17.8C Vancouver 17.8C VancouverOct 8, 2020 8:45 PM -
ਅੱਜ ਲੈਂਗਲੀ ਵਿਚ ਬੀ.ਸੀ. ਐਨ.ਡੀ.ਪੀ. ਲੀਡਰ ਜੌਨ ਹੌਰਗਨ ਨੇ ਐਲਾਨ ਕੀਤਾ ਹੈ ਕਿ ਬੀ.ਸੀ. ਐਨ.ਡੀ.ਪੀ. ਦੇ ਪਲੈਟਫੋਰਮ ਵਿਚ ਜਿਸ $9 ਬਿਲਿਅਨ ਡੌਲਰ ਦੇ ਰਿਕਵਰੀ ਇਨਵੈੱਸਟਮੈਂਟ ਫੰਡ ਦਾ ਜ਼ਿਕਰ ਹੋਇਆ ਸੀ, ਇਸ ਵਿੱਚੋਂ $1.5 ਬਿਲਿਅਨ ਖਰਚ ਕਰਕੇ, ਸਰੀ ਸਕਾਈਟ੍ਰੇਨ ਐਕਸਪੈਨਸ਼ਨ ਪ੍ਰੋਜੈਕਟ ਦੇ ਫਲੀਟਵੁੱਡ ਤੋਂ ਲੈਂਗਲੀ ਤੱਕ ਦੇ ਹਿੱਸੇ ਨੂੰ ਮੁਕੱਮਲ ਕੀਤਾ ਜਾਵੇਗਾ।
ਹੌਰਗਨ ਨੇ ਕਿਹਾ ਕਿ ਉਹ ਇਸ ਨੂੰ ਇੱਕ ਸੂਬਾਈ ਪ੍ਰੋਜੈਕਟ ਬਣਾਉਣਗੇ ਤਾਂ ਕਿ ਇਸ ਪ੍ਰੋਜੈਕਟ ਦਾ ਆਰਥਿਕ ਬੋਝ ਮੁਉਂਸੀਪਲ ਸਰਕਾਰਾਂ ਜਾਂ ਫਿਰ ਟ੍ਰਾਂਸਲਿੰਕ 'ਤੇ ਨਾ ਪਵੇ।
ਜ਼ਿਕਰਯੋਗ ਹੈ ਕਿ ਸਰੀ ਤੋਂ ਲੈਂਗਲੀ ਤੱਕ ਸਕਾਈਟ੍ਰੇਨ ਦਾ ਵਿਸਥਾਰ ਕਰਨ ਦੀ ਕੁਲ ਲਾਗਤ $3.1 ਬਿਲਿਅਨ ਡੌਲਰ ਹੈ, ਜਿਸ ਵਿਚੋਂ ਕਿੰਗ ਜੌਰਜ ਤੋਂ ਫਲੀਟਵੁੱਡ ਤੱਕ ਦੇ ਹਿੱਸੇ ਲਈ, $1.6 ਬਿਲਿਅਨ ਦਾ ਅੰਤਜ਼ਾਮ ਪਹਿਲਾਂ ਦੀ ਹੋ ਚੁੱਕਾ ਹੈ।
ਫਲੀਟਵੁੱਡ ਤੋਂ ਸਕਾਈਟ੍ਰੇਨ ਨੂੰ ਲੈਂਗਲੀ ਤੱਕ ਲਿਜਾਉਣ ਦੀ ਲਾਗਤ $1.5 ਬਿਲਿਅਨ ਦੱਸੀ ਜਾ ਰਹੀ ਹੈ।
ਬੀ.ਸੀ. ਐਨ.ਡੀ.ਪੀ. ਦੇ ਪਲੈਟਫੋਰਮ ਵਿਚ ਅਗਲੇ ਤਿੰਨ ਸਾਲਾਂ ਲਈ, ਕੈਪੀਟਲ ਪਲੈਨ ਵਿਚ ਹਰ ਸਾਲ $3 ਬਿਲਿਅਨ ਜੋੜੇ ਜਾਣ ਦਾ ਵਾਅਦਾ ਕੀਤਾ ਗਿਆ ਹੈ।
ਦੂਜੇ ਪਾਸੇ ਸਰੀ ਦੇ ਮੋਯਰ ਡੱਗ ਮੈੱਕੈਲਮ ਨੇ ਬੀ.ਸੀ. ਐਨ.ਡੀ.ਪੀ. ਦੇ ਚੋਣ ਵਾਅਦੇ ਦਾ ਖੁੱਲੇ ਦਿਨ ਨਾਲ ਸੁਆਗਤ ਕੀਤਾ ਹੈ।
ਜਾਰੀ ਕੀਤੇ ਰੀਲੀਜ਼ ਵਿਚ ਉੁਨ੍ਹਾਂ ਦਾ ਕਿਹਣਾ ਹੈ ਕਿ ਉਹ ਸਰੀ ਤੋਂ ਲੈਂਗਲੀ ਤੱਕ ਸਕਾਈਟ੍ਰੇਨ ਨੂੰ ਪੂਰੀ ਤਰ੍ਹਾਂ ਫੰਡ ਕਰਨ ਦੀ ਬੀ.ਸੀ. ਐਨ.ਡੀ.ਪੀ. ਦੀ ਘੋਸ਼ਣਾ ਨੂੰ ਪੂਰਾ ਸਹਿਯੋਗ ਦਿੰਦੇ ਹਨ।
ਉਨ੍ਹਾਂ ਕਿਹਾ ਕਿ ਮੇਯਰਜ਼ ਕਾਉਂਸਿਲ ਲਈ ਇਹ ਪ੍ਰੋਜੈਕਟ ਮੁੱਖ ਤਰਜੀਹ 'ਤੇ ਹੈ, ਉਨ੍ਹਾਂ ਮੁਤਾਬਕ ਇਸ ਪ੍ਰੋਜੈਕਟ ਨਾਲ ਤੁਰੰਤ ਹੀ ਨਵੀਆਂ ਨੌਕਰੀਆਂ ਪੈਦਾ ਹੋਣਗੀਆਂ, ਸੜਕਾਂ ਤੋਂ ਗੱਡੀਆਂ ਘੱਟ ਹੋਣਗੀਆਂ ਤੇ ਸਰੀ ਲੈਂਗਲੀ ਵਿਚਕਾਰ ਸਫ਼ਰ ਕਰਨਾ ਸੁਖਾਲਾ ਹੋ ਜਾਵੇਗਾ।
