ਬੀ. ਸੀ. ਦੇ ਪ੍ਰੀਮੀਅਰਜ਼ ਨੇ ਓਇਲ ਟੈਂਕਰ ਬੈਨ ਨੂੰ ਬਰਕਰਾਰ ਰੱਖਣ ਦੀ ਕੀਤੀ ਮੰਗ

ਬੀ. ਸੀ. ਦੇ ਪ੍ਰੀਮੀਅਰ ਡੇਵਿਡ ਈਬੀ ਅਤੇ ਕੋਸਟਲ ਫਰਸਟ ਨੇਸ਼ਨ ਦੇ ਲੀਡਰਸ ਨੇ ਇੱਕ ਜੁਆਇੰਟ ਡੈਕਲਾਰੇਸ਼ਨ 'ਤੇ ਸਾਈਨ ਕਰਦੇ ਹੋਏ ਫੈਡਰਲ ਸਰਕਾਰ ਨੂੰ ਸੂਬੇ ਦੇ ਨੌਰਥ ਕੌਸਟ ਲਈ ਮੌਜੂਦਾ ਓਇਲ ਟੈਂਕਰ ਬੈਨ ਨੂੰ ਬਰਕਰਾਰ ਰੱਖਣ ਦੀ ਮੰਗ ਕੀਤੀ ਹੈ। ਬੀ. ਸੀ. ਦੇ ਇਸ ਕਦਮ ਨਾਲ ਐਲਬਰਟਾ ਨਾਲ ਟਕਰਾਅ ਵਧਣ ਦੀ ਸੰਭਾਵਨਾ ਹੈ, ਜਿਥੋਂ ਦੀ ਪ੍ਰੀਮੀਅਰ ਡੈਨੀਅਲ ਸਮਿਥ ਵਲੋਂ ਬੀ.ਸੀ. ਕੋਸਟ ਤੱਕ ਇੱਕ ਨਵੀਂ ਓਇਲ ਪਾਈਪਲਾਈਨ ਵਿਛਾਉਣ ਲਈ ਇਸ ਬੈਨ ਨੂੰ ਹਟਾਉਣ ਵਾਸਤੇ ਫੈਡਰਲ ਸਰਕਾਰ ਕੋਲ ਲਾਬਿੰਗ ਕੀਤੀ ਜਾ ਰਹੀ ਹੈ।

ਈਬੀ ਅਤੇ ਕੋਸਟਲ ਫਰਸਟ ਨੇਸ਼ਨ ਦੀ ਜੁਆਇੰਟ ਡੈਕਲਾਰੇਸ਼ਨ ਵਿਚ ਇਸ ਬੈਨ ਨੂੰ ਤੱਟਵਰਤੀ ਵਾਤਾਵਰਣ ਅਤੇ ਆਰਥਿਕਤਾ, ਜਿਸ ਵਿਚ ਸੀਫੂਡ ਅਤੇ ਟੂਰਿਜ਼ਮ ਵਰਗੇ ਸੈਕਟਰ ਸ਼ਾਮਲ ਹਨ, ਦੀ ਸੁਰੱਖਿਆ ਲਈ ਮਹੱਤਵਪੂਰਨ ਦੱਸਿਆ ਗਿਆ ਹੈ। ਕਿਹਾ ਗਿਆ ਹੈ ਕਿ ਬੈਨ ਹਟਾਉਣ ਨਾਲ ਨਾ ਪੂਰਾ ਹੋਣ ਵਾਲਾ ਨੁਕਸਾਨ ਅਤੇ ਵੱਡੇ ਨਿਵੇਸ਼ ਤੇ ਜੌਬਸ ਨੂੰ ਖ਼ਤਰਾ ਪੈਦਾ ਹੋ ਸਕਦਾ ਹੈ।

ਇਸ ਘੋਸ਼ਣਾ 'ਤੇ ਪ੍ਰੀਮੀਅਰ ਈਬੀ , ਕੋਸਟਲ ਫਰਸਟ ਨੇਸ਼ਨ ਦੇ ਪ੍ਰਧਾਨ, ਹਾਇਡਾ ਨੇਸ਼ਨ ਦੇ ਪ੍ਰਧਾਨ ਅਤੇ ਹੋਰ ਲੀਡਰਸ ਦੇ ਦਸਤਖ਼ਤ ਸ਼ਾਮਲ ਹਨ। ਇਹ ਉਦੋਂ ਹੈ ਜਦੋਂ ਈਬੀ ਇਹ ਕਹਿੰਦੇ ਆ ਰਹੇ ਹਨ ਕਿ ਕੋਸਟ ਤੱਕ ਪਾਈਪਲਾਈਨ ਜਾਂ ਉਸ ਖੇਤਰ ਵਿਚ ਓਇਲ ਟੈਂਕਰ ਲਈ ਕੋਈ ਜਨਤਕ ਸਪੋਰਟ ਨਹੀਂ ਹੈ।