11.58C Vancouver 11.58C VancouverJan 28, 2026 3:37 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਦੇ ਸੈਂਟਰਲ ਬੈਂਕ ਨੇ ਅੱਜ ਸਾਲ 2026 ਦੀ ਆਪਣੀ ਪਹਿਲੀ ਮੁਦਰਾ ਨੀਤੀ ਦਾ ਐਲਾਨ ਕਰਦਿਆਂ ਵਿਆਜ ਦਰਾਂ ਵਿਚ ਕੋਈ ਬਦਲਾਅ ਨਾ ਕਰਨ ਦਾ ਫੈਸਲਾ ਲਿਆ ਹੈ।
ਬੈਂਕ ਔਫ ਕੈਨੇਡਾ ਨੇ ਮੁੱਖ ਵਿਆਜ ਦਰ ਜਿਸ ਨੂੰ ਓਵਰਨਾਈਟ ਰੇਟ ਵੀ ਕਿਹਾ ਜਾਂਦਾ ਹੈ, ਨੂੰ 2.25 ਫੀਸਦੀ 'ਤੇ ਬਰਕਰਾਰ ਰੱਖਿਆ ਹੈ। ਬੈਂਕ ਦੇ ਇਸ ਫੈਸਲੇ ਦਾ ਸਿੱਧਾ ਅਸਰ ਮੌਰਗੇਜ ਧਾਰਕਾਂ ਅਤੇ ਨਵੇਂ ਘਰ ਖਰੀਦਣ ਵਾਲਿਆਂ 'ਤੇ ਪਵੇਗਾ। ਵਿਆਜ ਦਰਾਂ ਸਥਿਰ ਰਹਿਣ ਕਾਰਨ ਈ.ਐਮ.ਆਈ. ਵਿਚ ਕੋਈ ਤੁਰੰਤ ਰਾਹਤ ਨਹੀਂ ਮਿਲੇਗੀ।
ਦੂਜੇ ਪਾਸੇ, ਸੇਵਿੰਗ ਅਕਾਊਂਟ 'ਤੇ ਮਿਲਣ ਵਾਲਾ ਵਿਆਜ ਫਿਲਹਾਲ ਆਕਰਸ਼ਕ ਬਣਿਆ ਰਹੇਗਾ। ਕੈਨੇਡਾ ਯੂਨਾਈਟੇਡ ਸਟੇਟ ਮੈਕਸੀਕੋ ਐਗਰੀਮੈਂਟ ਦਾ ਆਉਣ ਵਾਲਾ ਰੀਵਿਊ ਅਤੇ ਅਮਰੀਕੀ ਟੈਰਿਫਸ ਬਾਰੇ ਅਨਿਸ਼ਚਿਤਤਾ ਬੈਂਕ ਦੇ ਫੈਸਲਿਆਂ ਵਿਚ ਅਹਿਮ ਭੂਮਿਕਾ ਨਿਭਾ ਰਹੇ ਹਨ।
ਰਾਇਲ ਬੈਂਕ ਔਫ਼ ਕੈਨੇਡਾ ਦੇ ਅਰਥਸ਼ਾਸਤਰੀਆਂ ਅਨੁਸਾਰ, ਜੇਕਰ ਆਰਥਿਕ ਹਾਲਾਤ ਸਥਿਰ ਰਹਿੰਦੇ ਹਨ ਤਾਂ ਬੈਂਕ ਪੂਰਾ ਸਾਲ ਵਿਆਜ ਦਰਾਂ ਨੂੰ ਸਥਿਰ ਰੱਖ ਸਕਦਾ ਹੈ।
ਗਵਰਨਰ ਟਿਫ ਮੈਕਲੇਮ ਮੁਤਾਬਕ, 2026 ਵਿਚ ਕੈਨੇਡਾ ਦੀ ਗ੍ਰੋਥ ਦਰ 1.1 ਫੀਸਦੀ ਅਤੇ 2027 ਵਿਚ 1.5 ਫੀਸਦੀ ਰਹਿ ਸਕਦੀ ਹੈ। ਉਹਨਾਂ ਕਿਹਾ ਕਿ ਮੌਜੂਦਾ ਪਾਲਿਸੀ ਰੇਟ ਸਹੀ ਪੱਧਰ 'ਤੇ ਹਨ ਪਰ ਜੇਕਰ ਆਰਥਕਿਤਾ ਲਈ ਅੱਗੇ ਚੱਲ ਕੇ ਹਾਲਾਤ ਬਦਲਦੇ ਹਨ ਤਾਂ ਬੈਂਕ ਉਸ ਮੁਤਾਬਕ, ਕਦਮ ਚੁੱਕਣ ਲਈ ਤਿਆਰ ਹੈ।
