ਬੀ.ਸੀ. ਦੇ ਵਪਾਰਕ ਲੀਡਰਸ ਨੇ ਕੀਤੀ ਕੈਨੇਡੀਅਨ ਇਕਾਨਮੀ 'ਚ ਸੁਧਾਰ ਦੀ ਮੰਗ

ਬ੍ਰਿਟਿਸ਼ ਕੋਲੰਬੀਆ ਦੇ ਕਾਰੋਬਾਰੀਆਂ ਵਲੋਂ ਸਾਂਝੇ ਤੌਰ 'ਤੇ ਦਸਤਖਤ ਕੀਤਾ ਇੱਕ ਪੱਤਰ ਕੈਨੇਡਾ ਭਰ ਦੇ ਹਰ ਸੰਸਦ ਮੈਂਬਰ ਨੂੰ ਭੇਜਿਆ ਗਿਆ ਹੈ, ਜਿਸ ਵਿਚ ਦੇਸ਼ ਦੀ ਅਰਥਵਿਵਸਥਾ ਲਈ ਠੋਸ ਕਦਮ ਚੁੱਕਣ ਦੀ ਮੰਗ ਕੀਤੀ ਗਈ ਹੈ। ਬੀ.ਸੀ. ਬਿਜ਼ਨਸ ਕੌਂਸਲ ਨੇ ਇਸ ਪੱਤਰ 'ਤੇ ਐਲਬਰਟਾ, ਸਸਕੈਚਵਨ ਅਤੇ ਮੈਨੀਟੋਬਾ ਦੇ ਕਾਰੋਬਾਰੀਆਂ ਨਾਲ ਸਾਂਝੇ ਤੌਰ 'ਤੇ ਦਸਤਖ਼ਤ ਕੀਤੇ ਹਨ।

ਇਸ ਵਿਚ ਤੇਲ ਅਤੇ ਗੈਸ ਲਈ ਪ੍ਰਸਤਾਵਿਤ ਇਮੀਸ਼ਨ ਕੈਪਸ ਨੂੰ ਰੱਦ ਕਰਨ, ਟੈਕਸ ਸਿਸਟਮ ਅਤੇ ਕੈਨੇਡਾ ਦੇ ਰੈਗੂਲੇਟਰੀ ਸਿਸਟਮ ਵਿਚ ਸੁਧਾਰ ਦੀਆਂ ਮੰਗਾਂ ਸ਼ਾਮਲ ਹਨ। ਪੱਤਰ ਵਿਚ ਕਿਹਾ ਗਿਆ ਹੈ ਕਿ ਜਨਸੰਖਿਆ ਦੇ ਹਿਸਾਬ ਨਾਲ ਸਾਡੀ ਆਰਥਿਕਤਾ ਪਿਛਲੇ ਦਹਾਕੇ ਵਿਚ ਬਹੁਤ ਘੱਟ ਵਧੀ ਹੈ ਅਤੇ 2014 ਤੋਂ 2024 ਤੱਕ ਕੈਨੇਡਾ ਦੀ ਪ੍ਰਤੀ ਵਿਅਕਤੀ ਜੀ.ਡੀ.ਪੀ. ਵਾਧਾ ਦੂਜੀ ਸਭ ਤੋਂ ਕਮਜ਼ੋਰ ਰਹੀ।

ਕਾਰੋਬਾਰੀ ਆਗੂਆਂ ਦਾ ਕਹਿਣਾ ਹੈ ਕਿ ਜੇ ਉਨ੍ਹਾਂ ਦੀਆਂ ਮੰਗਾਂ 'ਤੇ ਗੌਰ ਨਾ ਕੀਤਾ ਗਿਆ ਤਾਂ ਕੰਪਨੀਆਂ ਕੈਨੇਡਾ ਦੀ ਬਜਾਏ ਅਮਰੀਕਾ ਦਾ ਰੁਖ਼ ਕਰ ਸਕਦੀਆਂ ਹਨ। ਇਹ ਪੱਤਰ ਉਦੋਂ ਆਇਆ ਹੈ ਜਦੋਂ ਕੈਨੇਡਾ ਟਰੰਪ ਵਲੋਂ ਸ਼ੁਰੂ ਕੀਤੇ ਵਪਾਰ ਯੁੱਧ ਵਿਚ ਫਸਿਆ ਹੋਇਆ ਹੈ।