ਜੌਨ ਰਸਟੈਡ ਨੇ ਐਲਬਰਟਾ ਦੇ ਪਾਈਪਲਾਈਨ ਪ੍ਰੋਜੈਕਟ ਦੀ ਕੀਤੀ ਹਿਮਾਇਤ, ਈਬੀ ਸਰਕਾਰ 'ਤੇ ਸਾਧਿਆ ਨਿਸ਼ਾਨਾ

ਬੀ.ਸੀ.ਕੰਜ਼ਰਵੇਟਿਵ ਪਾਰਟੀ ਦੇ ਸਾਬਕਾ ਲੀਡਰ ਜੌਨ ਰਸਟੈਡ ਨੇ 1 ਜੁਲਾਈ ਤੱਕ ਐਲਬਰਟਾ ਵਲੋਂ ਪਾਈਪਲਾਈਨ ਪ੍ਰੋਜੈਕਟ ਲਈ ਦਾਇਰ ਕੀਤੀ ਜਾਣ ਵਾਲੀ ਅਰਜ਼ੀ ਦਾ ਪੁਰਜ਼ੋਰ ਸਮਰਥਨ ਕੀਤਾ ਹੈ। ਉਨ੍ਹਾਂ ਪ੍ਰੀਮੀਅਰ ਡੇਵਿਡ ਈਬੀ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਸੂਬੇ ਨੂੰ ਇਸ ਪ੍ਰੋਜੈਕਟ ਦੇ ਰਾਹ ਵਿਚ ਰੋੜਾ ਬਣਨ ਦੀ ਬਜਾਏ ਇਸ ਲਈ ਅੱਗੇ ਆਉਣਾ ਚਾਹੀਦਾ ਹੈ।

ਰਸਟੈਡ ਮੁਤਾਬਕ, ਇਹ ਸਿਰਫ਼ ਕਿਸੇ ਇੱਕ ਸੂਬੇ ਐਲਬਰਟਾ ਦਾ ਨਹੀਂ ਸਗੋਂ ਪੂਰੇ ਕੈਨੇਡਾ ਦਾ ਪ੍ਰੋਜੈਕਟ ਹੈ ਜੋ ਬੀ.ਸੀ. ਦੇ ਆਰਥਿਕ ਸੰਕਟ ਨੂੰ ਵੀ ਦੂਰ ਕਰਨ ਵਿਚ ਭੂਮਿਕਾ ਨਿਭਾ ਸਕਦਾ ਹੈ। ਉਹਨਾਂ ਕਿਹਾ ਕਿ ਇਹ ਪਾਈਪਲਾਈਨ ਸੂਬੇ ਵਿਚ ਖ਼ਾਸ ਕਰ ਨੌਰਥ ਵਿਚ ਅਸਲ ਨੌਕਰੀਆਂ ਲੈ ਕੇ ਆਵੇਗੀ,ਜਿੱਥੇ forestry ਸੈਕਟਰ ਪਹਿਲਾਂ ਹੀ ਮੰਦਹਾਲੀ ਦੇ ਦੌਰ ਵਿਚੋਂ ਲੰਘ ਰਿਹਾ ਹੈ। ਰਸਟੈਡ ਮੁਤਾਬਕ, ਹੁਣ ਤੱਕ ਕੈਨੇਡਾ ਆਪਣਾ ਤੇਲ ਅਮਰੀਕਾ ਨੂੰ 20 ਫੀਸਦੀ ਸਸਤੀ ਕੀਮਤ 'ਤੇ ਵੇਚ ਰਿਹਾ ਹੈ ਅਤੇ ਇਸ ਪ੍ਰੋਜੈਕਟ ਨਾਲ ਸਾਲਾਨਾ ਅਰਬਾਂ ਡਾਲਰਾਂ ਦਾ ਹੋ ਰਿਹਾ ਇਹ ਨੁਕਸਾਨ ਬੰਦ ਹੋਵੇਗਾ।

ਉਨ੍ਹਾਂ ਦੋਸ਼ ਲਾਇਆ ਕਿ ਈਬੀ ਸਰਕਾਰ ਸਿਰਫ਼ ਉਸੇ ਪ੍ਰੋਜੈਕਟ ਨੂੰ ਸੂਬੇ ਦਾ ਮੰਨਦੀ ਹੈ ਜਿਸ ਲਈ ਉਹ ਖ਼ੁਦ ਚੈੱਕ ਲਿਖਦੇ ਹਨ ਜਾਂ ਸਬਸਿਡੀਆਂ ਦਿੰਦੇ ਹਨ ਅਤੇ ਉਹ ਇੱਕ ਅਜਿਹੇ ਪ੍ਰੋਜੈਕਟ ਦਾ ਵਿਰੋਧ ਕਰ ਰਹੇ ਹਨ ਜੋ ਪੂਰੇ ਸੂਬੇ ਨੂੰ ਫਾਇਦਾ ਦੇ ਸਕਦਾ ਹੈ।