ਬੈਂਕ ਆਫ਼ ਕੈਨੇਡਾ ਵਿਆਜ ਦਰ ਦੇ ਫੈਸਲੇ ਦਾ ਅੱਜ ਕਰੇਗਾ ਐਲਾਨ

ਕੈਨੇਡੀਅਨਾਂ ਨੂੰ ਵਿਆਜ ਦਰ ਵਿਚ ਕਟੌਤੀ ਲਈ ਇੰਤਜ਼ਾਰ ਕਰਨਾ ਪਵੇਗਾ। ਬੈਂਕ ਆਫ਼ ਕੈਨੇਡਾ ਨੇ ਅੱਜ ਆਪਣੇ ਫੈਸਲੇ ਵਿਚ ਪ੍ਰਮੁੱਖ ਪਾਲਿਸੀ ਰੇਟ ਨੂੰ 5 ਫੀਸਦੀ ’ਤੇ ਬਰਕਰਾਰ ਰਹਿਣ ਦਿੱਤਾ ਹੈ ਅਤੇ ਕਿਹਾ ਹੈ ਕਿ ਰੇਟ ’ਤੇ ਵਿਚਾਰ ਕਰਨਾ ਅਜੇ ਜਲਦਬਾਜ਼ੀ ਹੋਵੇਗਾ। ਇਹ ਲਗਾਤਾਰ ਪੰਜਵੀਂ ਵਾਰ ਹੈ ਜਦੋਂ ਸੈਂਟਰਲ ਬੈਂਕ ਨੇ ਵਿਆਜ ਦਰ ਵਿਚ ਕੋਈ ਤਬਦੀਲੀ ਨਹੀਂ ਕੀਤੀ।

ਪਿਛਲੇ 18 ਮਹੀਨਿਆਂ ਵਿਚ ਮਹਿੰਗਾਈ ਵਿਚ ਕਾਫ਼ੀ ਗਿਰਾਵਟ ਹੈ ਅਤੇ ਉਧਾਰ ਦੀ ਲਾਗਤ ਵਧਣ ਕਾਰਨ ਕੈਨੇਡਾ ਦੀ ਆਰਥਿਕ ਵਿਕਾਸ ਹੌਲੀ ਹੋਈ ਹੈ, ਇਸ ’ਤੇ ਸੈਂਟਰਲ ਬੈਂਕ ਦੇ ਅਧਿਕਾਰੀਆਂ ਨੂੰ ਲੱਗਦਾ ਹੈ ਕਿ ਵਿਆਜ ਦਰਾਂ ਵਿਚ ਅੱਗੇ ਹੋਰ ਵਾਧੇ ਦੀ ਸੰਭਾਵਨਾ ਨਹੀਂ ਪਰ ਉਹ ਅਜੇ ਕਟੌਤੀ ਲਈ ਵੀ ਤਿਆਰੀ ਨਹੀਂ ਹਨ।

ਗਵਰਨਰ ਟਿਫ ਮੈਕਲੇਮ ਨੇ ਕਿਹਾ ਕਿ ਅਸੀਂ ਮੁਦਰਾ ਨੀਤੀ ਨੂੰ ਲੰਮੇ ਸਮੇਂ ਲਈ ਪ੍ਰਤੀਬੰਧਿਤ ਨਹੀਂ ਰੱਖਣਾ ਚਾਹੁੰਦੇ ਹਾਂ ਪਰ ਅਸੀਂ ਮਹਿੰਗਾਈ ਨੂੰ ਹੇਠਾਂ ਲਿਆਉਣ ਵਿਚ ਕੀਤੀ ਤਰੱਕੀ ਨੂੰ ਵੀ ਖਤਰੇ ਵਿਚ ਨਹੀਂ ਪਾ ਸਕਦੇ।

ਗਵਰਨਰ ਮੈਕਲੇਮ ਨੇ ਕਿਹਾ ਕਿ ਦਰਾਂ ਵਿਚ ਕਟੌਤੀ ਜਲਦ ਨਹੀਂ ਹੋਣ ਵਾਲੀ ਅਤੇ ਹਾਲੇ ਇਸ ’ਤੇ ਵਿਚਾਰ ਕਰਨਾ ਹੀ ਜਲਦਬਾਜ਼ੀ ਹੋਵੇਗਾ। ਬੈਂਕ ਨੂੰ ਇਸ ਸਾਲ ਦੀ ਪਹਿਲੀ ਛਿਮਾਹੀ ਦੌਰਾਨ ਮਹਿੰਗਾਈ ਦਰ 3 ਫੀਸਦੀ ਦੇ ਕਰੀਬ ਰਹਿਣ ਦੀ ਉਮੀਦ ਹੈ।