14.68C Vancouver 14.68C VancouverJan 30, 2025 2:00 PM - The Canadian Press
ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਦਾ ਕਹਿਣਾ ਹੈ ਕਿ ਕੋਵਿਡ-19 ਸਬੰਧੀ ਜੋ ਰਿਪੋਰਟ ਸਾਹਮਣੇ ਆਈ ਹੈ,ਉਹ ਉਸ ਦਾ ਸਮਰਥਨ ਕਰਦੀ ਹੈ। ਹਾਲਾਂਕਿ ਉਨ੍ਹਾਂ ਕਿਹਾ ਕਿ ਪੈਨਲ ਵਲੋਂ ਕੀਤੀਆਂ ਸਿਫਾਰਿਸ਼ਾਂ ਨੂੰ ਸਰਕਾਰ ਮੰਨੇਗੀ ਜਾਂ ਨਹੀਂ,ਇਸ ਦੀ ਪੁਸ਼ਟੀ ਨਹੀਂ ਕੀਤੀ ਜਾ ਸਕਦੀ। 269 ਪੰਨ੍ਹਿਆਂ ਦੀ ਰਿਪੋਰਟ ਬਿਨਾਂ ਨੋਟਿਸ ਦੇ ਸ਼ੁੱਕਰਵਾਰ ਜਾਰੀ ਕੀਤੀ ਗਈ ਜਿਸ ਵਿਚ ਕੋਵਿਡ-19 ਵੈਕਸੀਨ ਬੰਦ ਕਰਨ ਲਈ ਸਿਫਾਰਿਸ਼ ਕੀਤੀ ਗਈ। ਡਾਕਟਰਾਂ ਵਲੋਂ $2-ਮਿਲੀਅਨ ਦੇ ਖਰਚ ਨਾਲ ਤਿਆਰ ਕੀਤੀ ਰਿਪੋਰਟ ਦੀ ਆਲੋਚਨਾ ਕੀਤੀ ਜਾ ਰਹੀ ਹੈ ਅਤੇ ਵਿਰੋਧੀ ਧਿਰ ਐਨ.ਡੀ.ਪੀ.ਨੇ ਵੀ ਸੂਬਾ ਸਰਕਾਰ ਨੂੰ ਘੇਰਿਆ ਹੈ।
ਬੁੱਧਵਾਰ ਰਿਪੋਰਟਰਜ਼ ਨਾਲ ਗੱਲ ਕਰਦਿਆਂ ਸਮਿਥ ਨੇ ਕਿਹਾ ਕਿ ਉਹ ਹਰ ਆਵਾਜ਼ ਨੂੰ ਸੁਣ ਰਹੇ ਹਨ ਅਤੇ ਸਬੂਤ ਦੇਖ ਰਹੇ ਹਨ। ਸਮਿਥ ਨੇ ਸਿਹਤਮੰਦ ਬੱਚਿਆਂ ਅਤੇ ਟੀਨਏਜਰਜ਼ ਨੂੰ ਕੋਵਿਡ ਟੀਕੇ ਨਾ ਲਾਉਣ ਦੀ ਗੱਲ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਉਹ ਇਸ 'ਤੇ ਵਿਚਾਰ ਕਰ ਰਹੇ ਹਨ ਪਰ ਉਨ੍ਹਾਂ ਦਾ ਕੋਈ ਏਜੰਡਾ ਨਹੀਂ ਹੈ ਕਿ ਉਹ ਕੀ ਲਾਗੂ ਕਰਨਗੇ।
ਰਿਪੋਰਟ ਜਾਰੀ ਕਰਨ ਵਾਲੇ ਪੈਨਲ ਨੂੰ 2022 ਵਿਚ ਤਿਆਰ ਕੀਤਾ ਗਿਆ ਸੀ। ਇਸ ਰਿਪੋਰਟ ਵਿਚ ਸਲਾਹ ਦਿੱਤੀ ਗਈ ਹੈ ਕਿ ਜੇਕਰ ਅੱਗੇ ਤੋਂ ਕਦੇ ਇਸ ਤਰ੍ਹਾਂ ਦੀ ਬੀਮਾਰੀ ਆਵੇ ਤਾਂ ਉਸ ਨਾਲ ਕਿਵੇਂ ਜੂਝਣਾ ਚਾਹੀਦਾ ਹੈ ਅਤੇ ਕੋਰੋਨਾ ਸਮੇਂ ਕੀ-ਕੀ ਗਲਤੀਆਂ ਹੋਈਆਂ ਹਨ।
