13.86C Vancouver 13.86C VancouverOct 16, 2024 7:35 PM - Connect Newsroom - Debby Rai with files from The Canadian Press
ਕੈਨੇਡਾ ਬੋਰਡਰ ਸਰਵਿਸਿਜ਼ ਏਜੰਸੀ (CBSA) ਨੇ ਇਸ ਸਾਲ ਹੁਣ ਤੱਕ 1,945 ਚੋਰੀਸ਼ੁਦਾ ਵਾਹਨ ਵੱਖ–ਵੱਖ ਰੇਲ ਯਾਰਡਾਂ ਅਤੇ ਬੰਦਰਗਾਹਾਂ ਤੋਂ ਬਰਾਮਦ ਕੀਤੇ ਹਨ - ਜੋ ਕਿ ਪਿਛਲੇ ਸਾਲ ਦੇ ਮੁਕਾਬਲੇ ਵੱਧ ਹਨ।
ਇਹ ਜਾਣਕਾਰੀ ਟਰਾਂਸਪੋਰਟ ਮੰਤਰੀ ਅਨੀਤਾ ਆਨੰਦ ਨੇ ਦਿੱਤੀ। ਉਨ੍ਹਾਂ ਕਿਹਾ ਕਿ ਸਭ ਤੋਂ ਵੱਧ ਵਾਹਨ ਕਿਊਬੈਕ ਵਿਚੋਂ ਬਰਾਮਦ ਹੋਏ ਹਨ, ਜਦਕਿ ਓਨਟਾਰੀਓ ਵੀ ਚੋਰੀਆਂ ਦਾ ਵੱਡਾ ਕੇਂਦਰ ਬਣਿਆ ਹੋਇਆ ਹੈ। ਕਈ ਵਾਹਨ ਮੋਂਟਰੀਅਲ ਬੰਦਰਗਾਹ ਰਾਹੀਂ ਵਿਦੇਸ਼ ਭੇਜੇ ਜਾ ਰਹੇ ਸਨ।
ਇਹ ਕਾਰਵਾਈ ਫੈਡਰਲ ਸਰਕਾਰ ਦੇ ਇਸ ਸਾਲ ਸ਼ੁਰੂ ਕੀਤੇ ਰਾਸ਼ਟਰੀ ਵਾਹਨ ਚੋਰੀ ਰੋਕਥਾਮ ਯੋਜਨਾ ਦਾ ਹਿੱਸਾ ਹੈ, ਜਿਸ ਵਿਚ ਸਥਾਨਕ ਤੇ ਅੰਤਰਰਾਸ਼ਟਰੀ ਪੁਲਿਸ ਏਜੰਸੀਆਂ, ਵਾਹਨ ਨਿਰਮਾਤਾ ਤੇ ਬੀਮਾ ਕੰਪਨੀਆਂ ਸ਼ਾਮਲ ਹਨ।
ਇਨਸ਼ੋਰੈਂਸ ਬਿਊਰੋ ਆਫ਼ ਕੈਨੇਡਾ (IBC) ਮੁਤਾਬਕ, ਚੋਰੀਸ਼ੁਦਾ ਵਾਹਨਾਂ ਲਈ ਕਲੇਮਾਂ ਵਿਚ 19 ਪ੍ਰਤੀਸ਼ਤ ਦੀ ਕਮੀ ਦਰਜ ਕੀਤੀ ਗਈ ਹੈ, ਪਰ ਇਹ ਸਮੱਸਿਆ ਇਤਿਹਾਸਕ ਔਸਤ ਤੋਂ ਕਾਫ਼ੀ ਵੱਧ ਪੱਧਰ ’ਤੇ ਬਰਕਰਾਰ ਹੈ।
ਬੀ.ਸੀ. ਅਤੇ ਅਲਬਰਟਾ ਵਿਚ, ਖ਼ਾਸਕਰ ਸਰੀ, ਕੈਲਗਰੀ ਅਤੇ ਐਡਮੰਟਨ ਖੇਤਰਾਂ ਵਿਚ ਵਾਹਨ ਕਲੋਨਿੰਗ ਅਤੇ ਧੋਖਾਧੜੀ ਰੀਸੇਲ ਮਾਮਲਿਆਂ ਵਿਚ ਵਾਧਾ ਦਰਜ ਕੀਤਾ ਗਿਆ ਹੈ। ਅਧਿਕਾਰੀਆਂ ਨੇ ਪੋਰਟ ਨਿਗਰਾਨੀ ਤੇ ਸੂਬਿਆਂ ਵਿਚ ਡਾਟਾ ਸਾਂਝਾ ਕਰਨ ਦੀ ਲੋੜ ਉਤੇ ਜ਼ੋਰ ਦਿੱਤਾ ਹੈ।
ਮੰਤਰੀ ਆਨੰਦ ਨੇ ਕਿਹਾ ਕਿ ਸਰਕਾਰ “ਚੋਰੀਸ਼ੁਦਾ ਵਾਹਨਾਂ ਦੇ ਨਿਰਯਾਤ ਰੂਟਾਂ ਨੂੰ ਕੱਟਣ ਅਤੇ ਬੋਰਡਰ ਏਜੰਸੀ ਨੂੰ ਵਾਧੂ ਸਰੋਤ ਪ੍ਰਦਾਨ ਕਰਨ” ਲਈ ਵਚਨਬੱਧ ਹੈ।
