ਨਾਨਾਇਮੋ ਦੇ ਇੱਕ ਸ਼ਖਸ ਨੂੰ ਨਸ਼ੇ ਅਤੇ ਹਥਿਆਰਾਂ ਦੇ ਮਾਮਲੇ ਵਿਚ ਪੰਜ ਸਾਲ ਦੀ ਹੋਈ ਸਜ਼ਾ

ਨਾਨਾਇਮੋ ਦੇ ਇੱਕ ਸ਼ਖਸ ਨੂੰ ਨਸ਼ੇ ਅਤੇ ਹਥਿਆਰਾਂ ਦੇ ਮਾਮਲੇ ਵਿਚ ਪੰਜ ਸਾਲ ਦੀ ਸਜ਼ਾ ਹੋਈ ਹੈ ਅਤੇ ਉਸ 'ਤੇ ਹਥਿਆਰ ਰੱਖਣ 'ਤੇ ਲਾਈਫਟਾਈਮ ਪਾਬੰਦੀ ਲਗਾਈ ਗਈ ਹੈ। ਕੋਡੀ ਐਡਵਰਡ ਰੇਂਜਰ ਨਾਂ ਦੇ ਮੁਲਜ਼ਮ ਖਿਲਾਫ ਜਾਂਚ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਵਲੋਂ ਵੈਨਕੂਵਰ ਏਅਰਪੋਰਟ 'ਤੇ ਗੈਰ ਕਾਨੂੰਨੀ ਸਾਈਲੈਂਸਰ ਫੜ੍ਹੇ ਜਾਣ ਤੋਂ ਬਾਅਦ ਸ਼ੁਰੂ ਹੋਈ ਸੀ।

ਏਜੰਸੀ ਨੇ 2022 ਵਿਚ ਤਿੰਨ ਅਸਲਾ ਸਾਈਲੈਂਸਰ ਫੜ੍ਹੇ ਸਨ ਅਤੇ ਇਸ ਤੋਂ ਬਾਅਦ ਮਈ 2023 ਵਿਚ ਸੀ.ਬੀ.ਐਸ.ਏ ਤੇ ਆਰਸੀਐਮਪੀ ਮੈਂਬਰ ਨੇ ਨਾਨਾਇਮੋ ਸਥਿਤ ਇੱਕ ਘਰ ਅਤੇ ਦੋ ਵਾਹਨਾਂ 'ਤੇ ਛਾਪੇਮਾਰੀ ਵਿਚ ਦੋ ਅਣਪਛਾਤੀਆਂ ਬੰਦੂਕਾਂ, 335 ਗ੍ਰਾਮ ਕੋਕੀਨ ਤੇ 119 ਗ੍ਰਾਮ ਮੈਥਾਮਫੇਟਾਮਾਈਨ ਸਣੇ ਇੱਕ ਰਾਈਫਲ ਅਤੇ ਇੱਕ ਗੈਰਕਾਨੂੰਨੀ ਸ਼ਾਟਗਨ ਜ਼ਬਤ ਕੀਤੇ।

ਏਜੰਸੀ ਦਾ ਕਹਿਣਾ ਹੈ ਕਿ ਉਸ ਨੇ ਪਿਛਲੇ ਮਈ ਵਿਚ ਐਡਵਰਡ ਰੇਂਜਰ 'ਤੇ ਹਥਿਆਰਾਂ ਅਤੇ ਨਸ਼ੀਲੇ ਪਦਾਰਥ ਰੱਖਣ ਦੇ ਦੋਸ਼ ਲਗਾਏ ਸਨ। ਨਾਨਾਇਮੋ ਪ੍ਰੋਵਿੰਸ਼ੀਅਲ ਕੋਰਟ ਵਿਚ ਉਸ ਨੇ ਲੰਘੇ ਬੁੱਧਵਾਰ ਦੋਸ਼ ਸਵੀਕਾਰ ਕੀਤੇ ਅਤੇ ਅਦਾਲਤ ਵਲੋਂ ਉਸ ਨੂੰ ਡੀਐਨਏ ਸੈਂਪਲ ਦੇਣ ਲਈ ਵੀ ਹੁਕਮ ਦਿੱਤੇ ਗਏ ਹਨ।