20.68C Vancouver 20.68C VancouverMay 20, 2025 11:48 PM -
ਰਿਚਮੰਡ ਵਿਖੇ ਪੁਲਿਸ ਦਾ ਕਹਿਣਾ ਹੈ ਕਿ ਇੱਕ ਵਿਅਕਤੀ ਨੂੰ ਪੁਲਿਸ ਅਫ਼ਸਰ ਦੇ ਤੌਰ 'ਤੇ ਖੁਦ ਨੂੰ ਪੇਸ਼ ਕਰਨ ਦੇ ਮਾਮਲੇ 'ਚ ਗ੍ਰਿਫਤਾਰ ਕੀਤਾ ਗਿਆ ਹੈ। ਪੁਲਿਸ ਅਨੁਸਾਰ ਮਾਮਲਾ ਐਤਵਾਰ ਦਾ ਹੈ ਜਦ ਕਰੀਬ ਦੁਪਹਿਰ 1 ਵਜੇ ਇੱਕ ਵਿਅਕਤੀ ਨੇ 911 'ਤੇ ਕਾਲ ਕਰ ਦੱਸਿਆ ਕਿ ਇੱਕ ਫੋਰਡ ਮਸਟੈਂਗ ਸਵਾਰ ਵਿਅਕਤੀ ਨੇ ਪੁਲਸੀਆ ਬੱਤੀਆਂ ਦਾ ਇਸਤੇਮਾਲ ਕਰ ਉਸ ਦੀ ਗੱਡੀ ਰੋਕੀ ਸੀ।
ਪੁਲਿਸ ਦਾ ਕਹਿਣਾ ਸੀ ਕਿ ਕਾਲ ਕਰਨ ਵਾਲੇ ਅਨੁਸਾਰ ਮਸਟੈਂਗ ਚਾਲਕ ਨੇ ਪੁਲਿਸ ਦਾ ਬੈਜ ਵੀ ਪਹਿਨਿਆ ਹੋਇਆ ਸੀ ਅਤੇ ਉਸ ਨੇ ਲਾਇਸੈਂਸ ਵਿਖਾਉਣ ਦੀ ਮੰਗ ਕੀਤੀ ਸੀ। ਹਾਲਾਂਕਿ ਸ਼ਿਕਾਇਤਕਰਤਾ ਦਾ ਕਹਿਣਾ ਸੀ ਕਿ ਉਸ ਨੂੰ ਵਿਅਕਤੀ ਦੇ ਪੁਲਿਸ ਅਫ਼ਸਰ ਨਾ ਹੋਣ ਦਾ ਸ਼ੱਕ ਹੋਇਆ ਅਤੇ ਉਹ ਮੌਕੇ ਤੋਂ ਬਿਨਾ ਲਾਇਸੈਂਸ ਵਿਖਾਏ ਨਿਕਲ ਗਿਆ।
ਪੁਲਿਸ ਨੂੰ ਬਾਅਦ ਵਿੱਚ ਮਸਟੈਂਗ ਚਾਲਕ ਨੇ ਵੀ ਕਾਲ ਕੀਤੀ ਅਤੇ ਆਖਿਆ ਕਿ ਉਸ ਨੇ ਇੱਕ ਸ਼ੱਕੀ ਵਾਹਨ ਦਾ ਪਿੱਛਾ ਕੀਤਾ ਜਿਸ ਦੇ ਚਾਲਕ ਦੇ ਇੰਪੇਅਰਡ ਹੋਣ ਦਾ ਸ਼ੱਕ ਸੀ। ਸ਼ਿਕਾਇਤਕਰਤਾ ਔਂਟੈਰੀਓ ਪਲੇਟ ਵਾਲੀ ਡੌਜ ਕੈਰਾਵੈਨ 'ਚ ਸਵਾਰ ਸੀ।
ਪੁਲਿਸ ਨੇ ਲੋਕਾਂ ਤੋਂ ਵੀ ਮੰਗ ਕੀਤੀ ਹੈ ਕਿ ਵੈਸਟਮਿਨਸਟਰ ਹਾਈਵੇਅ ਅਤੇ ਫਰਾਂਸਿਸ ਰੋਡ 'ਤੇ ਨੰਬਰ 2 ਰੋਡ 'ਤੇ ਐਤਵਾਰ ਨੂੰ ਦੁਪਹਿਰ ਪੌਣੇ ਇੱਕ ਤੋਂ ਡੇਢ ਵਜੇ ਵਿਚਾਲੇ ਦੀ ਘਟਨਾ ਸੰਬੰਧੀ ਕਿਸੇ ਕੋਲ ਕੋਈ ਫੁਟੇਜ ਜਾਂ ਜਾਣਕਾਰੀ ਹੋਵੇ ਤਾਂ ਸੰਪਰਕ ਕੀਤਾ ਜਾਵੇ।
