ਬੀ.ਸੀ. 'ਚ ਵੀ ਕੋਵਿਡ-19 ਸੰਬੰਧੀ ਆਈਸੋਲੇਸ਼ਨ ਦੇ ਨਿਯਮਾਂ 'ਚ ਬਦਲਾਅ, ਹੁਣ 5 ਦਿਨ ਬਾਅਦ ਹੋ ਸਕੇਗੀ ਆਮ ਜੀਵਨ 'ਚ ਵਾਪਸੀ

ਬੀ.ਸੀ. ਦੇ ਵਿੱਚ ਕੋਵਿਡ-19 ਸੰਬੰਧੀ ਆਈਸੋਲੇਸ਼ਨ ਪੀਰੀਅਡ ਨੂੰ 5 ਦਿਨ ਕੀਤਾ ਜਾ ਰਿਹਾ ਹੈ। ਇਸ ਸੰਬੰਧੀ ਐਲਾਨ ਅੱਜ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਨੇ ਕੀਤਾ। ਉਨ੍ਹਾਂ ਕਿਹਾ ਕਿ ਜਿਹੜੇ ਲੋਕ ਵੈਕਸੀਨ ਦੀਆਂ ਦੋਵੇਂ ਖੁਰਾਕਾਂ ਹਾਸਿਲ ਕਰ ਚੁੱਕੇ ਹਨ, ਉਹ ਕੋਵਿਡ-19 ਤੋਂ ਪੀੜਤ ਹੋਣ ਤੋਂ ਬਾਅਦ 5 ਦਿਨ ਦੀ ਆਈਸੋਲੇਸ਼ਨ ਤੋਂ ਬਾਅਦ ਆਮ ਜੀਵਨ 'ਚ ਵਾਪਸੀ ਕਰ ਸਕਦੇ ਹਨ। ਹਾਲਾਂਕਿ ਅਜਿਹਾ ਉਸੇ ਵੇਲੇ ਕੀਤਾ ਜਾ ਸਕੇਗਾ, ਜੇਕਰ ਵਾਇਰਸ ਪੀੜਤ ਨੂੰ ਕੋਈ ਲੱਛਣ ਨਾ ਹੋਣ। ਵਾਇਰਸ ਪੀੜਤ ਅਨਵੈਕਸੀਨੇਟਿਡ ਲੋਕਾਂ ਲਈ ਆਈਸੋਲੇਸ਼ਨ ਪੀਰੀਅਡ ਨੂੰ 10 ਦਿਨ ਦਾ ਹੀ ਰੱਖਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਸੂਬੇ ਦੀ ਰਿਸਕ ਮਿਟੀਗੇਸ਼ਨ ਸਟ੍ਰੇਟਜੀ ਹੈ। ਉਨ੍ਹਾਂ ਕਿਹਾ ਕਿ ਓਮੀਕਰੌਨ ਵੇਰੀਐਂਟ ਸੰਬੰਧੀ ਲੱਛਣ ਜਲਦੀ ਸਥਾਪਿਤ ਹੁੰਦੇ ਹਨ ਪਰ ਇਹ ਜਲਦੀ ਹੀ ਠੀਕ ਵੀ ਹੋ ਰਹੇ ਹਨ ਅਤੇ ਇਸੇ ਕਾਰਨ ਇਹ ਫੈਸਲਾ ਲਿਆ ਗਿਆ ਹੈ। ਉਨ੍ਹਾਂ ਇਹ ਵੀ ਐਲਾਨ ਕੀਤਾ ਕਿ ਸੂਬੇ 'ਚ ਕੱਲ ਤੋਂ ਲੌਂਗ ਟਰਮ ਕੇਅਰ ਹੋਮਸ ਵਿੱਚ ਵਿਜ਼ਿਟਸ 'ਤੇ ਪਬੰਦੀ ਲਗਾਈ ਜਾ ਰਹੀ ਹੈ। ਕੱਲ ਤੋਂ ਸਿਰਫ ਅਸੈਂਸ਼ੀਅਲ ਵਿਜ਼ਿਟਰ ਹੀ ਲੌਂਗ ਟਰਮ ਕੇਅਰ ਹੋਮਸ ਤਕ ਪਹੁੰਚ ਕਰ ਸਕਣਗੇ।

