14.89C Vancouver 14.89C VancouverMar 23, 2026 6:53 PM - Connect Newsroom - Ramandeep Kaur with files from The Canadian Press
ਬੀ.ਸੀ. ਹਾਈਵੇਅ ਪੈਟਰੋਲ ਨੇ ਇਲੈਕਟ੍ਰਿਕ ਵਾਹਨ ਮਾਲਕਾਂ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਸੂਬੇ ਦੀਆਂ ਸੜਕਾਂ 'ਤੇ ਸਵੈ-ਡਰਾਈਵਿੰਗ ਵਿਸ਼ੇਸ਼ਤਾਵਾਂ ਦਾ ਇਸਤੇਮਾਲ ਕਰਨਾ ਗੈਰ-ਕਾਨੂੰਨੀ ਹੈ। ਇਹ ਚਿਤਾਵਨੀ ਟਰਾਂਸ-ਕੈਨੇਡਾ ਹਾਈਵੇਅ 'ਤੇ ਇੱਕ ਮਹਿਲਾ ਨੂੰ ਆਪਣੀ ਚੱਲਦੀ ਗੱਡੀ ਵਿਚ ਕਥਿਤ ਤੌਰ 'ਤੇ ਸੁੱਤੇ ਹੋਏ ਫੜ੍ਹੇ ਜਾਣ ਮਗਰੋਂ ਦਿੱਤੀ ਗਈ ਹੈ।
ਬੀ.ਸੀ. ਹਾਈਵੇਅ ਪੈਟਰੋਲ ਅਨੁਸਾਰ, ਪਿਛਲੇ ਮੰਗਲਵਾਰ ਸਵੇਰੇ ਕੋਕੁਇਟਲਮ ਵਿਚ ਹਾਈਵੇ 1 'ਤੇ ਇੱਕ ਟੇਸਲਾ ਗੱਡੀ ਦੀ ਡਰਾਈਵਰ ਨੂੰ ਅਜਿਹੇ ਹੀ ਮਾਮਲੇ ਵਿਚ ਲਾਪਰਵਾਹੀ ਨਾਲ ਗੱਡੀ ਚਲਾਉਣ ਅਤੇ ਤੇਜ਼ ਰਫ਼ਤਾਰ ਲਈ ਜੁਰਮਾਨਾ ਕੀਤਾ ਗਿਆ ਹੈ। ਪੁਲਿਸ ਅਨੁਸਾਰ, ਮਹਿਲਾ ਡਰਾਈਵਰ ਗੱਡੀ ਵਿਚ ਸੁੱਤੀ ਹੋਈ ਸੀ, ਜਦੋਂ ਕਿ ਉਸ ਵੇਲੇ ਮੌਸਮ ਖਰਾਬ ਸੀ ਅਤੇ ਸੜਕਾਂ ਮੀਂਹ ਕਾਰਨ ਫਿਸਲਣ ਵਾਲੀਆਂ ਸਨ।
ਕਾਰਪੋਰੇਸ਼ਨਲ ਮਾਈਕਲ ਮੈਕਲਾਫਲਿਨ ਨੇ ਦੱਸਿਆ ਕਿ ਮਹਿਲਾ ਨੇ ਪੁਲਿਸ ਨੂੰ ਸਫਾਈ ਦਿੰਦਿਆਂ ਕਿਹਾ ਕਿ ਉਹ ਸਿਰਫ਼ ਖਿਆਲਾਂ ਵਿਚ ਗੁੰਮ ਸੀ ਅਤੇ ਉਸ ਦੇ ਹੱਥ ਸਟੇਅਰਿੰਗ 'ਤੇ ਹੀ ਸਨ। ਹਾਲਾਂਕਿ, ਗੱਡੀ ਵਿਚ ਕੈਮਰੇ ਦੀ ਵੀਡੀਓ ਨੇ ਮਹਿਲਾ ਦੇ ਦਾਅਵੇ ਨੂੰ ਝੂਠਾ ਕਰ ਦਿੱਤਾ।
ਕਾਰਪੋਰੇਸ਼ਨਲ ਮੈਕਲਾਫਲਿਨ ਨੇ ਸਪੱਸ਼ਟ ਕੀਤਾ ਕਿ ਭਾਵੇਂ ਕੁਝ ਇਲੈਕਟ੍ਰਿਕ ਗੱਡੀਆਂ ਵਿਚ ਸਵੈ-ਡਰਾਈਵਿੰਗ ਮੋਡ ਹੁੰਦਾ ਹੈ ਪਰ ਬੀ.ਸੀ. ਦੇ ਕਾਨੂੰਨ ਮੁਤਾਬਕ ਇਨ੍ਹਾਂ ਸਿਸਟਮ ਦੀ ਵਰਤੋਂ ਕਰਨਾ ਗੈਰ-ਕਾਨੂੰਨੀ ਹੈ। ਡਰਾਈਵਰ ਦਾ ਹਰ ਵੇਲੇ ਸੁਚੇਤ ਰਹਿਣਾ ਜ਼ਰੂਰੀ ਹੈ।
