ਬੀ.ਸੀ. ਦਾ ਭਗੌੜਾ, ਗੈਂਗਲੈਂਡ ਕਾਤਲ ਕਤਰ ਵਿੱਚ ਗ੍ਰਿਫ਼ਤਾਰ: ਪੁਲਿਸ

ਬੀ.ਸੀ. ਦੇ ਮੋਸਟ ਵਾਂਟੇਡ ਗੈਂਗਸਟਰ ਰਬੀਹ ਅਲਖਲੀਲ ਦੀ ਗ੍ਰਿਫਤਾਰੀ ਹੋ ਗਈ ਹੈ। ਬੀ. ਸੀ. ਦੀ ਕੰਬਾਈਨਡ ਫੋਰਸਿਜ਼ ਸਪੈਸ਼ਲ ਇਨਫੋਰਸਮੈਂਟ ਯੂਨਿਟ ਨੇ ਉਸ ਦੇ ਕਤਰ ਵਿਚ ਹਿਰਾਸਤ ਵਿਚ ਹੋਣ ਦੀ ਪੁਸ਼ਟੀ ਕੀਤੀ ਹੈ।ਅਲਖਲੀਲ ਪਿਛਲੇ ਦੋ ਸਾਲਾਂ ਤੋਂ ਕੈਨੇਡਾ ਦੇ ਬੋਲੋ ਪ੍ਰੋਗਰਾਮ ਤਹਿਤ 25 ਮੋਸਟ ਵਾਂਟੇਡ ਸੂਚੀ ਵਿਚ ਸੀ।

ਉਹ ਵੈਨਕੂਵਰ ਦੀ ਇੱਕ ਜਿਊਰੀ ਵਲੋਂ ਉਸ ਨੂੰ 2012 ਵਿਚ ਵਿਰੋਧੀ ਗੈਂਗ ਦੇ ਮੈਂਬਰ ਸੰਦੀਪ ਦੁਹਰੇ ਦੇ ਕਤਲ ਮਾਮਲੇ ਵਿਚ ਪਹਿਲੀ-ਡਿਗਰੀ ਦੇ ਕਤਲ ਦਾ ਦੋਸ਼ੀ ਠਹਿਰਾਏ ਜਾਣ ਤੋਂ ਇੱਕ ਮਹੀਨਾ ਪਹਿਲਾਂ ਜੁਲਾਈ 2022 ਵਿਚ ਨੌਰਥ ਫਰੇਜ਼ਰ ਪ੍ਰੀ-ਟ੍ਰਾਇਲ ਜੇਲ੍ਹ ਤੋਂ ਫਰਾਰ ਹੋ ਗਿਆ ਸੀ।

ਉਸ ਨੂੰ ਦੁਹਰੇ ਦੇ ਨਾਲ-ਨਾਲ ਗੈਂਗਸਟਰ ਸੁੱਖ ਢੱਕ ਨੂੰ ਮਾਰਨ ਦੀ ਸਾਜ਼ਿਸ਼ ਰਚਣ ਦਾ ਵੀ ਦੋਸ਼ੀ ਠਹਿਰਾਇਆ ਗਿਆ ਸੀ, ਜਿਸ ਨੂੰ ਨਵੰਬਰ 2012 ਵਿਚ ਬਰਨਬੀ ਵਿਚ ਗੋਲੀ ਮਾਰ ਕੇ ਮਾਰ ਦਿੱਤਾ ਗਿਆ ਸੀ।

ਕੋਕਟਲਮ ਦੀ ਜੇਲ੍ਹ ਤੋਂ ਭੱਜਣ ਦੇ ਮਾਮਲੇ ਵਿਚ 8 ਸਤੰਬਰ ਨੂੰ ਬੀ. ਸੀ. ਪੁਲਿਸ ਨੇ ਉਸ ਉਤੇ ਹੋਰ ਨਵੇਂ ਚਾਰਜਿਜ਼ ਲਗਾਉਣ ਦਾ ਐਲਾਨ ਕੀਤਾ ਸੀ। ਬੀ. ਸੀ. ਕੰਬਾਈਨਡ ਫੋਰਸਿਜ਼ ਸਪੈਸ਼ਲ ਇਨਫੋਰਸਮੈਂਟ ਯੂਨਿਟ ਦੀ ਮੀਡੀਆ ਰਿਲੇਸ਼ਨ ਅਫ਼ਸਰ ਕਾਉਂਸਲਰ ਸਰਬਜੀਤ ਕੇ. ਸੰਘਾ ਨੇ ਅਲਖਲੀਲ ਦੀ ਗ੍ਰਿਫਤਾਰੀ ਲਈ ਕਤਰ ਦੇ ਗ੍ਰਹਿ ਮੰਤਰਾਲਾ ਦਾ ਧੰਨਵਾਦ ਕੀਤਾ।