ਅਮਰੀਕੀ ਟੈਰਿਫ ਲਾਗੂ ਹੋਣ 'ਤੇ ਪ੍ਰਭਾਵਿਤ ਕਾਰੋਬਾਰਾਂ ਲਈ ਐਮਰਜੈਂਸੀ ਫੰਡ ਹੋਵੇਗਾ ਉਪਲਬਧ : ਈਬੀ

ਪ੍ਰੀਮੀਅਰ ਡੇਵਿਡ ਈਬੀ ਨੇ ਐਲਾਨ ਕੀਤਾ ਹੈ ਕਿ ਜੇਕਰ ਅਮਰੀਕਾ ਵੱਲੋਂ ਨਵੇਂ ਟੈਰਿਫਸ ਲਾਗੂ ਕੀਤੇ ਜਾਂਦੇ ਹਨ ਤਾਂ ਸੂਬੇ ਦੇ ਪ੍ਰਭਾਵਿਤ ਕਾਰੋਬਾਰੀ $1.5 ਬਿਲੀਅਨ ਦੇ ਫੈਡਰਲ ਐਮਰਜੈਂਸੀ ਫੰਡ ਦੀ ਮਦਦ ਲੈ ਸਕਣਗੇ। ਈਬੀ ਨੇ ਪੁਸ਼ਟੀ ਕੀਤੀ ਕਿ ਪ੍ਰਧਾਨ ਮੰਤਰੀ ਕਾਰਨੀ ਨੇ ਉਨ੍ਹਾਂ ਨੂੰ ਭਰੋਸਾ ਦਿੱਤਾ ਹੈ ਕਿ ਇਹ ਖੇਤਰੀ ਫੰਡ ਅਜੇ ਵੀ ਕਾਇਮ ਹੈ। ਉਨ੍ਹਾਂ ਉਮੀਦ ਜਤਾਈ ਕਿ ਜੇ ਟਰੰਪ ਵੱਲੋਂ 19 ਅਗਸਤ ਤੋਂ ਕੈਨੇਡੀਅਨ ਚੀਜ਼ਾਂ ਖ਼ਾਸ ਕਰਕੇ ਲੱਕੜ ਦੇ ਉਤਪਾਦਾਂ 'ਤੇ 50 ਫ਼ੀਸਦੀ ਤੱਕ ਟੈਰਿਫ ਲਗਾਉਣ ਦੀ ਦਿੱਤੀ ਗਈ ਧਮਕੀ ਅਮਲ ਵਿਚ ਆਉਂਦੀ ਹੈ ਤਾਂ ਇਹ ਫੰਡ ਬੀ.ਸੀ. ਦੇ ਉਦਯੋਗਾਂ ਨੂੰ ਕੁਝ ਆਸਰਾ ਦੇਵੇਗਾ।

ਪ੍ਰੀਮੀਅਰ ਨੇ ਚਿੰਤਾ ਜ਼ਾਹਿਰ ਕਰਦਿਆਂ ਕਿਹਾ ਕਿ ਟੈਰਿਫਸ ਦੇ ਇਸ ਖ਼ਤਰੇ ਕਾਰਨ ਪੈਦਾ ਹੋਈ ਅਨਿਸ਼ਚਿਤਤਾ ਪਹਿਲਾਂ ਹੀ ਬੀ.ਸੀ. ਦੇ ਵਪਾਰੀਆਂ ਦਾ ਨੁਕਸਾਨ ਕਰ ਰਹੀ ਹੈ। ਇਸ ਦੇ ਨਾਲ ਹੀ ਉਹਨਾਂ ਸਪੱਸ਼ਟ ਕੀਤਾ ਕਿ ਬੀ.ਸੀ. ਦੇ ਸਟੋਰਾਂ ਵਿਚ ਅਮਰੀਕੀ ਸ਼ਰਾਬ ਨੂੰ ਵਾਪਸ ਲਿਆਉਣ ਦਾ ਕੋਈ ਇਰਾਦਾ ਨਹੀਂ ਹੈ, ਭਾਵੇਂ ਟਰੰਪ ਨੇ ਇਸ ਦੀ ਮੰਗ ਕੀਤੀ ਹੈ।

ਈਬੀ ਨੇ ਕਿਹਾ ਕਿ ਜਿਨ੍ਹਾਂ ਸੂਬਿਆਂ ਨੇ ਅਮਰੀਕੀ ਸ਼ਰਾਬ ਨੂੰ ਸ਼ੈਲਫਾਂ ਤੋਂ ਹਟਾਇਆ ਹੈ, ਉਹ ਇਸ ਨੂੰ ਵਾਪਸ ਰੱਖਣ ਦੇ ਪੱਖ ਵਿਚ ਨਹੀਂ ਹਨ ਕਿਉਂਕਿ ਇਹ ਗੱਲਬਾਤ ਵਿਚ ਕੈਨੇਡਾ ਲਈ ਇੱਕ ਵੱਡਾ ਹਥਿਆਰ ਹੈ। ਇਸ ਵਿਚਕਾਰ ਅਮਰੀਕਾ ਵੱਲੋਂ ਜਬਰੀ ਮਜ਼ਦੂਰੀ ਨਾਲ ਬਣੇ ਉਤਪਾਦਾਂ ਦੇ ਇੰਪੋਟ ਨੂੰ ਰੋਕਣ ਵਿਚ ਅਸਫਲਤ ਰਹਿਣ ਦੇ ਨਾਂ 'ਤੇ ਕੈਨੇਡੀਅਨ ਵਸਤੂਆਂ ਉਤੇ ਲਗਾਏ ਗਏ ਨਵੇਂ 10 ਫ਼ੀਸਦੀ ਟੈਰਿਫ ਨੇ ਦੇਸ਼ ਦੇ ਵਪਾਰਕ ਖੇਤਰ ਵਿਚ ਤੁਰੰਤ ਦਬਾਅ ਪੈਦਾ ਕਰ ਦਿੱਤਾ ਹੈ।