ਐਲਬਰਟਾ 'ਚ ਟੀਚਰਜ਼ ਦੀ ਸੰਭਾਵੀ ਹੜਤਾਲ ਵਿਚਾਲੇ ਸਮਿਥ ਨੇ ਤੰਗ ਬਜਟ ਦਾ ਦਿੱਤਾ ਹਵਾਲਾ

ਐਲਬਰਟਾ ਭਰ ਵਿਚ ਅਧਿਆਪਕਾਂ ਦੀ ਹੜਤਾਲ ਦੇ ਬਣ ਰਹੇ ਹਾਲਾਤ ਵਿਚਕਾਰ ਪ੍ਰੀਮੀਅਰ ਡੈਨੀਅਲ ਸਮਿਥ ਨੇ ਅੱਜ ਕਿਹਾ ਕਿ ਯੂਨੀਅਨ ਸਾਹਮਣੇ ਸਿਰਫ ਦੋ ਵਿਕਲਪ ਹਨ, ਜਿਨ੍ਹਾਂ ਵਿਚੋਂ ਉਨ੍ਹਾਂ ਨੂੰ ਇੱਕ ਨੂੰ ਚੁਣਨਾ ਹੋਵੇਗਾ। ਸਮਿਥ ਨੇ ਇਸ ਪਿੱਛੇ ਤੰਗ ਬਜਟ ਦਾ ਹਵਾਲਾ ਦਿੱਤਾ। ਪ੍ਰੀਮੀਅਰ ਨੇ ਕਿਹਾ ਕਿ ਯੂਨੀਅਨ ਨੂੰ ਤਨਖਾਹ ਵਾਧਾ ਜਾਂ ਹੋਰ ਅਧਿਆਪਕਾਂ ਦੀ ਭਰਤੀ ਕਰਨ ਵਿਚੋਂ ਕਿਸੇ ਇੱਕ ਲਈ ਫੈਸਲਾ ਲੈਣਾ ਹੋਵੇਗਾ।

ਸਮਿਥ ਨੇ ਇਹ ਟਿੱਪਣੀਆਂ ਪੱਤਰਕਾਰਾਂ ਵਲੋਂ ਉਨ੍ਹਾਂ ਦੀ ਸਰਕਾਰ ਅਤੇ ਐਲਬਰਟਾ ਟੀਚਰਜ਼ ਐਸੋਸੀਏਸ਼ਨ ਵਿਚਕਾਰ ਕੰਟਰੈਕਟ ਗੱਲਬਾਤ ਰੁਕਣ ਬਾਰੇ ਸਵਾਲ ਪੁੱਛੇ ਜਾਣ 'ਤੇ ਕੀਤੀਆਂ। ਬੀਤੇ ਕੱਲ੍ਹ ਹੀ ਯੂਨੀਅਨ ਨੇ 6 ਅਕਤੂਬਰ ਤੋਂ ਹੜਤਲ ਦੀ ਚਿਤਾਵਨੀ ਦਿੱਤੀ ਸੀ। ਪ੍ਰੀਮੀਅਰ ਸਮਿਥ ਨੇ ਕਿਹਾ ਕਿ ਸਰਕਾਰ ਤੰਗ ਬਜਟ ਦਾ ਸਾਹਮਣਾ ਕਰ ਰਹੀ ਹੈ, ਜੋ ਇਸ ਫਿਸਕਲ ਸਾਲ ਵਿਚ $6.5 ਬਿਲੀਅਨ deficit ਵਿਚ ਜਾਣ ਦੀ ਸੰਭਾਵਨਾ ਹੈ।

ਉਨ੍ਹਾਂ ਕਿਹਾ ਕਿ ਅਧਿਆਪਕਾਂ ਦੀ ਤਨਖਾਹ ਵਿਚ ਕੋਈ ਵੀ ਵਾਧੂ ਵਾਧਾ ਹੋਰ ਅਧਿਆਪਕ ਰੱਖਣ ਦੀ ਸਮਰਥਾ ਨੂੰ ਘੱਟ ਕਰ ਦੇਵੇਗਾ।ਗੌਰਤਲਬ ਹੈ ਕਿ ਲਗਭਗ 51,000 ਅਧਿਆਪਕਾਂ ਦੀ ਨੁਮਾਇੰਦਗੀ ਕਰਦੀ ਯੂਨੀਅਨ ਨੇ ਸਰਕਾਰ ਵਲੋਂ ਦਿੱਤੇ ਤਨਖ਼ਾਹ ਵਿਚ ਵਾਧੇ ਦੀ ਪੇਸ਼ਕਸ਼ ਨੂੰ ਨਾਕਾਫੀ ਦੱਸਿਆ ਹੈ।