ਕੈਨੇਡਾ-ਪੋਲੈਂਡ ਅਤੇ ਯੂਕਰੇਨ ਨਾਲ ਮੋਢੇ ਨਾਲ ਮੋਢਾ ਲਾ ਕੇ ਖੜ੍ਹਾ ਹੈ: ਅਨੀਤਾ ਆਨੰਦ

ਕੈਨੇਡਾ ਦੀ ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਨੇ ਰੂਸੀ ਡਰੋਨ ਵਲੋਂ ਨੈਟੋ ਏਅਰਸਪੇਸ ਦੀ ਉਲੰਘਣਾ ਕਰਨ 'ਤੇ ਰੂਸ ਦੀ ਨਿੰਦਾ ਕੀਤੀ ਹੈ ਅਤੇ ਕਿਹਾ ਕਿ ਕੈਨੇਡਾ -ਪੋਲੈਂਡ ਅਤੇ ਯੂਕਰੇਨ ਨਾਲ ਮੋਢੇ ਨਾਲ ਮੋਢਾ ਲਾ ਕੇ ਖੜ੍ਹਾ ਹੈ। ਆਨੰਦ ਨੇ ਕਿਹਾ ਕਿ ਪੋਲੈਂਡ ਵਿਚ ਰੂਸੀ ਡਰੋਨ ਦੀ ਘੁਸਪੈਠ ਦਿਖਾਉਂਦਾ ਹੈ ਕਿ ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਸ਼ਾਂਤੀ ਦੀ ਕੋਸ਼ਿਸ਼ ਲਈ ਗੰਭੀਰ ਨਹੀਂ ਹਨ। ਉਨ੍ਹਾਂ ਇਸ ਬਾਰੇ ਸੋਸ਼ਲ ਮੀਡੀਆ 'ਤੇ ਟਿੱਪਣੀ ਕੀਤੀ।

ਪੋਲੈਂਡ ਨੇ ਨੈਟੋ ਦੇ ਆਰਟੀਕਲ 4 ਨੂੰ ਲਾਗੂ ਕਰਦੇ ਹੋਏ ਸਹਿਯੋਗੀਆਂ ਨਾਲ ਸਲਾਹ-ਮਸ਼ਵਰਾ ਸ਼ੁਰੂ ਕਰ ਦਿੱਤਾ ਹੈ,ਇਹ ਧਾਰਾ ਕਹਿੰਦੀ ਹੈ ਕਿ ਜੇ ਕਿਸੇ ਮੈਂਬਰ ਮੁਲਕ ਦੀ ਸੁਰੱਖਿਆ ਨੂੰ ਕੋਈ ਖ਼ਤਰਾ ਹੁੰਦਾ ਹੈ ਤਾਂ ਸਾਰੀਆਂ ਧਿਰਾਂ ਕਿਸੇ ਵੀ ਕਦਮ ਬਾਰੇ ਇਕੱਠੇ ਸਲਾਹ-ਮਸ਼ਵਰਾ ਕਰਨਗੀਆਂ। ਆਨੰਦ ਨੇ ਤਾਜ਼ਾ ਬਿਆਨ ਵਿਚ ਇੱਕ ਵਾਰ ਫਿਰ ਤੋਂ ਰੂਸ ਨੂੰ ਯੂਕਰੇਨ ਵਿਰੁੱਧ ਆਪਣੀ ਗੈਰ-ਵਾਜਬ ਅਤੇ ਗੈਰ-ਕਾਨੂੰਨੀ ਜੰਗ ਖਤਮ ਕਰਨ ਲਈ ਕਿਹਾ ਹੈ।

ਪੋਲਿਸ਼ ਫੌਜ ਨੇ ਰੂਸੀ ਡਰੋਨ ਦੀ ਘੁਸਪੈਠ ਨੂੰ ਉਕਸਾਵੇ ਦੀ ਕਾਰਵਾਈ ਦੱਸਿਆ ਹੈ, ਉਥੇ ਹੀ ਰੂਸ ਦਾ ਕਹਿਣਾ ਹੈ ਕਿ ਉਸ ਨੇ ਪੋਲੈਂਡ ਨੂੰ ਨਿਸ਼ਾਨਾ ਨਹੀਂ ਬਣਾਇਆ ਅਤੇ ਮਾਸਕੋ ਦੇ ਨਜ਼ਦੀਕੀ ਸਹਿਯੋਗੀ ਬੇਲਾਰੂਸ ਨੇ ਕਿਹਾ ਕਿ ਕੁਝ ਡਰੋਨ ਨੈੱਟਵਰਕ ਜਾਮ ਹੋਣ ਕਾਰਨ ਆਪਣਾ ਰਸਤਾ ਭਟਕ ਗਏ ਸਨ।