ਬੰਗਾਲ ਚੋਣਾਂ: ਅਰਾਮਬਾਗ 'ਚ ਟੀਐੱਮਸੀ ਅਤੇ ਭਾਜਪਾ ਵਿਚਾਲੇ ਝੜਪ

ਪੱਛਮੀ ਬੰਗਾਲ ਦੀਆਂ ਵਿਧਾਨ ਸਭਾ ਚੋਣਾਂ ਦੇ ਤੀਜੇ ਗੇੜ ਦੌਰਾਨ ਅੱਜ ਮੰਗਲਵਾਰ ਨੂੰ ਅਰਾਮਬਾਗ ਵਿੱਚ ਤ੍ਰਿਣਮੂਲ ਕਾਂਗਰਸ (ਟੀਐੱਮਸੀ) ਅਤੇ ਭਾਰਤੀ ਜਨਤਾ ਪਾਰਟੀ (ਬੀਜੇਪੀ) ਦੇ ਵਰਕਰਾਂ ਵਿਚਾਲੇ ਝੜਪ ਹੋ ਗਈ।

ਅਰਾਮਬਾਗ ਹਲਕੇ ਤੋਂ ਟੀਐਮਸੀ ਦੀ ਉਮੀਦਵਾਰ ਸੁਜਾਤਾ ਮੰਡਲ ਖ਼ਾਨ ਨੇ ਬੀਜੇਪੀ ਦੇ ਵਰਕਰਾਂ 'ਤੇ ਅਰੰਡੀ ਇਲਾਕੇ ਵਿੱਚ ਔਰਤ ਵੋਟਰਾਂ ਨੂੰ ਧਮਕਾਉਣ ਅਤੇ ਉਹਨਾਂ ਨਾਲ ਬਦਸਲੂਕੀ ਕਰਨ ਦਾ ਇਲਜ਼ਾਮ ਲਾਇਆ।

ਸੁਜਾਤਾ ਨੇ ਆਖਿਆ,"ਅਰੰਡੀ-1 ਇਲਾਕੇ ਵਿੱਚ, ਇੱਥੇ ਅਲਪ-ਸੰਖਿਅਕ ਅਤੇ ਨੀਵੀਂ ਜਾਤ ਦੇ ਵੋਟਰ ਹਨ, ਜੋ ਮਮਤਾ ਬੈਨਰਜੀ ਨੂੰ ਪਿਆਰ ਕਰਦੇ ਹਨ। ਬੀਜੇਪੀ ਦੇ ਗੁੰਡਿਆਂ ਨੇ ਬੀਤੀ ਰਾਤ ਔਰਤ ਵੋਟਰਾਂ ਨੂੰ ਧਮਕਾਇਆ, ਉਨ੍ਹਾਂ ਨੂੰ ਤਸੀਹੇ ਦਿੱਤੇ ਅਤੇ ਬਦਸਲੂਕੀ ਕੀਤੀ। ਉਨ੍ਹਾਂ (ਬੀਜੇਪੀ) ਨੇ ਅਜਿਹਾ ਇਸ ਲਈ ਕੀਤਾ, ਕਿਉਂਕਿ ਉਹ ਜਾਣਦੇ ਸਨ ਕਿ ਇਹ ਲੋਕ ਮੈਨੂੰ ਵੋਟ ਪਾਉਣਗੇ।"

ਸੁਜਾਤਾ ਨੇ ਅੱਗੇ ਆਖਿਆ,"ਬਾਟਨਲ ਦੇ ਬੂਥ ਨੰਬਰ 45 ਵਿੱਚ ਟੀਐੱਮਸੀ ਦੇ ਚਿੰਨ ਨੂੰ ਦੱਬਣ ਦੇ ਬਾਵਜੂਦ, ਵੋਟ ਬੀਜੇਪੀ ਨੂੰ ਪੈ ਰਹੀ ਹੈ। ਪਰ ਮੈਨੂੰ ਯਕੀਨ ਹੈ ਕਿ ਮੈਨੂੰ ਲੋਕਾਂ ਦਾ ਆਸ਼ੀਰਵਾਦ ਮਿਲੇਗਾ। ਅਰੰਡੀ ਵਿੱਚ ਸਾਡੇ ਵਰਕਰਾਂ ਨੂੰ ਕੁੱਟਿਆ ਗਿਆ। ਜੇ ਉਹ (ਬੀਜੇਪੀ) ਸੋਚਦੇ ਹਨ ਕਿ ਹਿੰਸਾ ਕਰਕੇ ਉਹ ਅਰਾਮਬਾਗ ਦੀ ਸੀਟ ਹਾਸਲ ਕਰ ਲੈਣਗੇ, ਤਾਂ ਉਹ ਗ਼ਲਤ ਹਨ। ਮੈਂ ਮੌਤ ਤੋਂ ਨਹੀਂ ਡਰਦੀ।"

ਟੀਐੱਮਸੀ ਦੀ ਲੀਡਰ ਨੇ ਸੀਆਰਪੀਐੱਫ 'ਤੇ ਵੀ ਬੀਜੇਪੀ ਦੇ ਇਸ਼ਾਰੇ 'ਤੇ ਚੱਲਣ ਦਾ ਕਥਿਤ ਇਲਜ਼ਾਮ ਲਾਇਆ।

