13.33C Vancouver 13.33C VancouverOct 19, 2022 1:21 AM - Connect News
ਬਰਨਬੀ 'ਚ ਇੱਕ ਹੋਮਲੈਸ ਐਨਕੈਂਪਮੈਂਟ 'ਚ ਚਾਕੂ ਨਾਲ ਹਮਲੇ ਦੌਰਾਨ ਜਾਨ ਗਵਾਉਣ ਵਾਲੀ ਮਹਿਲਾ ਪੁਲਿਸ ਅਫ਼ਸਰ ਦੀ ਪਛਾਣ ਸਾਂਝੀ ਕੀਤੀ ਗਈ ਹੈ।
ਇਸ ਘਟਨਾ 'ਚ ਬਰਨਬੀ ਆਰ.ਸੀ.ਐਮ.ਪੀ. ਦੀ ਕਾਂਸਟੇਬਲ ਸ਼ੈਲੀਨ ਯੈਂਗ ਨੇ ਜਾਨ ਗਵਾ ਦਿੱਤੀ ਹੈ।
ਘਟਨਾ ਮੌਕੇ ਕਾਂਸਟੇਬਲ ਯੈਂਗ ਡਿਊਟੀ ਨਿਭਾ ਰਹੀ ਸੀ।
ਕਾਂਸਟੇਬਲ ਯੈਂਗ ਰਿਚਮੰਡ 'ਚ ਰਹਿੰਦੀ ਸੀ ਅਤੇ ਸਾਲ 2019 ਵਿੱਚ ਪੁਲਿਸ ਅਫ਼ਸਰ ਬਣੀ ਸੀ।
ਪੀੜਤ ਪੁਲਿਸ ਅਫ਼ਸਰ ਨੂੰ ਇੱਕ ਚੰਗੀ ਪਤਨੀ, ਭੈਣ, ਧੀ ਅਤੇ ਚੰਗੇ ਇਨਸਾਨ ਵਜੋਂ ਯਾਦ ਕੀਤਾ ਜਾ ਰਿਹਾ ਹੈ।
ਅੱਜ ਸਵੇਰ ਦੇ ਸਮੇਂ ਕਰੀਬ 11.05 'ਤੇ ਕਾਂਸਟੇਬਲ ਯੈਂਗ ਨੂੰ ਇੱਕ ਬਾਈਲਾਅ ਅਫ਼ਸਰ ਦੀ ਮਦਦ ਲਈ ਕੈਨੇਡਾ ਵੇਅ ਅਤੇ ਗਿਲਮੋਰ ਐਵੀਨਿਊ ਕੋਲ ਬਰੌਡਵਿਉ ਪਾਰਕ ਦੇ ਇਲਾਕੇ 'ਚ ਸੱਦਿਆ ਗਿਆ ਸੀ।
ਇਸੇ ਦੌਰਾਨ ਐਨਕੈਂਪਮੈਂਟ ਕੋਲ ਕਿਸੇ ਪ੍ਰਕਾਰ ਦੀ ਤਕਰਾਰ ਹੋਈ ਅਤੇ ਅਫ਼ਸਰ 'ਤੇ ਚਾਕੂ ਨਾਲ ਹਮਲਾ ਕਰ ਦਿੱਤਾ ਗਿਆ।
ਆਰ.ਸੀ.ਐਮ.ਪੀ. ਦੇ ਡਿਪਟੀ ਕਮਿਸ਼ਨਰ ਡਵੇਨ ਮੈਕਡੌਨਲਡ ਨੇ ਦੱਸਿਆ ਕਿ ਸ਼ੱਕੀ 'ਤੇ ਵੀ ਗੋਲੀ ਚਲਾਈ ਗਈ ਸੀ ਅਤੇ ਉਸ ਨੂੰ ਨਾਜੁਕ ਹਾਲਤ ਦੇ ਵਿੱਚ ਹਸਪਤਾਲ 'ਚ ਦਾਖਿਲ ਕੀਤਾ ਗਿਆ ਹੈ।
ਉਨ੍ਹਾਂ ਦੱਸਿਆ ਕਿ ਕਾਂਸਟੇਬਲ ਯੈਂਗ ਨੇ ਬਹਾਦੁਰੀ ਨਾਲ ਡਿਊਟੀ ਕਰਦੇ ਹੋਏ ਜਾਨ ਗਵਾਈ।
ਮੈਕਡੌਨਲਡ ਨੇ ਕਿਹਾ ਕਿ ਡਿਊਟੀ ਨਿਭਾਉਂਦੇ ਹੋਏ ਜਾਨ ਗਵਾਉਣਾ ਸਭ ਤੋਂ ਵੱਡੀ ਕੁਰਬਾਨੀ ਹੈ।
ਬਰਨਬੀ ਆਰ.ਸੀ.ਐਮ.ਪੀ. ਨੇ ਮਾਮਲੇ ਸੰਬੰਧੀ ਇੱਕ ਟਵੀਟ ਕਰ ਆਖਿਆ ਕਿ ਲੋਕ ਬਾਊਂਡਰੀ ਰੋਡ ਅਤੇ ਵਿਲਿੰਗਡਨ ਐਵੀਨਿਊ ਵਿਚਾਲੇ ਕੈਨੇਡਾ ਵੇਅ 'ਤੇ ਆਵਾਜਾਈ ਨਾ ਕਰਨ।
ਮੌਕੇ 'ਤੇ ਮਲਟੀਪਲ ਪੁਲਿਸ ਏਜੈਂਸੀਆਂ ਵੱਲੋਂ ਪਹੁੰਚ ਕਰਨ ਦੀ ਜਾਣਕਾਰੀ ਦਿੱਤੀ ਗਈ।
ਮੌਕੇ 'ਤੇ ਆਰ.ਸੀ.ਐਮ.ਪੀ. ਦੀ ਐਮਰਜੈਂਸੀ ਰਿਸਪਾਂਸ ਟੀਮ ਤੋਂ ਇਲਾਵਾ ਕੇਨਾਈਨ ਯੂਨਿਟ, ਵੈਨਕੂਵਰ ਪੁਲਿਸ ਅਤੇ ਨਿਊ ਵੈਸਟਮਿਨਸਟਰ ਪੁਲਿਸ ਨੂੰ ਵੇਖਿਆ ਜਾ ਸਕਦਾ ਸੀ।
