18.59C Vancouver 18.59C VancouverApr 29, 2026 2:14 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਸੈਂਟਰਲ ਬੈਂਕ ਨੇ ਬੁੱਧਵਾਰ ਨੂੰ ਆਪਣੀ ਤਾਜ਼ਾ ਮੁਦਰਾ ਨੀਤੀ ਦੀ ਰਿਪੋਰਟ ਜਾਰੀ ਕਰਦੇ ਹੋਏ ਬੈਂਚਮਾਰਕ ਵਿਆਜ ਦਰਾਂ ਨੂੰ 2.25 ਫੀਸਦੀ 'ਤੇ ਬਰਕਰਾਰ ਰੱਖਣ ਦਾ ਐਲਾਨ ਕੀਤਾ ਹੈ। ਇਹ ਅਜਿਹਾ ਲਗਾਤਾਰ ਚੌਥੀ ਵਾਰ ਹੈ। ਇਸੇ ਤਰ੍ਹਾਂ ਕੈਨੇਡੀਅਨਜ਼ ਲਈ ਜਮ੍ਹਾਂ ਦਰ ਵੀ 2.20 ਫੀਸਦੀ 'ਤੇ ਬਰਕਰਾਰ ਹੈ।
ਬੈਂਕ ਔਫ ਕੈਨੇਡਾ ਦੇ ਗਵਰਨਰ ਟਿਫ ਮੈਕਲੇਮ ਮੁਤਾਬਕ, ਮਿਡਲ ਈਸਟ ਵਿਚ ਜਾਰੀ ਟਕਰਾਅ ਅਤੇ ਅਮਰੀਕਾ ਦੀ ਟਰੇਡ ਪਾਲਿਸੀ ਗਲੋਬਲ ਵਪਾਰ ਕਰਨ ਦੇ ਤਰੀਕੇ ਨੂੰ ਬਦਲ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਈਰਾਨ ਸੰਕਟ ਕਾਰਨ ਤੇਲ ਇੰਪੋਰਟ ਕਰਨ ਵਾਲੇ ਦੇਸ਼ਾਂ ਵਿਚ ਵਿਕਾਸ ਦੀਆਂ ਸੰਭਾਵਨਾਵਾਂ ਘਟੀਆਂ ਹਨ ਅਤੇ ਦੁਨੀਆ ਭਰ ਵਿਚ ਮਹਿੰਗਾਈ ਵਧੀ ਹੈ।
ਬੈਂਕ ਮੁਤਾਬਕ, ਕੈਨੇਡਾ ਵਿਚ ਵੀ ਤੇਲ ਕੀਮਤਾਂ ਨਾਲ ਲੋਕਾਂ 'ਤੇ ਮਹਿੰਗਾਈ ਦਾ ਦਬਾਅ ਪਿਆ ਹੈ ਪਰ ਕਿਉਂਕਿ ਦੇਸ਼ ਇਸ ਦਾ ਵੱਡਾ ਨਿਰਯਾਤਕ ਹੈ ਇਸ ਲਈ ਵਧੀਆਂ ਕੀਮਤਾਂ ਰਾਸ਼ਟਰੀ ਆਮਦਨ ਵਿਚ ਵਾਧਾ ਕਰਦੀਆਂ ਹਨ। ਮੈਕਲੇਮ ਮੁਤਾਬਕ, ਅਪ੍ਰੈਲ ਵਿਚ ਮਹਿੰਗਾਈ ਦਰ ਵਧ ਕੇ ਕਰੀਬ 3 ਫੀਸਦੀ ਹੋਣ ਦੀ ਸੰਭਾਵਨਾ ਹੈ, ਜੋ ਅਗਲੇ ਸਾਲ ਦੇ ਸ਼ੁਰੂ ਵਿਚ 2 ਫੀਸਦੀ ਦੇ ਟੀਚੇ 'ਤੇ ਵਾਪਸ ਆਉਣ ਦੀ ਉਮੀਦ ਹੈ। ਉਹਨਾਂ ਭਰੋਸਾ ਦਿੱਤਾ ਕਿ ਸਥਿਤੀ ਦੇ ਹਿਸਾਬ ਨਾਲ ਬੈਂਕ ਲੋੜ ਅਨੁਸਾਰ ਜਵਾਬ ਦੇਣ ਲਈ ਤਿਆਰ ਹੈ।
