8.7C Vancouver 8.7C VancouverMay 16, 2025 2:50 PM - The Canadian Press
ਐਲਬਰਟਾ ਵਿਚ ਖਸਰਾ ਪੀੜਤਾਂ ਦੀ ਗਿਣਤੀ ਵਿਚ ਲਗਾਤਾਰ ਵਾਧਾ ਹੋ ਰਿਹਾ ਹੈ ਅਤੇ ਕੁੱਲ ਪੀੜਤਾਂ ਦੀ ਗਿਣਤੀ 409 ਹੋ ਗਈ ਹੈ। ਇਸ ਕਾਰਨ ਅਮਰੀਕਾ ਅਤੇ ਕੈਨੇਡਾ ਦੋਵੇਂ ਦੇਸ਼ਾਂ ਦੇ ਲੋਕਾਂ ਵਿਚ ਚਿੰਤਾ ਵੱਧ ਗਈ ਹੈ। ਅਮਰੀਕਾ ਦੇ ਸੀਐਟਲ ਖੇਤਰ ਦੇ ਲੋਕਾਂ ਨੂੰ ਅਲਰਟ ਕੀਤਾ ਗਿਆ ਹੈ ਕਿ ਜੋ ਵੀ ਕੈਨੇਡਾ ਘੁੰਮ ਕੇ ਆਇਆ ਹੈ, ਉਸ ਨੂੰ ਆਪਣੀ ਸਿਹਤ ਦੀ ਜਾਂਚ ਕਰਵਾਉਣੀ ਚਾਹੀਦੀ ਹੈ।ਬੀਤੇ 24 ਘੰਟਿਆਂ ਦੌਰਾਨ ਐਲਬਰਟਾ ਵਿਚ 14 ਨਵੇਂ ਮਾਾਮਲੇ ਦਰਜ ਹੋਏ।
ਸੂਬੇ ਦੇ ਦੱਖਣੀ ਸਿਹਤ ਜ਼ੋਨ ਤੋਂ ਸਭ ਤੋਂ ਵੱਧ 269 ਮਾਮਲੇ ਦਰਜ ਹੋਏ ਹਨ, ਜਿਨ੍ਹਾਂ ਵਿਚ ਲੈਥਬ੍ਰਿਜ, ਮੈਡੀਸਿਨ ਹੈਟ ਅਤੇ ਟੈਬਰ ਦੇ ਇਲਾਕੇ ਆਉਂਦੇ ਹਨ। ਪੀੜਤਾਂ ਵਿਚ ਸਭ ਤੋਂ ਵੱਧ ਗਿਣਤੀ ਬੱਚਿਆਂ ਦੀ ਹੈ। ਐਲਬਰਟਾ ਯੂਨੀਵਰਸਿਟੀ ਦੇ ਡਾ. ਲੇਨੋਰ ਸੈਕਸਿੰਗਰ ਨੇ ਕਿਹਾ ਕਿ ਪਹਿਲਾਂ ਹਰ ਸਾਲ ਖਸਰੇ ਦੇ ਕਰੀਬ 10 ਮਾਮਲੇ ਦਰਜ ਹੁੰਦੇ ਸਨ ਪਰ ਹੁਣ ਹਾਲਾਤ ਅਜਿਹੇ ਹਨ ਕਿ ਇਕ ਦਿਨ ਵਿਚ ਕਰੀਬ 15 ਮਰੀਜ਼ਾਂ ਦੀ ਪੁਸ਼ਟੀ ਹੋ ਰਹੀ ਹੈ। ਕੈਨੇਡਾ ਵਿਚ ਖਸਰੇ ਦੇ ਸਭ ਤੋਂ ਵੱਧ ਮਾਮਲੇ ਓਨਟਾਰੀਓ ਵਿਚ ਦਰਜ ਹੋਏ ਹਨ, ਜਿੱਥੇ 1622 ਲੋਕ ਇਸ ਦੇ ਸ਼ਿਕਾਰ ਹੋਏ ਹਨ। ਇਸ ਦੇ ਬਾਅਦ ਦੂਜਾ ਨੰਬਰ ਐਲਬਰਟਾ ਦਾ ਹੈ।
