ਬੀ.ਸੀ. ਲਿਬਰਲਸ ਨੇ ਹੈਲਥ ਕੇਅਰ ਸਿਸਟਮ 'ਚ ਸੰਕਟ ਦਾ ਹਵਾਲਾ ਦਿੰਦਿਆਂ ਪੁੱਛਿਆ, ਕਿੱਥੇ ਹਨ ਸਿਹਤ ਮੰਤਰੀ ਐਡਰੀਅਨ ਡਿਕਸ?

ਬੀ.ਸੀ. ਦੇ ਹੈਲਥ ਕੇਅਰ ਸਿਸਟਮ ਨੂੰ ਲੈਕੇ ਬੀ.ਸੀ. ਲਿਬਰਲਸ ਨੇ ਸੂਬੇ ਦੀ ਐਨ.ਡੀ.ਪੀ. ਸਰਕਾਰ ਨੂੰ ਘੇਰਿਆ ਹੈ।

ਅੱਜ ਇੱਕ ਬਿਆਨ ਜਾਰੀ ਕਰ ਬੀ.ਸੀ. ਲਿਬਰਲ ਹੈਲਥ ਕ੍ਰਿਟਿਕ ਸ਼ਰਲੀ ਬੌਂਡ ਨੇ ਐਨ.ਡੀ.ਪੀ. ਸਰਕਾਰ ਨੂੰ ਪੁੱਛਿਆ ਹੈ, ਸਿਹਤ ਮੰਤਰੀ ਐਡਰੀਅਨ ਡਿਕਸ ਕਿੱਥੇ ਹਨ?

ਇਸ ਦੇ ਨਾਲ ਹੀ ਬੀ.ਸੀ. ਲਿਬਰਲਸ ਨੇ ਸਵਾਲ ਕੀਤਾ ਹੈ, ਐਨ.ਡੀ.ਪੀ. ਨੇ ਜਿਸ ਹੈਲਥ ਕੇਅਰ ਹਿਊਮਨ ਰਿਸੋਰਸਿਸ ਪਲੈਨ ਦਾ ਵਾਅਦਾ ਕੀਤਾ ਸੀ ਉਹ ਕਿੱਥੇ ਹੈ?

ਸ਼ਰਲੀ ਬੌਂਡ ਨੇ ਇੱਕ ਬਿਆਨ ਜਾਰੀ ਕਰ ਕਿਹਾ ਕਿ ਹੁਣ ਕਈ ਮਹੀਨਿਆਂ ਤੋਂ ਅਸੀਂ ਬੀ.ਸੀ. ਦੇ ਹੈਲਥ ਕੇਅਰ ਸਿਸਟਮ ਨਾਲ ਜੁੜੇ ਸੰਕਟ ਨੂੰ ਵੇਖ ਰਹੇ ਹਾਂ ਅਤੇ ਕਈ ਬੀ.ਸੀ. ਵਾਸੀ ਇਸ ਸਿਸਟਮ ਦੇ ਡਿਸਫੰਕਸ਼ਨ ਕਾਰਨ ਜਾਨ ਗਵਾ ਚੁੱਕੇ ਹਨ।

ਉਨ੍ਹਾਂ ਕਿਹਾ ਕਿ ਇਹ ਸੰਕਟ ਹਰ ਲੰਘਦੇ ਦਿਨ ਨਾਲ ਬਦਤਰ ਹੁੰਦਾ ਜਾ ਰਿਹਾ ਹੈ ਅਤੇ ਸਿਹਤ ਮੰਤਰੀ ਐਡਰੀਅਨ ਡਿਕਸ ਇਸ ਦੀ ਕੋਈ ਜਿੰਮੇਵਾਰੀ ਲੈਣ ਲਈ ਤਿਆਰ ਨਹੀਂ ਹਨ।

ਉਨ੍ਹਾਂ ਕਿਹਾ ਕਿ ਸਿਹਤ ਮੰਤਰੀ ਨੇ ਕੋਈ ਛੋਟੇ ਸਮੇਂ ਜਾਂ ਤੁਰੰਤ ਪ੍ਰਭਾਵ ਦੇ ਹੱਲ ਵੀ ਨਹੀਂ ਸੁਝਾਏ ਹਨ।

ਉਨ੍ਹਾਂ ਕਿਹਾ ਕਿ ਸਿਹਤ ਮੰਤਰੀ ਨੇ ਸ਼ੁਰੂਆਤ ਤੋਂ ਹੀ ਇਸ ਸਮੱਸਿਆ 'ਤੇ ਪਰਦਾ ਪਾਉਣ ਦੀ ਕੋਸ਼ਿਸ਼ ਕੀਤੀ ਹੈ।

ਸ਼ਰਲੀ ਬੌਂਡ ਨੇ ਕਿਹਾ ਕਿ ਬੀ.ਸੀ. ਦੇ ਇਸ ਸੰਕਟ 'ਚ ਸੁਧਾਰ ਲਈ ਐਡਰੀਅਨ ਡਿਕਸ ਨੂੰ ਜਿੰਮੇਵਾਰੀ ਲੈਂਦੇ ਹੋਏ ਤੁਰੰਤ ਕੋਈ ਕਦਮ ਚੁੱਕਣੇ ਚਾਹੀਦੇ ਹਨ।