ਐਲਬਰਟਾ ਦੀ ਨਰਸ ਯੂਨੀਅਨ ਅਤੇ ਹੈਲਥ ਏਜੰਸੀਆਂ ਵਿਚਕਾਰ ਹੋਇਆ ਅਸਥਾਈ ਸਮਝੌਤਾ

ਐਲਬਰਟਾ ਵਿਚ ਕਰੀਬ 30,000 ਨਰਸਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਅਤੇ ਸੂਬੇ ਦੀਆਂ ਹੈਲਥ ਏਜੰਸੀਆਂ ਵਿਚਕਾਰ ਅਸਥਾਈ ਸਮਝੌਤਾ ਹੋ ਗਿਆ ਹੈ। ਯੂਨਾਈਟਿਡ ਨਰਸ ਆਫ਼ ਐਲਬਰਟਾ ਨੇ ਘੋਸ਼ਣਾ ਕੀਤੀ ਕਿ ਯੂਨੀਅਨ ਅਤੇ ਐਲਬਰਟਾ ਹੈਲਥ ਸਰਵਿਸਸ, ਰਿਕਵਰੀ ਐਲਬਰਟਾ, ਪ੍ਰਾਈਮਰੀ ਕੇਅਰ ਐਲਬਰਟਾ, ਕੋਵੈਂਟ ਹੈਲਥ, ਲੈਮੋਂਟ ਹੈਲਥ ਕੇਅਰ ਸੈਂਟਰ, ਅਤੇ ਬੈਥਨੀ ਗਰੁੱਪ ਵਿਚਕਾਰ ਗੱਲ ਸਿਰੇ ਚੜ੍ਹੀ ਹੈ।

4 ਸਾਲ ਦੇ ਸਮੂਹਿਕ ਸਮਝੌਤੇ ਤਹਿਤ ਤਨਖ਼ਾਹਾਂ ਵਧਾਉਣ ਦਾ ਵਾਅਦਾ ਕੀਤਾ ਗਿਆ ਹੈ। ਰਜਿਸਟਰਡ ਨਰਸਾਂ ਅਤੇ ਰਜਿਸਟਰਡ ਮਨੋਵਿਗਿਆਨਕ ਨਰਸਾਂ ਦੀ 15 ਫੀਸਦੀ ਤਨਖ਼ਾਹ ਹੁਣੇ ਵਧਾਈ ਜਾਵੇਗੀ ਅਤੇ ਕੁੱਲ 20 ਫੀਸਦੀ ਵਾਧਾ ਕੀਤਾ ਜਾਣਾ ਹੈ। ਇਸ ਦੇ ਇਲਾਵਾ ਆਨ-ਕਾਲ ਤਨਖਾਹ, ਕਾਰ ਦੇ ਭੱਤੇ ਅਤੇ ਬੀਮਾ ਫੀਸ ਵਿਚ ਵੀ ਬਦਲਾਅ ਕੀਤਾ ਗਿਆ ਹੈ।

ਸਮਝੌਤੇ ਨੂੰ ਔਫੀਸ਼ੀਅਲ ਕਰਨ ਤੋਂ ਪਹਿਲਾਂ 2 ਅਪ੍ਰੈਲ ਨੂੰ ਯੂਨੀਅਨ ਦੇ ਔਫੀਸ਼ੀਅਲਜ਼ ਅਤੇ ਮੈਂਬਰ ਵੋਟਿੰਗ ਕਰ ਸਕਦੇ ਹਨ। ਵਿੱਤ ਮੰਤਰੀ ਨੇਟ ਹੌਰਨਰ ਨੇ ਸਮਝੌਤੇ ਲਈ ਯੂਨਾਈਟਿਡ ਨਰਸ ਆਫ਼ ਐਲਬਰਟਾ ਅਤੇ ਐਲਬਰਟਾ ਹੈਲਥ ਸਰਵਿਸਸ ਦਾ ਧੰਨਵਾਦ ਕੀਤਾ ਹੈ।