19.08C Vancouver 19.08C VancouverSep 15, 2021 10:16 PM -
ਅਮਰੀਕੀ ਜਿਮਨਾਸਟ ਸੀਮੋਨ ਬਾਈਲਸ, ਮਿਕੈਲਾ ਮਰੋਨੀ, ਮੈਗੀ ਨਿਕੋਲਸ ਅਤੇ ਐਲੀ ਰੇਸਮੈਨ ਨੇ ਅੱਜ ਸਾਬਕਾ ਅਮਰੀਕੀ ਜਿਮਨਾਸਟਿਕਸ ਟੀਮ ਡਾਕਟਰ ਲੈਰੀ ਨਾਸਰ ਦੇ ਮਾਮਲੇ 'ਚ ਗਵਾਹੀ ਦਿੱਤੀ ਹੈ।
ਇਹਨਾਂ ਨਾਮੀ ਜਿਮਨਾਸਟਸ ਨੇ ਦੱਸਿਆ ਕਿ ਕਿਵੇਂ ਐਫ.ਬੀ.ਆਈ. ਇਸ ਜਿਨਸੀ ਸ਼ੋਸ਼ਣ ਦੇ ਮਾਮਲੇ ਨੂੰ ਹੈਂਡਲ ਕਰਨ 'ਚ ਫੇਲ੍ਹ ਸਾਬਿਤ ਹੋਈ।
ਓਲੰਪਿਕ ਸੋਨ ਤਗਮਾ ਜੇਤੂ ਅਤੇ ਵਿਸ਼ਵ ਦੇ ਬੇਹਤਰੀਨ ਓਲੰਪਿਕ ਤਗਮਾ ਜੇਤੂਆਂ 'ਚ ਸ਼ੁਮਾਰ ਸੀਮੋਨ ਬਾਈਲਸ ਅੱਜ ਗਵਾਹੀ ਦੌਰਾਨ ਰੋ ਪਈ।
ਉਨ੍ਹਾਂ ਸੈਨੇਟ ਕਮੇਟੀ ਦੇ ਸਾਹਮਣੇ ਦੱਸਿਆ ਕਿ ਜਿਮਨਾਸਟਿਕਸ ਅਧਿਕਾਰੀਆਂ ਅਤੇ ਐਫ.ਬੀ.ਆਈ. ਨੇ ਡਾਕਟਰ ਦੇ ਜਿਨਸੀ ਸੋਸ਼ਣ ਦੇ ਮਾਮਲੇ 'ਚ ਅੱਖਾਂ ਫੇਰ ਲਈਆਂ ਸਨ।
ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ 'ਚ ਉਸ ਦੀ ਅਤੇ ਸੈਂਕੜੇ ਜਿਮਨਾਸਟਸ ਦੀ ਇੱਕ ਨਹੀਂ ਸੁਣੀ ਗਈ ਸੀ।
ਬਾਈਲਸ ਨੇ ਕਿਹਾ ਕਿ ਯੂ.ਐਸ.ਏ. ਜਿਮਨਾਸਟਿਕਸ ਅਤੇ ਯੂ.ਐਸ. ਓਲੰਪਿਕ ਅਤੇ ਪੈਰਾਲਿੰਪਿਕ ਕਮੇਟੀ ਜਾਣਦੀ ਸੀ ਕਿ ਟੀਮ ਡਾਕਟਰ ਨੇ ਉਸ ਨੂੰ ਜਿਨਸੀ ਸ਼ੋਸ਼ਣ ਦਾ ਸ਼ਿਕਾਰ ਬਣਾਇਆ ਹੈ।
ਮਿਕੈਲਾ ਮਰੋਨੀ ਨੇ ਕਿਹਾ ਕਿ ਉਨ੍ਹਾਂ ਐਫ.ਬੀ.ਆਈ. ਨੂੰ ਘਟਨਾਵਾਂ ਸੰਬੰਧੀ ਜਾਣਕਾਰੀ ਦਿੱਤੀ ਸੀ ਜਿਸ 'ਤੇ ਕੋਈ ਕਾਰਵਾਈ ਨਹੀਂ ਹੋਈ।
ਯੂ.ਐਸ. ਕਾਂਗਰਸ ਨੇ ਇਸ ਮਾਮਲੇ 'ਚ ਐਫ.ਬੀ.ਆਈ. ਦੀ ਜਿੰਮੇਵਾਰੀ ਤੈਅ ਕਰਨ ਦੀ ਗੱਲ ਆਖੀ ਹੈ।
ਇਸ 'ਚ ਨਾਸਰ 'ਤੇ ਕਾਰਵਾਈ 'ਚ ਦੇਰੀ ਦੇ ਦੌਰਾਨ ਕਰੀਬ 40 ਹੋਰ ਯੁਵਾ ਜਿਮਨਾਸਟਸ ਦੇ ਸ਼ੋਸ਼ਣ ਦਾ ਨਿਸ਼ਾਨਾ ਬਣਾਏ ਜਾਣ 'ਤੇ ਵੀ ਸਵਾਲ ਉੱਠ ਰਹੇ ਹਨ।
ਐਫ.ਬੀ.ਆਈ. ਡਾਇਰੈਕਟਰ ਕ੍ਰਿਸ ਰੇ ਨੇ ਇਸ ਮਾਮਲੇ 'ਚ ਰਸਮੀ ਮੁਆਫੀ ਮੰਗੀ ਹੈ।
ਉਨ੍ਹਾਂ ਕਿਹਾ ਕਿ ਜਾਂਚ ਦੌਰਾਨ ਹੋਈਆਂ ਗਲਤੀਆਂ ਨੂੰ ਮੁੜ ਕਦੀ ਦੋਹਰਾਇਆ ਨਹੀਂ ਜਾਵੇਗਾ।
