20.21C Vancouver 20.21C VancouverNov 25, 2020 8:25 PM -
ਖੇਡ ਜਗਤ ਦੀ ਨਾਮੀ ਸ਼ਖਸੀਅਤ ਅਤੇ ਫੁੱਟਬਾਲ ਦੇ ਮੈਦਾਨ 'ਤੇ ਕੀਤੇ ਕਮਾਲ ਸਦਕਾ ਬੇਹੱਦ ਪ੍ਰਸਿੱਧੀ ਖੱਟਣ ਵਾਲੇ, ਮਾਰਾਡੋਨਾ ਦਾ ਦੇਹਾਂਤ ਹੋ ਗਿਆ ਹੈ।
ਮਾਰਾਡੋਨਾ 60 ਸਾਲ ਦੇ ਸਨ।
ਦਿਲ ਦੇ ਦੌਰੇ ਕਾਰਨ ਉਨ੍ਹਾਂ ਦੀ ਮੌਤ ਹੋਣ ਦੀ ਜਾਣਕਾਰੀ ਸਾਹਮਣੇ ਆਈ ਹੈ।
ਸਾਲ 1986 'ਚ ਆਪਣੇ ਦੇਸ਼ ਅਰਜਨਟੀਨਾ ਨੂੰ ਵਿਸ਼ਵ ਕੱਪ ਜਿਤਾਉਣ ਤੋਂ ਬਾਅਦ, ਡਿਏਗੋ ਮਾਰਾਡੋਨਾ, ਸਿਰਫ ਅਰਜਨਟੀਨਾ 'ਚ ਹੀ ਨਹੀਂ ਬਲਕਿ ਵਿਸ਼ਵ ਭਰ 'ਚ ਜਾਣੇ ਜਾਣ ਲੱਗੇ ਸਨ।
ਇਸੇ ਵਿਸ਼ਵ ਕੱਪ ਦੌਰਾਨ ਉਨ੍ਹਾਂ ਇੰਗਲੈਂਡ ਖਿਲਾਫ਼ ਮੁਕਾਬਲੇ 'ਚ ਬੇਹੱਦ ਪ੍ਰਸਿੱਧ, "ਹੈਂਡ ਆਫ ਗੌਡ" ਗੋਲ ਕੀਤਾ ਸੀ।
ਉਨ੍ਹਾਂ ਦੀ ਮੌਤ ਦੀ ਖਬਰ ਉਸ ਵੇਲੇ ਆਈ ਹੈ, ਜਦ 2 ਹਫ਼ਤੇ ਪਹਿਲਾਂ ਉਨ੍ਹਾਂ ਨੂੰ ਬਿਊਨਸ ਆਇਰਸ ਦੇ ਇੱਕ ਹਸਪਤਾਲ ਵਿੱਚੋਂ ਦਿਮਾਗ ਸੰਬੰਧੀ ਸਰਜਰੀ ਤੋਂ ਬਾਅਦ ਛੁੱਟੀ ਮਿਲੀ ਸੀ।
ਮਾਰਾਡੋਨਾ ਦੇ ਦੇਹਾਂਤ ਤੋਂ ਬਾਅਦ ਵਿਸ਼ਵ ਭਰ ਤੋਂ ਦਿੱਗਜ ਖਿਡਾਰੀ ਅਤੇ ਹੋਰ ਨਾਮੀ ਸ਼ਖਸੀਅਤਾਂ ਉਨ੍ਹਾਂ ਨੂੰ ਯਾਦ ਕਰ ਰਹੀਆਂ ਹਨ।
ਨਾਮੀ ਫੁੱਟਬਾਲ ਖਿਡਾਰੀ ਪੈਲੇ ਨੇ ਅੱਜ ਕਿਹਾ ਕਿ ਵਿਸ਼ਵ ਨੇ ਇੱਕ ਲੀਜੈਂਡ ਅਤੇ ਉਨ੍ਹਾਂ ਨੇ ਇੱਕ ਪਿਆਰਾ ਦੋਸਤ ਗਵਾ ਦਿੱਤਾ ਹੈ।
ਉਨ੍ਹਾਂ ਕਿਹਾ ਕਿ ਇੱਕ ਦਿਨ ਆਵੇਗਾ ਜਦ ਉਹ ਮਾਰਾਡੋਨਾ ਨਾਲ ਅਸਮਾਨ ਦੇ ਉਸ ਪਾਰ ਫੁੱਟਬਾਲ ਜ਼ਰੂਰ ਖੇਡਣਗੇ।
ਅਰਜਨਟੀਨਾ ਦੇ ਰਾਸ਼ਟਰਪਤੀ ਐਲਫਰਾਡੋ ਫਰਨਾਂਡੇਜ਼ ਨੇ ਕਿਹਾ, "ਤੁਸੀਂ ਸਾਨੂੰ ਵਿਸ਼ਵ 'ਚ ਚੋਟੀ ਤੱਕ ਪਹੁੰਚਾਇਆ।" ਉਨ੍ਹਾਂ ਕਿਹਾ, "ਤੁਸੀਂ ਸਾਨੂੰ ਬੇਹੱਦ ਖੁਸ਼ ਕੀਤਾ, ਤੁਸੀਂ ਸਭ ਤੋਂ ਮਹਾਨ ਸੀ।"
ਦਿੱਗਜ ਫੁੱਟਬਾਲ ਖਿਡਾਰੀ ਕ੍ਰਿਸਟੀਆਨੋ ਰੋਨਾਲਡੋ ਨੇ ਅੱਜ ਕਿਹਾ, "ਮਾਰਾਡੋਨਾ ਇੱਕ ਅਜਿਹੀ ਲੈਗੇਸੀ ਛੱਡ ਗਏ ਹਨ, ਜਿਸ ਦੀ ਕੋਈ ਸੀਮਾ ਨਹੀਂ ਹੈ।"
