20.11C Vancouver 20.11C VancouverDec 29, 2020 4:46 PM -
ਹੋਮਿਸਾਈਡ ਜਾਂਚਕਰਤਾਵਾਂ ਵਲੋਂ ਸਰ੍ਹੀ ਵਿੱਚ ਗੋਲ਼ੀ ਚਲਣ ਦੀ ਇੱਕ ਜਾਨਲੇਵਾ ਵਾਰਦਾਤ ਦੀ ਪੜਤਾਲ ਕੀਤੀ ਜਾ ਰਹੀ ਹੈ, ਬੀਤੇ ਕੁਝ ਦਿਨਾਂ ਦੌਰਾਨ ਸ਼ਹਿਰ ਵਿੱਚ ਵਾਪਰੀ ਇਹ ਅਜਿਹੀ ਦੂਸਰੀ ਘਟਨਾ ਹੈ।
ਇੰਟੈਗਰੇਟਿਡ ਹੋਮਿਸਾਈਡ ਇਨਵੈਸਟੀਗੇਸ਼ਨ ਟੀਮ ਦੇ ਸਾਰਜੰਟ ਫਰੈਂਕ ਜੈਂਗ ਅਨੁਸਾਰ, ਇਹ ਘਟਨਾ ਗਿਲਫਰਡ ਇਲਾਕੇ ਵਿੱਚ ਸੋਮਵਾਰ ਰਾਤ ਨੂੰ ਵਾਪਰੀ।
ਅਣਜਾਣ ਪੀੜਤ ਘਟਨਾ ਸਥਾਨ 'ਤੇ ਮ੍ਰਿਤਕ ਪਾਇਆ ਗਿਆ ਸੀ ਪਰ ਹੋਰ ਵੇਰਵੇ ਫਿਲਹਾਲ ਜਾਰੀ ਨਹੀਂ ਕੀਤੇ ਗਏ ਹਨ।
ਗੋਲ਼ੀ ਚੱਲਣ ਦੀ ਇਹ ਵਾਰਦਾਤ ਉਦੋਂ ਵਾਪਰੀ ਜਦ ਜੈਂਗ ਐਤਵਾਰ ਨੂੰ ਸ਼ਹਿਰ ਦੇ ਵੌਹਲੀ ਇਲਾਕੇ ਵਿੱਚ ਵਾਪਰੀ ਇੱਕ ਹੋਰ ਅਜਿਹੀ ਘਟਨਾ ਬਾਰੇ ਜਾਣਕਾਰੀ ਪ੍ਰਦਾਨ ਕਰ ਰਹੇ ਸਨ।
ਐਤਵਾਰ ਨੂੰ ਗੋਲ਼ੀ ਚੱਲਣ ਦੀ ਵਾਰਦਾਤ ਵਿੱਚ 19 ਸਾਲ ਦੇ ਨੌਜਵਾਨ, ਹਰਮਨ ਸਿੰਘ ਢੇਸੀ ਦੀ ਮੌਤ ਹੋ ਗਈ ਹੈ।
ਇੰਟੈਗਰੇਟਿਡ ਹੋਮਿਸਾਈਡ ਇਨਵੈਸਟੀਗੇਸ਼ਨ ਯੂਨਿਟ ਦਾ ਮੰਨਣਾ ਹੈ ਕਿ ਹਰਮਨ ਸਿੰਘ ਢੇਸੀ ਅਤੇ ਗਿਲਫਰਡ ਇਲਾਕੇ ਦੀ ਵਾਰਦਾਤ ਦੇ ਪੀੜਤ ਨੂੰ ਮਿਥ ਕੇ ਨਿਸ਼ਾਨਾ ਬਣਾਇਆ ਗਿਆ ਸੀ।
ਆਈ-ਹਿੱਟ ਅਨੁਸਾਰ ਪੁਲੀਸ ਢੇਸੀ ਨਾਲ ਵਾਕਫ਼ ਸੀ।
ਦੋਵੇਂ ਘਟਨਾਵਾਂ ਤੋਂ ਬਾਅਦ ਪੁਲਿਸ ਨੂੰ ਕੁਝ ਦੂਰੀ ’ਤੇ ਸਾੜੇ ਹੋਏ ਵਾਹਨ ਵੀ ਬਰਾਮਦ ਹੋਏ ਹਨ।
ਅਧਿਕਾਰੀਆਂ ਵੱਲੋਂ ਫਿਲਹਾਲ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਗਈ ਕਿ ਦੋਵੇਂ ਵਾਰਦਾਤਾਂ ਦਾ ਆਪਸ ਵਿੱਚ ਸਬੰਧ ਸੀ ਜਾਂ ਨਹੀਂ।
ਐਤਵਾਰ ਦੀ ਘਟਨਾ ਰਾਤ ਤਕਰੀਬਨ 10:30 ਵਜੇ 137A ਸਟਰੀਟ ਅਤੇ 90 ਐਵੀਨਿਊ ਦੇ ਨਜ਼ਦੀਕ ਵਾਪਰੀ ਅਤੇ ਸੋਮਵਾਰ ਦੀ ਵਾਰਦਾਤ, 148A ਸਟ੍ਰੀਟ ਦੇ 11000 ਬਲੌਕ ‘ਤੇ ਵਾਪਰੀ।
ਆਈ ਹਿੱਟ ਨੂੰ ਘਟਨਾਵਾਂ ਦੇ ਗਵਾਹਾਂ ਅਤੇ ਡੈਸ਼ ਕੈਮ ਫੁਟੇਜ ਦੀ ਭਾਲ ਹੈ।
ਜ਼ਿਕਰਯੋਗ ਹੈ ਕਿ 29 ਨਵੰਬਰ ਨੂੰ ਫਲੀਟਵੁਡ ਇਲਾਕੇ ਵਿੱਚ ਰਿਯਾਦ ਰਸ਼ੀਦ ਦੇ ਗੋਲੀ ਮਾਰਕੇ ਕੀਤੇ ਕਤਲ ਤੋਂ ਲੈਕੇ ਹੁਣ ਤੱਕ ਸਰ੍ਹੀ ਵਿੱਚ ਗੋਲ਼ੀ ਚਲਣ ਦੇ 4 ਅਜਿਹੇ ਜਾਨਲੇਵਾ ਹਮਲੇ ਹੋ ਚੁੱਕੇ ਹਨ।
