ਪ੍ਰੀਮੀਅਰ ਈਬੀ ਨੇ ਚੀਨ ਦਾ ਵਪਾਰਕ ਦੌਰਾ ਘਟਾਇਆ, ਨਵੀਂ ਪਾਈਪਲਾਈਨ 'ਤੇ ਸਿਆਸਤ ਗਰਮ

ਪ੍ਰੀਮੀਅਰ ਡੇਵਿਡ ਈਬੀ ਨੇ ਚੀਨ ਲਈ ਆਪਣੇ ਵਪਾਰਕ ਦੌਰੇ ਨੂੰ ਘਟਾ ਕੇ ਤਿੰਨ ਦਿਨਾਂ ਲਈ ਕਰ ਦਿੱਤਾ ਹੈ, ਪਹਿਲਾਂ ਇਹ 27 ਜੂਨ ਤੋਂ 3 ਜੁਲਾਈ ਤੱਕ ਦੇ ਇੱਕ ਹਫ਼ਤੇ ਲਈ ਤੈਅ ਕੀਤਾ ਗਿਆ ਸੀ। ਇਸ ਵਿਜ਼ਿਟ ਵਿਚ ਕਟੌਤੀ ਉਦੋਂ ਕੀਤੀ ਗਈ ਹੈ ਜਦੋਂ ਐਲਬਰਟਾ ਵਲੋਂ 1 ਜੁਲਾਈ ਨੂੰ ਨਵੀਂ ਤੇਲ ਪਾਈਪਲਾਈਨ ਲਈ ਫੈਡਰਲ ਮਨਜ਼ੂਰੀ ਵਾਸਤੇ ਰਸਮੀ ਤੌਰ 'ਤੇ ਅਰਜ਼ੀ ਦੇਣ ਦੀ ਉਮੀਦ ਹੈ।

ਈਬੀ ਲਗਾਤਾਰ ਇਸ ਪ੍ਰਸਤਾਵ ਦਾ ਵਿਰੋਧ ਕਰਦੇ ਆ ਰਹੇ ਹਨ। ਹਾਲਾਂਕਿ, ਪ੍ਰੀਮੀਅਰ ਨੇ ਚੀਨ ਦਾ ਦੌਰਾ ਘਟਾਏ ਜਾਣ ਨੂੰ ਲੈ ਕੇ ਬੀਤੇ ਕੱਲ੍ਹ ਪੱਤਰਕਾਰਾਂ ਨੂੰ ਦੱਸਿਆ ਕਿ ਬੀ. ਸੀ. ਦਾ ਇੱਕ MoU ਪੈਂਡਿੰਗ ਹੈ ਅਤੇ ਫੈਡਰਲ ਸਰਕਾਰ ਨੇ ਉਨ੍ਹਾਂ ਨੂੰ ਜੁਲਾਈ ਦੇ ਸ਼ੁਰੂ ਵਿਚ ਫਾਈਨਲ ਹੋਣ ਵਾਲੇ ਇਸ ਸਮਝੌਤੇ ਦੇ ਸੰਭਾਵਤ ਐਲਾਨ ਲਈ ਹਾਜ਼ਰ ਰਹਿਣ ਦੀ ਬੇਨਤੀ ਕੀਤੀ ਹੈ।

ਈਬੀ ਮੁਤਾਬਕ, ਇਸ MoU ਵਿਚ ਮੈਸੀ ਸੁਰੰਗ ਦੇ ਰੀਪਲੇਸਮੈਂਟ ਲਈ ਵੀ ਫੰਡਿੰਗ ਸ਼ਾਮਲ ਹੋ ਸਕਦੀ ਹੈ। ਪ੍ਰੀਮੀਅਰ ਨੇ ਕਿਹਾ ਕਿ ਮੇਰਾ ਫੋਕਸ ਬੀ. ਸੀ. ਦੇ ਪ੍ਰੋਜਕੈਟਸ 'ਤੇ ਹੈ ਅਤੇ ਉਹ ਐਲਬਰਟਾ ਦੇ ਪ੍ਰੋਜੈਕਟਸ 'ਤੇ ਧਿਆਨ ਕੇਂਦਰਿਤ ਨਹੀਂ ਕਰ ਰਹੇ ਹਨ। ਦੂਜੇ ਪਾਸੇ, ਬੀ.ਸੀ. ਕੰਜ਼ਰਵੇਟਿਵ ਦਾ ਮੰਨਣਾ ਹੈ ਕਿ ਸੂਬੇ ਦੇ ਅਨੁਮਾਨਿਤ $13.3 ਬਿਲੀਅਨ ਦੇ ਘਾਟੇ ਨੂੰ ਦੇਖਦਿਆਂ ਬੀ.ਸੀ. ਕੋਸਟ ਤੱਕ ਪਾਈਪਲਾਈਨ ਲਿਆਉਣ ਦੇ ਪ੍ਰੋਜੈਕਟ ਦਾ ਸਮਰਥਨ ਕੀਤਾ ਜਾਣਾ ਚਾਹੀਦਾ ਹੈ।