ਬੀ.ਸੀ. ਲਿਬਰਲ ਲੀਡਰ ਐਂਡਰਿਊ ਵਿਲਕਿਨਸਨ ਨੇ ਜੌਹਨ ਹੋਰਗਨ ਨੂੰ ਚੋਣਾਂ ਵਿੱਚ ਜਿੱਤ ਹਾਸਿਲ ਕਰਨ ਲਈ ਵਧਾਈ ਦਿੱਤੀ

ਬ੍ਰਿਟਿਸ਼ ਕੋਲੰਬੀਆ ਦੇ ਚੋਣਾਂ ਦੇ ਨਤੀਜੇ ਇੱਕ ਵੰਡਿਆ ਸੂਬਾ ਦਰਸਾਉਂਦੇ ਹਨ, ਜਿੱਥੇ ਬੀ.ਸੀ. ਦੀ ਲਿਬਰਲ ਪਾਰਟੀ ਨੂੰ ਕਈ ਪੇਂਡੂ ਇਲਾਕਿਆਂ ਵਿੱਚ ਜਿੱਤ ਹਾਸਿਲ ਹੋਈ ਹੈ ਓਥੇ ਹੀ ਐਨ.ਡੀ.ਪੀ. ਸ਼ਹਿਰੀ ਹਲਕਿਆਂ ਵਿੱਚ ਜੇਤੂ ਰਹੀ ਪਰ ਪ੍ਰੀਮੀਅਰ ਜੌਹਨ ਹੋਰਗਨ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀ ਸਰਕਾਰ ਰਾਜਨੀਤੀ ਨਹੀਂ, ਚੰਗੇ ਵਿਚਾਰਾਂ ਨਾਲ ਪ੍ਰਭਾਵਿਤ ਹੋਵੇਗੀ।

ਹੋਰਗਨ ਮੁਤਾਬਕ ਹੁਣ ਉਨ੍ਹਾਂ ਦੀ ਬਹੁਮਤ ਸਰਕਾਰ ਹੋ ਜਾਣ ਨਾਲ, ਉਹ ਲੈਜਿਸਲੇਚਰ ਤੋਂ ਬਾਹਰ ਸੂਬੇ ਭਰ ਵਿੱਚ ਲੋਕਾਂ ਨੂੰ ਮਿਲਣ ਲਈ ਵਕਤ ਕੱਢਣਾ ਚਾਹੁੰਦੇ ਹਨ।

ਬੀ.ਸੀ. ਲਿਬਰਲ ਲੀਡਰ ਐਂਡਰਿਊ ਵਿਲਕਿਨਸਨ ਨੇ ਸ਼ਨੀਵਾਰ ਨੂੰ ਹਾਰ ਕੁਬੂਲ ਨਹੀਂ ਕੀਤੀ ਪਰ ਐਤਵਾਰ ਨੂੰ ਟਵੀਟ ਰਾਹੀਂ ਉਨ੍ਹਾਂ ਇਹ ਗੱਲ ਸਾਂਝੀ ਕੀਤੀ ਕਿ ਉਨ੍ਹਾਂ ਨੇ ਹੋਰਗਨ ਨੂੰ ਜਿੱਤ ਦੀ ਵਧਾਈ ਦੇ ਦਿੱਤੀ ਹੈ।

ਡਾਕ ਰਾਹੀਂ ਭੇਜੀਆਂ ਗਈਆਂ ਤਕਰੀਬਨ, 600,000 ਵੋਟਾਂ ਦੀ ਗਿਣਤੀ ਹੋਣੀ ਬਾਕੀ ਹੈ ਪਰ ਸ਼ਨੀਵਾਰ ਰਾਤ ਆਏ ਨਤੀਜਿਆਂ ਮੁਤਾਬਕ ਬੀ.ਸੀ. ਐਨ.ਡੀ.ਪੀ. ਦੇ ਉਮੀਦਵਾਰ 87 ਵਿੱਚੋਂ 55 ਹਲਕਿਆਂ ਤੇ ਜੇਤੂ ਕਰਾਰ ਦਿੱਤੇ ਜਾ ਚੁੱਕੇ ਹਨ ਜਾਂ ਫਿਰ ਉਨ੍ਹਾਂ ਨੂੰ ਬੜਤ ਹਾਸਲ ਹੈ। ਇਸ ਦੇ ਮੁਕਾਬਲੇ ਬੀ.ਸੀ. ਲਿਬਰਲ ਪਾਰਟੀ 27 ਅਤੇ ਬੀ.ਸੀ. ਗ੍ਰੀਨ ਪਾਰਟੀ 3 ਸੀਟਾਂ ਤੇ ਅੱਗੇ ਹੈ।

ਹੋਰਗਨ ਨੇ ਆਪਣੇ ਸੰਬੋਧਨ ਦੌਰਾਨ ਕਿਹਾ ਕਿ ਉਨ੍ਹਾਂ ਦੀ ਪਾਰਟੀ ਸੂਬੇ ਭਰ ਵਿਚੋਂ ਵਿਚਾਰਾਂ ਦਾ ਅਦਾਨ ਪ੍ਰਦਾਨ ਚਾਹੁੰਦੀ ਹੈ ਅਤੇ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ ਕਿ ਇਹ ਸੁਝਾਅ ਕਿਹੜੀ ਪਾਰਟੀ ਦੇ ਲੋਕਾਂ ਤੋਂ ਆਏ ਹਨ।

ਉਨ੍ਹਾਂ ਕਿਹਾ ਕਿ ਜੇ ਇਹ ਸੁਝਾਅ ਵਧੀਆ ਹਨ ਤਾਂ ਸਰਕਾਰ ਇਨ੍ਹਾਂ ਨੂੰ ਲਾਗੂ ਕਰਨ ਸੰਬੰਧੀ ਕਦਮ ਚੁੱਕੇਗੀ।