ਐਲਬਰਟਾ 'ਚ ਦੋ ਹਫਤਿਆਂ ਦੇ ਬੱਚੇ 'ਤੇ ਕੁੱਤੇ ਨੇ ਕੀਤਾ ਹਮਲਾ, ਮਾਸੂਮ ਦੀ ਮੌਤ

ਵੈਸਟ ਐਡਮਿੰਟਨ ਦੇ ਐਂਟਵਿਸਲ ਵਿਚ ਐਤਵਾਰ ਕੁੱਤੇ ਦੇ ਹਮਲੇ ਕਾਰਨ 14 ਦਿਨ ਦੇ ਬੱਚੇ ਦੀ ਮੌਤ ਹੋ ਗਈ। ਇਹ ਹਾਦਸਾ ਐਂਟਵਿਸਲ ਖੇਤਰ ਦੇ ਇਕ ਘਰ ਵਿਚ ਸਵੇਰੇ ਕਰੀਬ 7.30 ਵਜੇ ਵਾਪਰਿਆ। ਐਂਬੂਲੈਂਸ ਅਤੇ ਪੁਲਿਸ ਅਧਿਕਾਰੀ ਇੱਥੇ ਮਦਦ ਲਈ ਬੁਲਾਏ ਗਏ ਸਨ।

ਬੱਚੇ ਨੂੰ ਨਾਜ਼ੁਕ ਹਾਲਤ ਵਿਚ ਐਡਮਿੰਟਨ ਦੇ ਸਟੋਲਰੀ ਚਿਲਡਰੇਂਸ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ। ਉਸ ਨੂੰ ਹਸਪਤਾਲ ਲੈ ਜਾਣ ਲਈ ਏਅਰ ਐਂਬੂਲੈਂਸ ਭੇਜੀ ਗਈ ਅਤੇ ਡਾਕਟਰਾਂ ਦੀ ਕੋਸ਼ਿਸ਼ ਦੇ ਬਾਵਜੂਦ ਉਸ ਨੂੰ ਬਚਾਇਆ ਨਹੀਂ ਜਾ ਸਕਿਆ। ਹਮਲਾ ਕਰਨ ਵਾਲੇ ਕੁੱਤੇ ਨੂੰ ਫੜ ਲਿਆ ਗਿਆ ਹੈ ਅਤੇ ਅਧਿਕਾਰੀਆਂ ਵਲੋਂ ਜਾਂਚ ਕੀਤੀ ਜਾ ਰਹੀ ਹੈ।

ਕੁੱਤੇ ਨੂੰ ਅੱਜ ਪਸ਼ੂ ਚਿਕਿਤਸਕ ਕੋਲ ਭੇਜਿਆ ਜਾਣਾ ਹੈ। ਖਤਰਨਾਕ ਡੋਗਸ ਐਕਟ ਤਹਿਤ ਇਸ ਨੂੰ ਮਾਰਨ ਦੀ ਅਰਜ਼ੀ ਦਿੱਤੀ ਜਾ ਸਕਦੀ ਹੈ। ਕੁੱਤੇ ਦੀ ਨਸਲ ਬਾਰੇ ਜਾਣਕਾਰੀ ਨਹੀਂ ਮਿਲ ਸਕੀ। ਸ਼ੁਰੂਆਤੀ ਜਾਂਚ ਵਿਚ ਦੱਸਿਆ ਗਿਆ ਕਿ ਇਸ ਘਰ ਵਿਚ ਕੋਈ ਹੋਰ ਬੱਚਾ ਨਹੀਂ ਹੈ ਅਤੇ ਪਰਿਵਾਰ ਨੇ ਇਹ ਕੁੱਤਾ ਰੱਖਿਆ ਸੀ।