ਬੀ.ਸੀ. 'ਚ 6 ਹੋਰ ਹੈਲਥ ਕੇਅਰ ਆਊਟਬ੍ਰੇਕਸ ਐਲਾਨੀਆਂ

ਬੀ.ਸੀ. ਵਿੱਚ 6 ਹੋਰ ਹੈਲਥ ਕੇਅਰ ਫੈਸਿਲਿਟੀਸ 'ਚ ਕੋਵਿਡ-19 ਆਊਟਬ੍ਰੇਕ ਐਲਾਨੀ ਗਈ ਹੈ। ਫਰੇਜ਼ਰ ਹੈਲਥ ਵਿੱਚ ਸਥਿਤ ਮਿਸ਼ਨ ਮੈਮੋਰੀਅਲ ਹਸਪਤਾਲ, ਨਿਊ ਵਿਸਟਾ ਕੇਅਰ ਸੈਂਟਰ, ਚਾਰਟਵੈਲ ਲੈਂਗਲੀ ਗਾਰਡਨਸ, ਚਾਰਟਵੈਲ ਕਾਰਲਟਨ ਗਾਰਡਨਸ, ਚਾਰਟਵੈਲ ਕ੍ਰੇਸੇਂਟ ਗਾਰਡਨਸ ਅਤੇ ਗਿਲਫੋਰਡ ਸੀਨੀਅਰਸ ਵਿਲੇਜ ਵਿੱਚ ਕੋਵਿਡ-19 ਆਊਟਬ੍ਰੇਕ ਐਲਾਨੀ ਗਈ ਹੈ। ਇਸ ਦੇ ਨਾਲ ਹੁਣ ਸੂਬੇ 'ਚ ਕੁੱਲ 10 ਲੌਂਗ ਟਰਮ ਅਤੇ ਐਕਿਊਟ ਕੇਅਰ ਫੈਸਿਲਿਟੀਸ ਵਿੱਚ ਆਊਟਬ੍ਰੇਕ ਜਾਰੀ ਹਨ।

ਬੀ.ਸੀ. 'ਚ ਫਿਰ ਤੋਂ ਟੁੱਟਿਆ ਕੋਵਿਡ-19 ਮਾਮਲਿਆਂ ਦੀ ਗਿਣਤੀ ਦਾ ਰਿਕਾਰਡ

ਵੀਰਵਾਰ ਨੂੰ ਬੀ.ਸੀ. 'ਚ ਕੋਵਿਡ-19 ਦੇ 4,383 ਮਾਮਲੇ ਰਿਪੋਰਟ ਹੋਏ ਹਨ। ਇਸ ਨਾਲ ਬੀ.ਸੀ. ਵਿੱਚ ਇੱਕ ਵਾਰ ਫਿਰ ਤੋਂ ਇੱਕੋ ਦਿਨ ਵਿੱਚ ਕੋਵਿਡ-19 ਮਾਮਲਿਆਂ ਦਾ ਰਿਕਾਰਡ ਵਾਧਾ ਦਰਜ ਕੀਤਾ ਗਿਆ ਹੈ। ਇੱਕ ਵਾਇਰਸ ਪੀੜਤਾਂ ਦੀ ਮੌਤ ਰਿਪੋਰਟ ਹੋਈ ਹੈ। ਹੁਣ ਬੀ.ਸੀ. 'ਚ ਕੋਵਿਡ-19 ਦੇ ਕੁੱਲ ਮਾਮਲਿਆਂ ਦੀ ਗਿਣਤੀ ਢਾਈ ਲੱਖ ਦਾ ਅੰਕੜਾ ਪਾਰ ਕਰਦੇ ਹੋਏ 2,51,054 ਤਕ ਪਹੁੰਚ ਗਈ ਹੈ। ਸੂਬੇ 'ਚ ਵਾਇਰਸ ਸੰਬੰਧੀ ਮੌਤਾਂ ਦੀ ਗਿਣਤੀ 2,420 ਹੋ ਚੁੱਕੀ ਹੈ। ਬੀ.ਸੀ. 'ਚ ਵਾਇਰਸ ਸੰਬੰਧੀ ਐਕਟਿਵ ਮਾਮਲਿਆਂ ਦੀ ਗਿਣਤੀ 17,357 ਹੋ ਚੁੱਕੀ ਹੈ। ਇਸ ਵਿੱਚ ਫਰੇਜ਼ਰ ਹੈਲਥ ਵਿੱਚ 7,940, ਵੈਨਕੂਵਰ ਕੋਸਟਲ ਹੈਲਥ ਵਿੱਚ 6,424, ਵੈਨਕੂਵਰ ਆਈਲੈਂਡ ਹੈਲਥ ਵਿੱਚ 856, ਇੰਟੀਰੀਅਰ ਹੈਲਥ ਵਿੱਚ 1,713 ਅਤੇ ਨੌਰਦਰਨ ਹੈਲਥ ਵਿੱਚ 422 ਐਕਟਿਵ ਮਾਮਲੇ ਹੋਣ ਦੀ ਜਾਣਕਾਰੀ ਦਿੱਤੀ ਗਈ ਹੈ। ਕੁੱਲ 211 ਵਾਇਰਸ ਪੀੜਤ ਹਸਪਤਾਲ 'ਚ ਦਾਖਿਲ ਹਨ ਤੇ ਇਸ ਵਿੱਚ 66 ਨੂੰ ਆਈ.ਸੀ.ਯੂ. 'ਚ ਰੱਖਿਆ ਗਿਆ ਹੈ।

