ਅਲਬਰਟਾ ਵਿਚ “ਪ੍ਰਾਇਮਰੀ ਕੇਅਰ ਅਲਬਰਟਾ” ਨਵੀਂ ਏਜੰਸੀ ਅਗਲੇ ਮਹੀਨੇ ਹੋਵੇਗੀ ਸ਼ੁਰੂ, ਡਾਕਟਰਾਂ ਤੱਕ ਪਹੁੰਚ ਸੁਧਾਰਣ ਦਾ ਉਦੇਸ਼

ਅਲਬਰਟਾ ਦੀ ਸਿਹਤ ਮੰਤਰੀ ਅਡਰੀਆਨਾ ਲਾਗਰੇਂਜ ਨੇ ਐਲਾਨ ਕੀਤਾ ਹੈ ਕਿ ਪ੍ਰਾਇਮਰੀ ਕੇਅਰ ਅਲਬਰਟਾ (Primary Care Alberta) ਨਾਂ ਦੀ ਨਵੀਂ ਏਜੰਸੀ ਅਗਲੇ ਮਹੀਨੇ ਤੱਕ ਸ਼ੁਰੂ ਹੋ ਜਾਵੇਗੀ, ਜਿਸ ਦਾ ਉਦੇਸ਼ ਪਰਿਵਾਰਕ ਡਾਕਟਰਾਂ ਅਤੇ ਨਰਸ ਪ੍ਰੈਕਟੀਸ਼ਨਰਾਂ ਤੱਕ ਪਹੁੰਚ ਸੁਧਾਰਣਾ ਹੈ।

ਇਹ ਨਵੀਂ ਏਜੰਸੀ ਪ੍ਰਾਇਮਰੀ ਸਿਹਤ ਪ੍ਰਣਾਲੀ ਨੂੰ ਮਜ਼ਬੂਤ ਕਰਨ, ਨਵੇਂ ਮਾਡਲ ਵਿਕਸਿਤ ਕਰਨ ਅਤੇ ਵਰਚੁਅਲ ਸੇਵਾਵਾਂ ਰਾਹੀਂ ਆਫ਼ਟਰ-ਆਵਰ ਕੇਅਰ ਵਧਾਉਣ ’ਤੇ ਕੰਮ ਕਰੇਗੀ। ਲਾਗਰੇਂਜ ਨੇ ਕਿਹਾ ਕਿ ਇਹ ਕਦਮ ਉਹਨਾਂ ਖੇਤਰਾਂ ਵਿਚ ਖ਼ਾਸ ਤੌਰ ’ਤੇ ਮਦਦਗਾਰ ਹੋਵੇਗਾ ਜਿੱਥੇ ਡਾਕਟਰਾਂ ਦੀ ਘਾਟ ਹੈ ਅਤੇ ਮਰੀਜ਼ਾਂ ਨੂੰ ਲੰਮੇ ਸਮੇਂ ਤੱਕ ਉਡੀਕ ਕਰਨੀ ਪੈਂਦੀ ਹੈ।

ਲਾਗਰੇਂਜ ਨੇ ਕਿਹਾ, “ਪ੍ਰਾਇਮਰੀ ਕੇਅਰ ਅਲਬਰਟਾ ਸਾਨੂੰ ਇਹ ਯਕੀਨੀ ਬਣਾਉਣ ਵਿਚ ਮਦਦ ਕਰੇਗਾ ਕਿ ਹਰ ਅਲਬਰਟਨ ਨੂੰ ਪਰਿਵਾਰਕ ਡਾਕਟਰ ਜਾਂ ਨਰਸ ਪ੍ਰੈਕਟੀਸ਼ਨਰ ਤੱਕ ਪਹੁੰਚ ਹੋਵੇ।” ਉਨ੍ਹਾਂ ਦੱਸਿਆ ਕਿ ਅਲਬਰਟਾ ਹੈਲਥ ਸਰਵਿਸਜ਼ (AHS) ਪ੍ਰਾਇਮਰੀ ਕੇਅਰ ਤੇ ਕੇਂਦਰਤ ਹੋਣ ਵਿਚ ਅਸਫਲ ਰਹੀ ਹੈ।

ਇਹ ਕਦਮ ਉਸ ਵੱਡੇ ਸੁਧਾਰ ਯੋਜਨਾ ਦਾ ਹਿੱਸਾ ਹੈ ਜਿਸ ਤਹਿਤ ਪ੍ਰਾਂਤ AHS ਨੂੰ ਚਾਰ ਨਵੀਆਂ ਏਜੰਸੀਆਂ ਵਿਚ ਵੰਡ ਰਿਹਾ ਹੈ - ਪ੍ਰਾਇਮਰੀ ਕੇਅਰ, ਹਸਪਤਾਲ ਕੇਅਰ, ਕਨਟੀਨਿਊਇੰਗ ਕੇਅਰ ਅਤੇ ਮਾਨਸਿਕ ਸਿਹਤ ਤੇ ਨਸ਼ਾ ਮੁਕਤੀ ਸੇਵਾਵਾਂ।

ਇਸ ਤੋਂ ਪਹਿਲਾਂ, ਰੀਕਵਰੀ ਅਲਬਰਟਾ (Recovery Alberta) ਨਾਮਕ ਏਜੰਸੀ ਸ਼ੁਰੂ ਕੀਤੀ ਗਈ ਸੀ ਜੋ ਹੁਣ ਮਾਨਸਿਕ ਸਿਹਤ ਅਤੇ ਨਸ਼ਾ ਮੁਕਤੀ ਸੇਵਾਵਾਂ ਦਾ ਪ੍ਰਬੰਧ ਕਰ ਰਹੀ ਹੈ।

ਸਿਹਤ ਨੀਤੀ ਵਿਦਵਾਨਾਂ ਦਾ ਕਹਿਣਾ ਹੈ ਕਿ ਇਹ ਸੁਧਾਰ ਸਥਾਨਕ ਸਿਹਤ ਸੇਵਾਵਾਂ ਨੂੰ ਵਧੀਆ ਬਣਾ ਸਕਦੇ ਹਨ, ਪਰ ਇਹ ਵਿੱਤੀ ਸਹਾਇਤਾ ਅਤੇ ਸਹਿਕਾਰਤਾ ’ਤੇ ਨਿਰਭਰ ਕਰੇਗਾ।