ਬੀ. ਸੀ. 'ਚ ਖਸਰਾ ਪੀੜਤਾਂ ਦੀ ਵਧੀ ਗਿਣਤੀ , ਕੁੱਲ 63 ਮਾਮਲੇ ਹੋਏ ਦਰਜ

ਬੀ.ਸੀ. ਵਿਚ ਖਸਰੇ ਦੇ ਨਵੇਂ 14 ਮਾਮਲੇ ਦਰਜ ਹੋਣ ਨਾਲ ਕੁੱਲ ਪੀੜਤਾਂ ਦੀ ਗਿਣਤੀ 63 ਹੋ ਗਈ ਹੈ। ਬੀ.ਸੀ. ਰੋਗ ਨਿਯੰਤਰਣ ਕੇਂਦਰ ਦੀ ਤਾਜ਼ਾ ਰਿਪੋਰਟ ਵਿਚ ਇਸ ਦੀ ਪੁਸ਼ਟੀ ਹੋਈ ਹੈ। ਮੰਗਲਵਾਰ ਪੀੜਤਾਂ ਦੀ ਗਿਣਤੀ 49 ਦੱਸੀ ਜਾ ਰਹੀ ਸੀ। ਸੂਬੇ ਦੇ ਉੱਤਰੀ ਹੈਲਥ ਖੇਤਰ ਵਿਚ ਖਸਰੇ ਦੇ ਮਾਮਲੇ ਵਧੇਰੇ ਦੇਖਣ ਨੂੰ ਮਿਲ ਰਹੇ ਹਨ, ਇੱਥੇ ਹੁਣ ਤੱਕ 41 ਪੀੜਤਾਂ ਦੀ ਪੁਸ਼ਟੀ ਹੋਈ ਹੈ।

ਹਾਲ ਹੀ ਵਿਚ ਔਫੀਸ਼ੀਅਲਜ਼ ਨੇ ਨੋਟਿਸ ਜਾਰੀ ਕਰਕੇ ਲੋਕਾਂ ਨੂੰ ਅਲਰਟ ਕੀਤਾ ਸੀ ਕਿ ਖਸਰਾ ਪੀੜਤ ਕਈ ਇਲਾਕਿਆਂ ਵਿਚ ਦੇਖੇ ਗਏ ਸਨ। ਕਈ ਫਲਾਈਟਾਂ, ਹਵਾਈ ਅੱਡੇ ਸਣੇ ਕਮਲੂਪਸ ਦੇ ਸਪੋਰਟਸ ਕੰਪਲੈਕਸ ਅਤੇ ਸਪਾ ਵਿਚ ਖਸਰਾ ਪੀੜਤ ਘੁੰਮ ਰਹੇ ਸਨ।

ਇਸ ਕਾਰਨ ਹੋਰਾਂ ਦੇ ਇਸ ਬੀਮਾਰੀ ਦੀ ਲਪੇਟ ਵਿਚ ਆਉਣ ਦਾ ਖਤਰਾ ਹੈ। ਸੂਬੇ ਦੇ ਪ੍ਰੀਮੀਅਰ ਡੇਵਿਡ ਈਬੀ ਨੇ ਅਲਰਟ ਕਰਦਿਆਂ ਕਿਹਾ ਕਿ ਖਸਰੇ ਨੂੰ ਮਜ਼ਾਕ ਵਾਂਗ ਨਾ ਸਮਝਿਆ ਜਾਵੇ, ਇਹ ਬੱਚਿਆਂ ਦੀ ਜਾਨ ਲੈ ਰਿਹਾ ਹੈ।ਔਫੀਸ਼ੀਅਲਜ਼ ਵਲੋਂ ਲੋਕਾਂ ਨੂੰ ਖਸਰੇ ਤੋਂ ਬਚਾਅ ਲਈ ਟੀਕਾਕਰਣ ਕਰਵਾਉਣ ਦੀ ਅਪੀਲ ਕੀਤੀ ਗਈ ਹੈ।