ਬੀ.ਸੀ. 'ਚ ਓਮੀਕਰੌਨ ਵੇਰੀਐਂਟ ਦੇ ਮਾਮਲਿਆਂ 'ਚ ਵਾਧਾ ਜਾਰੀ

ਬੀ.ਸੀ. 'ਚ ਓਮੀਕਰੌਨ ਵੇਰੀਐਂਟ ਸੰਬੰਧੀ ਮਾਮਲਿਆਂ ਦੀ ਗਿਣਤੀ 2,825 ਤਕ ਪਹੁੰਚ ਗਈ ਹੈ। ਵੀਰਵਾਰ ਦੀ ਕੋਵਿਡ-19 ਸੰਬੰਧੀ ਅਪਡੇਟ 'ਚ ਦੱਸਿਆ ਗਿਆ ਕਿ, ਸੂਬੇ 'ਚ ਵੈਨਕੂਵਰ ਕੋਸਟਲ ਹੈਲਥ ਵਿੱਚ 1,333, ਫਰੇਜ਼ਰ ਹੈਲਥ ਵਿੱਚ 777, ਇੰਟੀਰੀਅਰ ਹੈਲਥ ਵਿੱਚ 152, ਨੌਰਦਰਨ ਹੈਲਥ ਵਿੱਚ 13 ਅਤੇ ਆਈਲੈਂਡ ਹੈਲਥ ਵਿੱਚ ਵੇਰੀਐਂਟ ਦੇ 548 ਮਾਮਲੇ ਸਾਹਮਣੇ ਆ ਚੁੱਕੇ ਹੈ। ਬੀਤੇ ਇੱਕ ਹਫ਼ਤੇ ਦੌਰਾਨ ਇਸ ਵਾਇਰਸ ਸੰਬੰਧੀ ਮਾਮਲਿਆਂ ਨੇ ਵੱਡੀ ਛਾਲ ਮਾਰੀ ਹੈ। ਯਾਦ ਰਹੇ ਸੂਬੇ ਦੀ ਪ੍ਰੋਵਿੰਸ਼ੀਅਲ ਸਿਹਤ ਅਫ਼ਸਰ, ਡਾ. ਬੌਨੀ ਹੈਨਰੀ ਨੇ ਇਸੇ ਹਫ਼ਤੇ ਦੀ ਅਪਡੇਟ ਦੌਰਾਨ ਕਿਹਾ ਸੀ ਕਿ, ਓਮੀਕਰੌਨ ਵੇਰੀਐਂਟ ਦਾ ਇੰਕਿਉਬੇਸ਼ਨ ਪੀਰੀਅਡ ਹੋਰ ਵੇਰੀਐਂਟਸ ਦੇ ਮੁਕਾਬਲੇ ਵਧੇਰੇ ਰਫਤਾਰ ਵਾਲਾ ਹੈ।