ਬੀ.ਸੀ. ਅਤੇ ਫੈਡਰਲ ਸਰਕਾਰ ਵੱਲੋਂ ਫਿਰੌਤੀ ਮਾਮਲਿਆਂ ਦੇ ਪੀੜਤਾਂ ਦੀ ਸਹਾਇਤਾ ਲਈ ਫੰਡ ਦਾ ਐਲਾਨ

ਪ੍ਰੀਮੀਅਰ ਡੇਵਿਡ ਈਬੀ ਅਤੇ ਫੈਡਰਲ ਸਰਕਾਰ ਨੇ ਬੀ. ਸੀ. ਵਿਚ ਚੱਲ ਰਹੀਆਂ ਫਿਰੌਤੀ ਦੀਆਂ ਘਟਨਾਵਾਂ ਦੇ ਸਬੰਧ ਵਿਚ ਪੀੜਤਾਂ ਦੀ ਸਹਾਇਤਾ ਲਈ 5-5 ਲੱਖ ਡਾਲਰ ਦੇ ਫੰਡ ਦੀ ਘੋਸ਼ਣਾ ਕੀਤੀ ਹੈ। ਇਹ ਫੈਸਲਾ ਸਰੀ ਵਿਚ ਸ਼ੁੱਕਰਵਾਰ ਸਵੇਰੇ ਜਬਰੀ ਵਸੂਲੀ ਦੀਆਂ ਧਮਕੀਆਂ ਨਾਲ ਨਜਿੱਠਣ ਅਤੇ ਪੀੜਤਾਂ ਦੀ ਸਪੋਰਟ ਲਈ ਹੋਈ ਰਾਊਂਡ ਟੇਬਲ ਮੀਟਿੰਗ ਵਿਚ ਲਿਆ ਗਿਆ, ਜਿਸ ਵਿਚ ਪ੍ਰੀਮੀਅਰ ਈਬੀ, ਮੇਅਰ ਬ੍ਰੇਡਾ ਲੌਕ ਅਤੇ ਫੈਡਰਲ ਪਬਲਿਕ ਸੇਫਟੀ ਮੰਤਰੀ ਗੈਰੀ ਆਨੰਦਸੰਗਰੀ ਸਮੇਤ ਕਈ ਅਧਿਕਾਰੀ ਸ਼ਾਮਲ ਸਨ।

ਪ੍ਰੀਮੀਅਰ ਈਬੀ ਅਤੇ ਫੈਡਰਲ ਪਬਲਿਕ ਸੇਫਟੀ ਮੰਤਰੀ ਨੇ ਦੱਸਿਆ ਕਿ ਬੀ. ਸੀ. ਵਿਚ ਫਿਰੌਤੀ ਦੇ ਸਬੰਧ ਵਿਚ ਹੁਣ ਤੱਕ 5 ਲੋਕਾਂ ਨੂੰ ਕੈਨੇਡਾ ਤੋਂ ਡਿਪੋਰਟ ਕੀਤਾ ਜਾ ਚੁੱਕਾ ਹੈ ਅਤੇ 7 ਦੀ ਗ੍ਰਿਫਤਾਰੀ ਕੀਤੀ ਗਈ ਹੈ। ਆਨੰਦਸੰਗਰੀ ਨੇ ਕਿਹਾ 94 ਹੋਰ ਜਾਂਚ ਦੇ ਘੇਰੇ ਵਿਚ ਹਨ।

ਮਿਨਿਸਟਰ ਨੇ ਕਿਹਾ ਕਿ ਇਨ੍ਹਾਂ ਘਟਨਾਵਾਂ ਦੇ ਮਾਮਲੇ ਵਿਚ ਕੈਨੇਡੀਅਨ ਅਧਿਕਾਰੀਆਂ ਨੇ ਭਾਰਤ ਨਾਲ ਹਾਈ ਲੈਵਲ ਗੱਲਬਾਤ ਵਿਚ ਬਹੁਤ ਹੀ ਮਹੱਤਵਪੂਰਨ ਪ੍ਰੋਗਰੈੱਸ ਕੀਤੀ ਹੈ ਅਤੇ ਹੋਰ ਵੀ ਡਿਪੋਟੇਸ਼ਨ ਹੋਣਗੇ।

ਮੰਤਰੀ ਨੇ ਦੱਸਿਆ ਕਿ ਜਾਂਚ ਵਿਚ ਸਹਿਯੋਗ ਲਈ ਕੈਨੇਡਾ ਤੋਂ ਇੱਕ ਸੀਨੀਅਰ ਟੀਮ ਕਈ ਹਫ਼ਤੇ ਪਹਿਲਾਂ ਭਾਰਤ ਗਈ ਸੀ, ਜਿਸ ਵਿਚ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ, ਸੀਐਸਆਈਐਸ ਡਾਇਰੈਕਟਰ ਅਤੇ ਆਰਸੀਐਮਪੀ ਕਮਿਸ਼ਨਰ ਮਾਈਕਲ ਡੂਹਾਮ ਸ਼ਾਮਲ ਸਨ।