9.43C Vancouver 9.43C VancouverFeb 4, 2020 11:48 PM -
ਬ੍ਰਿਟਿਸ਼ ਕੋਲੰਬੀਆ ਦੇ ਦੱਖਣਪੱਛਮੀ ਖੇਤਰ ਤੋਂ ਖਬਰਾਂ ਆ ਰਹੀਆਂ ਹਨ ਕਿ ਕਈ ਫਰਸਟ ਨੇਸ਼ਨਸ ਵੱਲੋਂ ਆਖਿਆ ਜਾ ਰਿਹਾ ਹੈ ਕਿ ਓਹ ਟ੍ਰਾਂਸ ਮਾਊਂਟੇਨ ਪਾਈਪਲਾਈਨ ਦੇ ਵਿਸਥਾਰ ਖਿਲਾਫ ਆਪਣੀ ਲੜਾਈ ਜਾਰੀ ਰੱਖਣਗੇ।
ਹਾਲਾਂਕਿ ਇਸੇ ਦੌਰਾਨ ਕਈ ਵਪਾਰਿਕ ਅਦਾਰੇ ਅਦਾਲਤ ਦੇ ਫੈਸਲੇ ਦਾ ਸਵਾਗਤ ਕਰ ਰਹੇ ਹਨ।
ਅਦਾਲਤ ਦੇ ਫੈਸਲੇ ਨੂੰ ਲੈਕੇ ਐਲਬਰਟਾ ਦੇ ਪ੍ਰੀਮਿਅਰ ਜੇਸਨ ਕੈਨੀ ਨੇ ਵੀ ਖੁਸ਼ੀ ਜ਼ਹਿਰ ਕੀਤੀ ਹੈ।
ਫੈਡਰਲ ਕੋਰਟ ਆਫ ਅਪੀਲ (Federal Court of Appeal) ਵੱਲੋਂ, ਅੱਜ ਟਰਾਂਸ ਮਾਊਂਟਨ ਪਾਈਪਲਾਈਨ ਦੇ ਵਿਸਥਾਰ ਨੂੰ ਦਿੱਤੀ ਗਈ ਚੁਣੌਤੀ ਨੂੰ ਖਾਰਿਜ ਕਰ ਦਿੱਤਾ ਗਿਆ ਹੈ।
ਪਿਛਲੇ ਸਾਲ ਫੈਡਰਲ ਸਰਕਾਰ ਵੱਲੋਂ ਪ੍ਰਾਜੈਕਟ ਨੂੰ ਦਿੱਤੀ ਗਈ ਹਰੀ ਝੰਡੀ ਤੋਂ ਬਾਅਦ, ਬੀ.ਸੀ. ਦੇ ਫਰਸਟ ਨੇਸ਼ਨਸ ਵੱਲੋਂ ਗਰਮੀ ਰੁੱਤੇ, ਅਦਾਲਤ ਵਿੱਚ ਇਸ ਫੈਸਲੇ ਨੂੰ ਚੁਣੌਤੀ ਦਿੱਤੀ ਗਈ ਸੀ।
ਫੈਡਰਲ ਅਦਾਲਤ ਮੁਤਾਬਕ ਇੰਡੀਜਨਸ ਗਰੁੱਪਜ਼ ਵਲੋਂ ਇਹ ਸਾਬਤ ਨਹੀਂ ਕੀਤਾ ਗਿਆ ਕਿ, ਕੈਨੇਡਾ ਨੇ ਫਰਸਟ ਨੇਸ਼ਨਸ ਨਾਲ ਸਲਾਹ ਮਸ਼ਵਰਾ ਕਰਨ ਦਾ ਆਪਣਾ ਫਰਜ਼ ਨਹੀਂ ਨਿਭਾਇਆ।
ਦਸੰਬਰ ਵਿੱਚ ਅਦਾਲਤ ਦੀ ਸੁਣਵਾਈ ਵਿੱਚ ਮੁੱਖ ਕੇਂਦਰ, ਅਗਸਤ 2018 ਤੋਂ ਜੂਨ 2019 ਦਰਮਿਆਨ ਸਰਕਾਰ ਅਤੇ ਫਰਸਟ ਨੇਸ਼ਨਜ਼ ਵਿਚਕਾਰ ਹੋਈ, ਗੱਲਬਾਤ ਦਾ ਦੌਰ ਸੀ।
ਫੈਡਰਲ ਸਰਕਾਰ ਨੇ ਆਪਣਾ ਪੱਖ ਪੇਸ਼ ਕਰਦੇ ਹੋਏ ਕਿਹਾ ਸੀ ਕਿ ਇਹ ਸਲਾਹ ਮਸ਼ਵਰਾ ਅਹਿਮ ਸੀ ਅਤੇ ਫਰਸਟ ਨੇਸ਼ਨਸ ਦੇ ਦਿੱਤੇ ਸੁਝਾਵਾਂ ਉੱਤੇ ਅਮਲ ਕੀਤਾ ਗਿਆ ਹੈ, ਅਤੇ ਵਾਤਾਵਰਨ ਦੀ ਸੰਭਾਲ ਸਬੰਧੀ ਅਹਿਮ ਫੈਸਲੇ ਲਏ ਗਏ ਸਨ।
ਅਦਾਲਤ 'ਚ ਫੈਸਲਾ ਇੱਕ ਪਾਸੜ ਤਰੀਕੇ ਦੇ ਨਾਲ 3-0 ਦੇ ਫਰਕ ਨਾਲ ਸਰਕਾਰ ਦੇ ਪੱਖ 'ਚ ਰਿਹਾ।
4 ਅਪੀਲਾਂ ਦੇ ਮਸਲੇ ਤੇ 95 ਸਫਿਆਂ ਦੇ ਫੈਸਲੇ 'ਚ ਕੋਰਟ ਨੇ ਕਿਹਾ ਕਿ ਓਹ ਇਸੇ ਨਤੀਜੇ ਤੇ ਪਹੁੰਚੇ ਹਨ ਕਿ ਇਸਦੇ ਵਿੱਚ ਦਖਲ ਦਾ ਕੋਈ ਆਧਾਰ ਨਜਰ ਨਹੀਂ ਆਉਂਦਾ।
ਹਾਲਾਂਕਿ First Nations ਕੋਲ ਅਜੇ ਸੁਪ੍ਰੀਮ ਕੋਰਟ 'ਚ ਅਪੀਲ ਕਰਨ ਲਈ 60 ਦਿਨ ਦਾ ਸਮਾਂ ਹੈ।