"ਮੈਨੂੰ ਇਹ ਵੇਖ ਕੇ ਬੁਰਾ ਲੱਗਦਾ ਹੈ ਕਿ ਸੀਆਰਪੀਐੱਫ ਨਿਰਪੱਖਤਾ ਨਾਲ ਕੰਮ ਨਹੀਂ ਕਰ ਰਹੀ। ਉਹ ਬੀਜੇਪੀ ਦੇ ਏਜੇਂਟ ਬਣ ਗਏ ਹਨ ਅਤੇ ਲੋਕਾਂ ਨੂੰ ਬੀਜੇਪੀ ਨੂੰ ਵੋਟ ਪਾਉਣ ਲਈ ਆਖ ਰਹੇ ਹਨ,"ਸੁਜਾਤਾ ਨੇ ਆਖਿਆ।

ਦੱਸਣਯੋਗ ਹੈ ਕਿ ਵਿਧਾਨ ਸਭਾ ਚੋਣਾਂ ਦੇ ਤੀਜੇ ਗੇੜ ਵਿੱਚ ਹੁਗਲੀ ਦੀਆਂ 8 , ਹਾਵੜਾ ਦੀਆਂ 7 ਅਤੇ 24 ਪਰਗਣਾ ਦੱਖਣ ਵਿੱਚ 16 ਜ਼ਿਲਿਆਂ ਦੀਆਂ ਕੁਲ 31 ਸੀਟਾਂ 'ਤੇ ਵੋਟਾਂ ਪੈ ਰਹੀਆਂ ਹਨ।

ਤੀਜੇ ਗੇੜ ਦੀਆਂ ਚੋਣਾਂ ਦੀ ਇਸ ਲੜਾਈ ਵਿੱਚ 205 ਉਮੀਦਵਾਰ ਲੜ ਰਹੇ ਹਨ|

ਹਾਲਾਂਕਿ ਜੇ ਔਰਤਾਂ ਦੀ ਪ੍ਰਤੀਨਿਧਤਾ ਦੀ ਗੱਲ ਕੀਤੀ ਜਾਵੇ, ਤਾਂ ਇਸ ਗੇੜ ਵਿੱਚ ਸਿਰਫ 13 ਔਰਤ ਉਮੀਦਵਾਰ ਹਨ, ਜੋ ਮਹਿਜ਼ 6 ਫ਼ੀਸਦ ਹਨ।

ਅਰਾਮਬਾਗ ਹਲਕੇ ਵਿੱਚ ਟੀਐੱਮਸੀ ਵੱਲੋਂ ਸੁਜਾਤਾ ਮੰਡਲ ਖ਼ਾਨ ਦੀ ਸੀਪੀਆਈ(ਐੱਮ) ਦੇ ਸ਼ਕਤੀ ਮੋਹਨ ਮਲਿਕ ਅਤੇ ਬੀਜੇਪੀ ਦੇ ਮਧੁਸੂਦਨ ਬਾਗ਼ ਨਾਲ ਸਿੱਧੀ ਟੱਕਰ ਹੈ।

ਇੱਥੇ ਦਿਲਚਸਪ ਗੱਲ ਇਹ ਹੈ ਕਿ ਸੁਜਾਤਾ ਮੰਡਲ ਬੀਜੇਪੀ ਦੇ ਐੱਮਪੀ ਸੌਮਿਤ੍ਰ ਖ਼ਾਨ ਦੀ ਪਤਨੀ ਹੈ।

ਜ਼ਿਕਰਯੋਗ ਹੈ ਕਿ ਸੁਜਾਤਾ ਟੀਐੱਮਸੀ ਵਿੱਚ ਸੂਬੇ ਦੀਆਂ ਵਿਧਾਨ ਸਭਾ ਚੋਣਾਂ ਤੋਂ ਪਹਿਲਾਂ ਸ਼ਾਮਲ ਹੋਈ ਸੀ, ਜਿਸ ਤੋਂ ਬਾਅਦ ਉਸਦੇ ਪਤੀ ਸੌਮਿਤ੍ਰ ਨੇ ਉਸਨੂੰ ਤਲਾਕ ਦਾ ਨੋਟਿਸ ਘੱਲਿਆ ਸੀ।

ਗ਼ੌਰਤਲਬ ਹੈ ਕਿ ਪੱਛਮੀ ਬੰਗਾਲ ਦੇ ਪਹਿਲੇ ਦੋ ਗੇੜ ਦੀਆਂ ਚੋਣਾਂ 27 ਮਾਰਚ ਅਤੇ 1 ਅਪ੍ਰੈਲ ਨੂੰ ਹੋਈਆਂ ਸਨ|

ਚੌਥੇ ਗੇੜ ਦੀਆਂ ਚੋਣਾਂ ਹੁਣ 10 ਅਪ੍ਰੈਲ ਨੂੰ ਹੋਣਗੀਆਂ ਅਤੇ ਵੋਟਾਂ ਦੀ ਗਿਣਤੀ 2 ਮਈ ਨੂੰ ਹੋਵੇਗੀ।