ਐਲਬਰਟਾ ਦੇ ਤਿੰਨ ਇਲਾਕਿਆਂ ਵਿਚ ਜੂਨ ਮਹੀਨੇ ਹੋਣਗੀਆਂ ਜ਼ਿਮਨੀ ਚੋਣਾਂ

ਐਲਬਰਟਾ ਦੇ ਤਿੰਨ ਇਲਾਕਿਾਆਂ ਦੀਆਂ ਜ਼ਿਮਨੀ ਚੋਣਾਂ ਦਾ ਐਲਾਨ ਹੋ ਗਿਆ ਹੈ ਅਤੇ ਐਨ.ਡੀ.ਪੀ. ਲੀਡਰ ਨਾਹੀਦ ਨੈਨਸ਼ੀ ਵੀ ਇਸ ਵਾਰ ਵਿਧਾਨਸਭਾ ਵਿਚ ਸੀਟ ਲੈਣ ਲਈ ਆਪਣੀ ਕਿਸਮਤ ਅਜਮਾਉਣਗੇ। ਐਡਮਿੰਟਨ-ਏਲਰਸਲੀ, ਐਡਮਿੰਟਨ-ਸਟ੍ਰੈਥਕੋਨਾ ਅਤੇ ਓਲਡਸ-ਡਿੱਡਸਬਰੀ-ਥ੍ਰੀ ਹਿਲਜ਼ ਵਿਚ 23 ਜੂਨ ਨੂੰ ਵੋਟਿੰਗ ਹੋਵੇਗੀ, ਹਾਲਾਂਕਿ 17 ਜੂਨ ਨੂੰ ਐ਼ਡਵਾਂਸ ਵੋਟਿੰਗ ਰੱਖੀ ਗਈ ਹੈ। ਸੋਮਵਾਰ ਦੁਪਹਿਰ ਕੌਂਸਲ ਨੇ ਇਸ ਦੀ ਘੋਸ਼ਣਾ ਕੀਤੀ।

ਦੱਸ ਦੇਈਏ ਕਿ ਦਸੰਬਰ, 2024 ਨੂੰ ਐਨਡੀਪੀ ਆਗੂ ਰੇਚਲ ਨੋਟਲੀ ਨੇ ਅਹੁਦੇ ਤੋਂ ਅਸਤੀਫਾ ਦਿੱਤਾ ਸੀ ਅਤੇ ਐਡਮਿੰਟਨ-ਸਟ੍ਰੈਥਕੋਨਾ ਸੀਟ ਖਾਲੀ ਹੋ ਗਈ ਸੀ। ਨੈਨਸ਼ੀ ਇਸ ਇਲਾਕੇ ਤੋਂ ਚੋਣ ਲੜਨਗੇ। ਉਨ੍ਹਾਂ ਦਾ ਮੁਕਾਬਲਾ ਯੂ.ਸੀ.ਪੀ. ਦੇ ਡਾਰਬੀ ਕ੍ਰੋਚ ਨਾਲ ਹੋਵੇਗਾ। ਐਡਮਿੰਟਨ-ਏਲਰਸਲੀ ਤੋਂ ਐਨ.ਡੀ.ਪੀ. ਵਲੋਂ ਗੁਰਤੇਜ ਸਿੰਘ ਬਰਾੜ ਅਤੇ ਯੂ.ਸੀ.ਪੀ. ਵਲੋਂ ਨਰੇਸ਼ ਭਾਰਦਵਾਜ ਨੂੰ ਉਮੀਦਵਾਰ ਐਲਾਨਿਆ ਗਿਆ ਹੈ।

ਨਰੇਸ਼ 2008 ਤੋਂ 2015 ਤੱਕ ਇੱਥੋਂ ਦੇ ਐਮ.ਐਲ.ਏ ਰਹੇ ਹਨ। 2015 ਵਿਚ ਰਿਸ਼ਵਤ ਦਾ ਦੋਸ਼ ਲੱਗਣ ਕਾਰਨ ਉਨ੍ਹਾਂ ਚੋਣਾਂ ਵਿਚੋਂ ਆਪਣਾ ਨਾਮ ਵਾਪਸ ਲੈ ਲਿਆ ਸੀ ਤੇ ਜਾਂਚ ਮਗਰੋਂ ਉਨ੍ਹਾਂ ਨੂੰ ਬੇਕਸੂਰ ਪਾਇਆ ਗਿਆ ਸੀ। ਓਲਡਸ-ਡਿੱਡਸਬਰੀ-ਥ੍ਰੀ ਹਿਲਜ਼ ਤੋਂ ਯੂ.ਸੀ.ਪੀ. ਵਲੋਂ ਤਾਰਾ ਸੌਅਰ ਚੋਣ ਲੜੇਗੀ ਅਤੇ ਐੱਨ. ਡੀ. ਪੀ. ਨੇ ਅਜੇ ਆਪਣੇ ਉਮੀਦਵਾਰ ਦੀ ਘੋਸ਼ਣਾ ਕਰਨੀ ਹੈ।