀ 7 ਦੇ ਨੇਤਾਵਾਂ ਦੀ ਸਲਾਨਾ ਬੈਠਕ ਵਿਚ ਹਿੱਸਾ ਲੈਂਦੇ ਹਨ ਅਤੇ ਇਹ ਇਸ ਵਾਰ ਜੂਨ ਮਹੀਨੇ ਐਲਬਰਟਾ ਦੇ ਕਨਨਾਸਕਿਸ ਵਿਚ ਹੋਣ ਵਾਲੀ ਹੈ। ਐਲਡਰਿਜ ਦੀ ਪਟੀਸ਼ਨ ਨਿਊ ਡੈਮੋਕਰੇਟ ਐਮਪੀ ਚਾਰਲੀ ਐਂਗਸ ਵਲੋਂ ਆਯੋਜਿਤ ਕੀਤੀ ਗਈ ਹੈ, ਜੋ ਕਿ ਟਰੰਪ ਦੇ ਆਲੋਚਕ ਹਨ।