ਚੀਨ ਤੋਂ ਆਉਣ ਵਾਲੇ ਸਮਾਨਾਂ 'ਤੇ ਟੈਰਿਫ ਹਟਾ ਸਕਦੇ ਹਨ ਅਮਰੀਕਾ ਦੇ ਰਾਸ਼ਟਰਪਤੀ ਬਾਈਡੇਨ : ਰਿਪੋਰਟ

ਮਹਿੰਗਾਈ ਨੂੰ ਸ਼ਾਂਤ ਕਰਨ ਲਈ ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਈਡੇਨ ਕੁਝ ਚਾਈਨਿਜ਼ ਇੰਪੋਰਟ 'ਤੇ ਟੈਰਿਫ ਹਟਾ ਸਕਦੇ ਹਨ।

ਬਾਈਡੇਨ ਪ੍ਰਸ਼ਾਸਨ ਚਾਈਨਿਜ਼ ਇੰਪੋਰਟ 'ਤੇ ਟੈਰਿਫ ਦੀ ਸਮੀਖਿਆ ਕਰ ਰਿਹਾ ਹੈ, ਜੋ ਕਿ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੱਲੋਂ ਲਾਗੂ ਕੀਤਾ ਗਿਆ ਸੀ। ਟੈਰਿਫ ਨੂੰ ਜਾਰੀ ਰੱਖਣ ਦਾ ਸਮਰਥਨ ਕਰਨ ਵਾਲੇ ਕਾਰੋਬਾਰਾਂ ਅਤੇ ਲੇਬਰ ਯੂਨੀਅਨਸ ਨੂੰ ਪ੍ਰਸ਼ਾਸਨ ਦੇ ਅੰਤਿਮ ਫ਼ੈਸਲੇ ਤੋਂ ਪਹਿਲਾਂ ਮੰਗਲਵਾਰ ਤੱਕ ਆਪਣੀਆਂ ਟਿੱਪਣੀਆਂ ਦੇਣੀਆਂ ਹੋਣਗੀਆਂ।

ਹੁਣ ਤੱਕ ਬਾਈਡੇਨ ਨੇ ਕਈ ਵਾਰ ਟੈਰਿਫ ਵਿਚ ਕਟੌਤੀ ਕਰਨ ਦੀ ਯੋਜਨਾ ਟਾਲੀ ਹੈ ਕਿਉਂਕਿ ਉਨ੍ਹਾਂ ਦੇ ਆਪਣੇ ਹੀ ਸੀਨੀਅਰ ਸਹਾਇਕਾਂ ਅਤੇ ਕੈਬਨਿਟ ਸਕੱਤਰਾਂ ਵਿਚ ਨੀਤੀਗਤ ਸਹਿਮਤੀ ਨਹੀਂ ਬਣੀ ਸੀ।

ਟ੍ਰੈਜ਼ਰੀ ਸੈਕਟਰੀ ਜੇਨੇਟ ਯੇਲੇਨ ਅਤੇ ਕਾਮਰਸ ਸੈਕਟਰੀ ਜੀਨਾ ਰੇਮੋਂਡੋ ਟੈਰਿਫ ਘਟਾਉਣ ਦੇ ਸਮਰਥਨ ਵਿਚ ਹਨ। ਉਨ੍ਹਾਂ ਦਾ ਮੰਨਣਾ ਕਿ ਚੀਨ ਦੀ ਟ੍ਰੇਡ ਪ੍ਰੈਕਟਿਸ ਨਾਲ ਨਜਿੱਠਣ ਨਾਲ ਇਸ ਦਾ ਕੋਈ ਬਹੁਤ ਪ੍ਰਭਾਵ ਨਹੀਂ ਪਿਆ ਹੈ। ਉੱਥੇ ਹੀ, ਵਪਾਰ ਪ੍ਰਤੀਨਿਧੀ ਕੈਥਰੀਨ ਤਾਈ ਅਤੇ ਰਾਸ਼ਟਰੀ ਸੁਰੱਖਿਆ ਸਲਾਹਕਾਰ ਜੇਕ ਸੁਲੀਵਾਨ ਟੈਰਿਫ ਜਾਰੀ ਰੱਖਣ ਦੇ ਪੱਖ ਵਿਚ ਹਨ।