ਬੋਰਿਸ ਜੌਹਨਸਨ ਵੱਲੋਂ ਅਸਤੀਫ਼ੇ ਦਾ ਐਲਾਨ, ਨਵੇਂ ਲੀਡਰ ਦੇ ਚੁਣੇ ਜਾਣ ਤੱਕ ਰਹਿਣਗੇ ਪੀ. ਐੱਮ.

ਬੋਰਿਸ ਜੌਹਨਸਨ ਨੇ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਅਹੁਦੇ ਤੋਂ ਅਸਤੀਫ਼ਾ ਦੇਣ ਦਾ ਐਲਾਨ ਕਰ ਦਿੱਤਾ ਹੈ। ਹਾਲਾਂਕਿ, ਪਾਰਟੀ ਵੱਲੋਂ ਅਕਤੂਬਰ ਵਿਚ ਨਵਾਂ ਲੀਡਰ ਚੁਣੇ ਜਾਣ ਤੱਕ ਉਹ ਪੀ. ਐੱਮ. ਬਣੇ ਰਹਿਣਗੇ। 50 ਕੈਬਨਿਟ ਮੈਂਬਰਾਂ ਤੇ ਸਾਂਸਦਾਂ ਦੇ ਅਸਤੀਫ਼ਿਆਂ ਨੇ ਜੌਹਨਸਨ ਨੂੰ ਕੁਰਸੀ ਛੱਡਣ ਦਾ ਐਲਾਨ ਕਰਨ ਲਈ ਮਜ਼ਬੂਰ ਕੀਤਾ।

ਬੁੱਧਵਾਰ ਨੂੰ ਕੈਬਨਿਟ ਮੈਂਬਰਾਂ ਵੱਲੋਂ ਅਸਤੀਫ਼ੇ ਦੇਣ ਦਾ ਸਿਲਸਿਲਾ ਸ਼ੁਰੂ ਹੋਣ ਮਗਰੋਂ ਦੂਜੇ ਦਿਨ ਅਸਤੀਫ਼ਿਆਂ ਦੀ ਗਿਣਤੀ 50 ਤੋਂ ਵੱਧ ਪਹੁੰਚ ਗਈ ਸੀ।

ਯੂ. ਕੇ. ਦੇ ਸਿਹਤ ਸਕੱਤਰ ਸਾਜਿਦ ਜਾਵਿਦ ਅਤੇ ਵਿੱਤ ਮੰਤਰੀ ਰਿਸ਼ੀ ਸੁਨਕ ਵਰਗੀਆਂ ਪ੍ਰਮੁੱਖ ਹਸਤੀਆਂ ਸਮੇਤ ਲਗਭਗ 30 ਅਧਿਕਾਰੀਆਂ ਨੇ ਸਾਬਕਾ ਡਿਪਟੀ ਚੀਫ ਵ੍ਹਿਪ ਕ੍ਰਿਸਟੋਫਰ ਪਿਨਚਰ ਨਾਲ ਜੁੜੇ ਹਾਲ ਹੀ ਦੇ ਵਿਵਾਦ ਨੂੰ ਲੈ ਕੇ ਆਪਣੇ ਅਸਤੀਫ਼ੇ ਸੌਂਪੇ ਹਨ।

ਜੌਹਨਸਨ ਆਪਣੇ ਸਭ ਤੋਂ ਨੇੜਲੇ ਸਹਿਯੋਗੀ ਟ੍ਰੈਜ਼ਰੀ ਚੀਫ ਨਦੀਮ ਜ਼ਹਾਵੀ ਵੱਲੋਂ ਦੇਸ਼ ਦੇ ਭਲੇ ਲਈ ਅਸਤੀਫ਼ਾ ਦੇਣ ਲਈ ਕਹਿਣ ਤੋਂ ਬਾਅਦ ਅਹੁਦਾ ਛੱਡਣ ਲਈ ਸਹਿਮਤ ਹੋਏ।