ਐਲਬਰਟਾ ਦੀ ਪ੍ਰੀਮੀਅਰ ਨੇ ਕੋਲਾ ਨੀਤੀ ਕਾਰਨ ਕੀਤਾ ਲੋਕਾਂ ਦੇ ਵਿਰੋਧ ਦਾ ਸਾਹਮਣਾ

ਐਲਬਰਟਾ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਅਤੇ ਉਨ੍ਹਾਂ ਦੇ ਤਿੰਨ ਮੰਤਰੀਆਂ ਨੂੰ ਬੀਤੀ ਰਾਤ ਸੂਬੇ ਦੀ ਕੋਲਾ ਨੀਤੀ ਕਾਰਨ ਵਿਰੋਧ ਦਾ ਸਾਹਮਣਾ ਕਰਨਾ ਪਿਆ। ਫੋਰਟ ਮੈਕਲਿਓਡ ਦੇ ਟਾਊਨ ਹਾਲ ਵਿਚ ਮੌਜੂਦ ਕਰੀਬ 500 ਲੋਕਾਂ ਨੇ ਹੰਗਾਮਾ ਕੀਤਾ। ਇਨ੍ਹਾਂ ਲੋਕਾਂ ਨੇ ਕਾਉਬੌਏ ਹੈਟ, ਬੈਲਟ ਬਕਲਸ ਅਤੇ ਜੀਨਸ ਪਾਈਆਂ ਸਨ।

ਦੱਸ ਦੇਈਏ ਕਿ ਹਾਲ ਹੀ ਵਿਚ ਐਲਬਰਟਾ ਐਨਰਜੀ ਰੈਗੂਲੇਟਰ ਨੇ ਆਸਟ੍ਰੇਲੀਆ ਦੀ ਕੋਲਾ ਕੰਪਨੀ ਨੂੰ ਰੌਕੀ ਮਾਊਨਟੇਨ ਦੀਆਂ ਪੂਰਬੀ ਢਲਾਣਾਂ ਵਿਚ ਵਿਵਾਦਪੂਰਨ ਕੋਲਾ ਖੋਜ ਸ਼ੁਰੂ ਕਰਨ ਦੀ ਇਜਾਜ਼ਤ ਦਿੱਤੀ ਹੈ। ਇਸੇ ਕਾਰਨ ਇਹ ਵਿਰੋਧ ਹੋ ਰਿਹਾ ਹੈ।

ਗਰਾਸੀ ਮਾਊਨਟੇਨ ਵਿਚ ਨੌਰਥਬੈਕ ਹੋਲਡਿੰਗ ਕਾਰਪੋਰੇਸ਼ਨ ਪ੍ਰੋਜੈਕਟ ਨੂੰ 2021 ਵਿਚ ਰੱਦ ਕਰ ਦਿੱਤਾ ਗਿਆ ਸੀ ਕਿਉਂਕਿ ਉਸ ਸਮੇਂ ਵੀ ਇਸ ਕਾਰਨ ਪਾਣੀ ਅਤੇ ਮੱਛੀਆਂ ਸਣੇ ਵਾਤਾਵਰਣ ਨੂੰ ਹੋਣ ਵਾਲੇ ਨੁਕਸਾਨ ਦਾ ਹਵਾਲਾ ਦਿੱਤਾ ਗਿਆ ਸੀ। ਇਨਵਾਇਰਮੈਂਟ ਮੰਤਰੀ ਰੇਬੇਕਾ ਸ਼ੁਲਜ਼ ਮੁਤਾਬਕ ਸੂਬਾ ਇਸ ਵਿਸ਼ੇ ਬਾਰੇ ਵਿਚਾਰ ਕਰ ਰਿਹਾ ਹੈ।