16.69C Vancouver 16.69C VancouverJan 7, 2025 3:47 PM - The Canadian Press
ਅਮਰੀਕਾ ਦੇ ਰਾਸ਼ਟਰਪਤੀ ਜੋ ਬਾਈਡੇਨ ਨੇ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦੀ ਤਾਰੀਫ਼ ਕੀਤੀ ਹੈ। ਬਾਈਡੇਨ ਨੇ ਇੱਕ ਬਿਆਨ ਵਿਚ ਕਿਹਾ ਕਿ ਅਮਰੀਕਾ-ਕੈਨੇਡਾ ਦੇ ਰਿਸ਼ਤੇ ਟਰੂਡੋ ਦੀ ਵਜ੍ਹਾ ਨਾਲ ਹੀ ਮਜਬੂਤ ਹੋਏ ਹਨ। ਅਮਰੀਕਾ ਅਤੇ ਕੈਨੇਡਾ ਉਨ੍ਹਾਂ ਕਾਰਨ ਹੀ ਸੇਫ ਹਨ ਅਤੇ ਉਨ੍ਹਾਂ ਦੇ ਕਾਰਨ ਹੀ ਦੁਨੀਆ ਬਿਹਤਰ ਹੋਈ ਹੈ।
ਬਾਈਡੇਨ ਨੇ ਕਿਹਾ ਕਿ ਸੋਮਵਾਰ ਉਨ੍ਹਾਂ ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨਾਲ ਫੋਨ ’ਤੇ ਗੱਲਬਾਤ ਵੀ ਕੀਤੀ। ਗੌਰਤਲਬ ਹੈ ਕਿ ਟਰੂਡੋ ਨੇ 2015 ਵਿਚ ਬਰਾਕ ਓਬਾਮਾ ਦੇ ਰਾਸ਼ਟਰਪਤੀ ਕਾਰਜਕਾਲ ਦੇ ਅੰਤ ਵਿਚ ਸੱਤਾ ਸੰਭਾਲੀ ਸੀ। ਬਾਈਡੇਨ ਉਸ ਸਮੇਂ ਉਪ-ਰਾਸ਼ਟਰਪਤੀ ਸਨ। ਲਗਭਗ ਇੱਕ ਦਹਾਕੇ ਬਾਅਦ ਬਾਈਡੇਨ- ਓਵਲ ਦਫਤਰ ਦੀਆਂ ਚਾਬੀਆਂ ਆਗਾਮੀ ਰਾਸ਼ਟਰਪਤੀ ਡੋਨਲਡ ਟਰੰਪ ਨੂੰ ਸੌਂਪਣ ਦੀ ਤਿਆਰੀ ਕਰ ਰਹੇ ਹਨ ਅਤੇ ਟਰੂਡੋ ਪ੍ਰਧਾਨ ਮੰਤਰੀ ਦਫਤਰ ਛੱਡ ਰਹੇ ਹਨ।
ਬਾਈਡੇਨ ਨੇ ਕਿਹਾ ਕਿ ਕੋਵਿਡ ਮਹਾਂਮਾਰੀ ਤੋਂ ਲੈ ਕੇ ਜਲਵਾਯੂ ਪਰਿਵਰਤਨ ਅਤੇ ਫੈਂਟਾਨਾਇਲ ਸੰਕਟ ਤੱਕ ਅਸੀਂ ਮਿਲ ਕੇ ਮੁਸ਼ਕਲ ਮੁੱਦਿਆਂ ਨਾਲ ਨਜਿੱਠਿਆ ਹੈ। ਬਾਈਡੇਨ ਨੇ ਕਿਹਾ ਕਿ ਟਰੂਡੋ ਨੂੰ ਆਪਣਾ ਦੋਸਤ ਦੱਸਣ ’ਤੇ ਮੈਨੂੰ ਮਾਣ ਹੈ ਅਤੇ ਮੈਂ ਉਨ੍ਹਾਂ ਦੀ ਸਾਂਝੀਦਾਰੀ ਅਤੇ ਲੀਡਰਸ਼ਿਪ ਲਈ ਸਦੈਵ ਸ਼ੁਕਰਗੁਜ਼ਾਰ ਰਹਾਂਗਾ।
